ភ្នំពេញ ៖ ឆ្លើយតបនឹងការរិះគន់ពាក់ព័ន្ធនឹងវត្តមានរបស់ជនជាតិចិន នៅទឹកដីកម្ពុជា ដែលមានជនជាតិចិនមួយចំនួនបានបង្កភាពអនាធិតេយ្យនោះ សម្តេចតេជោហ៊ុន សែន បានប្រាប់ដល់ប្រជាពលរដ្ឋកុំមានការព្រួយបារម្ភ ព្រោះជនជាតិចិនមករស់នៅកម្ពុជា តែវត្តមានចិន គឺមួយភាគធំ ជាទេសចរណ៍ ដែលរួមចំណែកដល់កំណើនចំណូលលើវិស័យទេសចរណ៍ ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានពន្យល់ដល់ប្រជាពលរដ្ឋខ្មែរ ចិននឹងមិនមកនៅក្នុងទឹកដីកម្ពុជារហូតនោះទេ គ្រាន់តែមកបណ្តាក់ទុនរកស៊ីប៉ុណ្ណោះ។
ការប្រកាសរបស់សម្តេចតេជោ ហ៊ុន សែន បានធ្វើឡើងនាព្រឹកថ្ងៃពុធ ទី២៥ ខែមេសា ឆ្នាំ២០១៨នេះ ក្នុងឱកាសអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការ សាកលវិទ្យាល័យក្រចេះ ស្ថិតក្នុងក្រុងក្រចេះ ខេត្តក្រចេះ។ សម្តេចតេជោ ហ៊ុន សែន បានមានប្រសាសន៍ថា នៅកម្ពុជាបច្ចុប្បន្ននេះ មានក្រុមហ៊ុនបរទេស ជាច្រើនបានមកវិនិយោគ ប៉ុន្តែធនធានមនុស្សកម្ពុជា នៅមិនទាន់ឆ្លើយតបទាំងស្រុង ទៅនឹងតម្រូវការរបស់ក្រុមហ៊ុនទាំងនោះនៅឡើយទេ ដែលធ្វើឱ្យក្រុមហ៊ុនទាំងនោះ ត្រូវនាំអ្នកបច្ចេកទេស និងកម្មករឯកទេស មកធ្វើការនៅកម្ពុជា។
សម្តេចបានបញ្ជាក់ថា កន្លងមកមានការរិះគន់រឿងវត្តមានរបស់ជនជាតិចិននៅកម្ពុជា ដែលចាំបាច់ត្រូវបញ្ជាក់ជូនប្រជាពលរដ្ឋឲ្យបានយល់ ។ សម្តេចតេជោ បានលើកឡើងជាសំណួរថា តើជនជាតិចិនមកកម្ពុជានេះ គេមករបៀបម៉េច? ទី១ នោះ គឺទេសចរណ៍ចិនមកទស្សនានៅកម្ពុជាចំនួន១ លាននាក់ក្នុងមួយឆ្នាំៗ គឺជាផ្នែកសំខាន់មួយនៃការប្រមូលបានចំណូលពីទេសចរណ៍ ព្រោះ ចិនគេមិនមែនមកនៅស្រុកខ្មែរទេខុសពីជំនាន់ដើម ។ សម្តេចតេជោ ហ៊ុន សែន បានហៅអ្នកដែលរិះគន់ថា ក្រុមហ៊ុនចិន មករកស៊ីនៅកម្ពុជាកាន់តែច្រើនគួរឱ្យព្រួយបារម្ភនោះ គឺជាមតិអគតិ។ សម្តេចបានបញ្ជាក់យ៉ាងដូច្នេះថា៖ “មួយរយៈចុងក្រោយនេះ មានមតិមួយចំនួនដែលជាមតិអគតិទាំងស្រុង មានការរិះគន់ទៅលើក្រុមហ៊ុនចិន ជនជាតិចិន មកកម្ពុជា តែខ្ញុំសូមបញ្ជាក់ជូនថា ជនជាតិចិនមកកម្ពុជានេះ គេមករបៀបម៉េច ទី១ គឺទេសចរណ៍ ១លាន២សែននាក់ នាំមកនូវប្រាក់ចំណូលពីប្រទេសចិន មកកាន់ប្រទេសកម្ពុជាច្រើនណាស់។ ចិនគេមិនមកនៅស្រុកខ្មែរទេ បើចិនជំនាន់គេ លុកលុយ ជំនាន់ចិនវេទនានោះ អាហ្នឹងចិនពិតជារត់ពីស្រុកចិនមកនៅស្រុកខ្មែរ មកនៅអាស៊ីអាគ្នេយ៍ច្រើនណាស់ ឯនៅស្រុកខ្មែររាប់ទាំងពីដងទន្លេមេគង្គ នៅខាងប្រពន្ធខ្ញុំ”។
សម្តេចតេជោ ហ៊ុន សែន មានប្រសាសន៍បញ្ជាក់ថា ក្រៅពីទេសចរណ៍ចិន គឺមានក្រុមហ៊ុនចិនច្រើនណាស់ មកវិនិយោគនៅកម្ពុជា និងសាងសង់ហេដ្ឋារចនាសម្ព័ន្ធនានា និងសំណង់សំខាន់ៗ គឺត្រូវការកម្មករជំនាញផងដែរ ព្រោះធនធានមនុស្សកម្ពុជាមានការកើនឡើងក៏ពិតមែន តែនៅមានកម្រិត ។
សម្តេចនាយករដ្ឋមន្ត្រីមានប្រសាសន៍បន្ថែមថា ៖ “កុំព្រួយរហូតថា ចិនមកនៅស្រុកខ្មែរនោះ ព្រោះក្រុមហ៊ុនបរទេសមួយណាមិនថា តែក្រុមហ៊ុនចិននោះទេក៏មានអ្នកឯកទេស បរទេសបម្រើការឲ្យស្ថាប័នរបស់គេ ពេលធនធានក្នុងស្រុកមិនគ្រប់តម្រូវការ “។
សូមបញ្ជាក់ថា វត្តមានដ៏ច្រើននៃជនជាតិចិនលើទឹកដីកម្ពុជា បានបង្កឱ្យមានការព្រួយបារម្ភកាន់តែខ្លាំងអំពីបញ្ហាសន្តិសុខ សុវត្ថិភាព និងសេដ្ឋកិច្ច នៅតាមខេត្តសំខាន់ៗមួយចំនួន នៃប្រទេសកម្ពុជា ដូចជា នៅខេត្តព្រះសីហនុ ខេត្តសៀមរាប និងរាជធានីភ្នំពេញជាដើម។ ជនជាតិចិនទាំងនោះតែងតែប្រើអំពើហិង្សាកាប់ចាក់គ្នា និងការប្រមូលផ្ដុំគ្នាប្រព្រឹត្តអំពើចាប់ជំរិតតាមប្រព័ន្ធអ៊ីនធឺណិត។
លោក ស្យុង បូ (Xiong Bo) ឯកអគ្គរដ្ឋទូតចិនប្រចាំកម្ពុជា កាលពីដើមខែកុម្ភៈឆ្នាំ២០១៨នេះ បានអះអាងថា រដ្ឋាភិបាលចិនមិនគាំទ្រចំពោះសកម្មភាព ល្មើសបែបនេះឡើយ ហើយចិនក៏ប្រឆាំងដាច់ខាតចំពោះជនជាតិចិនណាដែលជួលផ្ទះ ឬបើកគ្រឹះស្ថាននៅកម្ពុជាដើម្បីប្រព្រឹត្តបទឧក្រិដ្ឋចាប់ជំរិតតាមប្រព័ន្ធអ៊ីនធឺណិតនេះដែរ។ ឯកអគ្គរដ្ឋទូតចិន លើកយកហេតុផលថា ការធ្វើឲ្យខេត្តព្រះសីហនុ ក្លាយជាតំបន់មួយដែលសម្បូរដោយកាស៊ីណូនេះ នឹងធ្វើឲ្យខាតបង់ដល់ផលប្រយោជន៍របស់វិនិយោគិនចិន នៅខេត្តព្រះសីហនុ។ មិនត្រឹមតែប៉ុណ្ណោះ លោកថា ការនេះក៏នឹងធ្វើឲ្យប៉ះពាល់ដល់ផលប្រយោជន៍ទេសចរណ៍របស់ជនជាតិចិន ព្រមទាំងប៉ះពាល់សម្រាប់រយៈពេលយូរអង្វែងដល់អនាគតការអភិវឌ្ឍរបស់ខេត្តព្រះសីហនុ ផងដែរ។ លោក ស្យុង បូ លើកឡើងថា ភាគីចិន នឹងបន្តសហការជាមួយកម្ពុជា រួមគ្នាកសាងខេត្តព្រះសីហនុ ឲ្យក្លាយទៅជាកំពង់ផែខ្នាតអន្តរជាតិ ដែលអាចទាក់ទាញវិនិយោគិនចិន កាន់តែច្រើនឡើងឲ្យមកវិនិយោគនៅខេត្តនេះបន្តទៀត។
ឯកអគ្គរដ្ឋទូតចិនរូបនេះ ក៏បានអំពាវនាវដល់ស្ថាប័នអនុវត្តច្បាប់របស់កម្ពុជា ឲ្យអនុវត្តច្បាប់ឲ្យបានយ៉ាងតឹងរ៉ឹងបំផុត ពោលគឺមិនត្រូវបន្ធូរបន្ថយទោសដោយសារតែគិតដល់ទំនាក់ទំនងល្អរវាងចិន និងកម្ពុជា ឡើយ ចំពោះជនសង្ស័យជាជនជាតិចិន ទាំងឡាយណាដែលបានប្រព្រឹត្តអំពើល្មើសច្បាប់នៅកម្ពុជា ហើយរដ្ឋាភិបាលចិន នឹងប្រឆាំងចំពោះជនជាតិចិនណាមួយ ដែលចង់សាងសង់កាស៊ីណូ (Casino) នៅក្នុងប្រទេសកម្ពុជា ក្នុងគោលបំណងទាក់ទាញជនជាតិចិន មកលេងល្បែងស៊ីសង។
គិតចាប់ពីឆ្នាំ២០១២មក យ៉ាងហោចណាស់មានជនជាតិចិន និងចិនតៃវ៉ាន់ ចំនួន ១ពាន់នាក់ហើយ ត្រូវបានអាជ្ញាធរកម្ពុជា ចាប់បញ្ជូនទៅប្រទេសចិនវិញ ក្រោយពីរកឃើញថា ពួកគេបានជាប់ពាក់ព័ន្ធនឹងបទល្មើសជំរិតទារប្រាក់តាមប្រព័ន្ធអ៊ីនធឺណិតនេះ៕ ដោយ៖បញ្ញាស័ក្តិ