វិមានប្រធានាធិបតីកូរ៉េខាងត្បូង នៅថ្ងៃទី ២៥ មេសានេះ បានចេញសេចក្តីប្រកាសឲ្យដឹងថា កូរ៉េខាងត្បូង-អាមេរិក កំពុងប្រឹងប្រែងជំរុញកិច្ចការទាំងឡាយ ដើម្បីធានាឲ្យជំនួបដោយឡែករវាងប្រទេសទាំងពីរនេះជាមួយកូរ៉េខាងជើងទទួលបានជោគជ័យ ។
នាយកខុទ្ទកាល័យសន្តិសុខជាតិ នៃវិមានប្រធានាធិបតីកូរ៉េខាងត្បូង Chung Eui Yong និងសមាសភាគីអាមេរិក John Bolton ទើបបានជួបប្រជុំគ្នានៅថ្ងៃទី ២៤ ខែមេសា ម្សិលមិញនេះ ។ ក្នុងកិច្ចប្រជុំនោះភាគីទាំងសងខាងបានឯកភាពរៀបចំឲ្យមានជំនួបកំពូលរវាងកូរ៉េខាងត្បូង-អាមេរិក នៅពាក់កណ្តាលខែឧសភា មុនពេលដែលជំនួបកំពូលរវាងអាមេរិក-កូរ៉េខាងជើងប្រព្រឹត្តទៅ ។ ទន្ទឹមនោះប្រធានាធិបតីកូរ៉េខាងត្បូង Moon Jae-in និងប្រធានាធិបតីត្រាំ ក៏នឹងដំណើរការសន្ទនាតាមទូរស័ព្ទភ្លាម បន្ទាប់ពីសន្និសីទកំពូលអន្តរកូរ៉េបញ្ចប់ទៅនៅថ្ងៃទី ២៧ ខែមេសា ៕ សូយន