តាម Tech Times រឿងរ៉ាវរវាងសត្វននៀលឈ្មោល ដែលគេដាក់ឈ្មោះថា Klepetan និងននៀលញី Malena បានអង្រួនបេះដូងរបស់មនុស្សជាច្រើនលើពិភពលោក ខណៈពេលគេដឹងថា ននៀលឈ្មោល Klepetan រៀងរាល់ឆ្នាំបានហោះហើរពីទ្វីបអាហ្វ្រិកទៅកាន់ Croatia ដើម្បីភពប្រសព្វជាមួយគូស្នេហ៍ Malena- ននៀលញី ដែលជាគូស្នេហ៍ពិការ ។
គិតពីពេលនេះ Klepetan និង Malena មានកូនទាំងអស់ ៦២ក្បាល ។ ភាពស្មោះស្ម័គ្ររបស់ននៀលឈ្មោលធ្វើឲ្យគេរំភើបចិត្តតាមរយៈរឿងរ៉ាវមួយកើតឡើងនៅឆ្នាំ ២០១៧ គ្រាដែល Klepetan បានមកកាន់សម្បុករបស់ Malena យឺតជាងសព្វមួយដង ។ ក្នុងអំឡុងពេល ១៦ឆ្នាំកន្លងមក គិតចាប់ពីឆ្នាំ ១៩៩៣ ធម្មតាននៀលឈ្មោលតែងមកដល់សម្បុកនៅអំឡុងសប្តាហ៍ទី ៣ ខែមីនា ជារៀងរាល់ឆ្នាំ ទាស់នៅត្រង់ឆ្នាំ ២០១៧នេះ វាមកយឺត អាស្រ័យដោយអាកាសធាតុបង្ខំឲ្យវាត្រូវប្តូរផ្លូវហោះហើរ ។ ពេលមកដល់នៅដើមខែមេសា ស្រាប់តែឃើញ Malena កំពុងនៅក្បែរននៀលឈ្មោលមួយផ្សេង Klepetan បានប្រយុទ្ធដោយរងរបួសពេញខ្លួន ដើម្បីដណ្តើមគូស្នេហ៍មកវិញ ហើយនៅថ្ងៃទី ២៤ ខែមីនា ឆ្នាំ ២០១៨នេះ គេបានឃើញននៀលឈ្មោល Klepetan មកដល់សម្បុករបស់គូស្នេហ៍ត្រឹមត្រូវដូចសព្វមួយដង ។ ពលរដ្ឋនៅតំបន់នោះឲ្យដឹងថា ពេលនោះននៀលឈ្មោលមើលទៅហាក់ចាស់ទ្រុឌទ្រោម នឿយហត់ជាងពេលមុនៗ ។
ងាកមកមើលរឿងអតីតកាលរបស់គូស្នេហ៍ននៀលទាំងពីរនេះ តាមរយៈរូបភាពនឹងឃ្លីប តាំងពីឆ្នាំ ១៩៩៣ រហូតមកទល់ថ្ងៃទី ២៤ ខែមីនា ឆ្នាំ ២០១៨ដូចខាងក្រោម ៖
រឿងរ៉ាវមនោសញ្ចេតនាគួរឲ្យរំភើបចិត្តរវាងននៀលឈ្មោល Klepetan ដែលស្មោះនឹងស្នេហ៍ សុខចិត្តធ្វើដំណើររាប់ពាន់គីឡូម៉ែត្រ ក្នុង១ឆ្នាំៗដើម្បីវិលមកផ្ទះជួបជាមួយគូស្នេហ៍របស់វាដែលពិការពុំអាចហោះហើរបាន ។
រឿងរ៉ាវចាប់ផ្តើមតាំងពី២០ឆ្នាំមុន ពេលដែលលោក Stjepan Vokic (Croatia) ជាបុរសពោះម៉ាយម្នាក់ បានប្រទះឃើញននៀលញី១ក្បាល រងរបួសយ៉ាងធ្ងន់ធ្ងរដោយសារពួកព្រានព្រៃ ។
លោក Vokic បានយកវាមកព្យាបាលរហូតជាសះស្បើយ ។
លើដំបូលផ្ទះរបស់អ្នកមានគុណនេះ ស្នេហារវាង Malena និង Klepetan ត្រូវបានបង្កាត់ឡើង។
វេលាដំបូងប្រហែលជាគូស្នេហ៍ទាំងពីរនេះ ត្រូវឆ្លងកាត់ព្យុះភ្លៀងពុំតិចឡើយ គ្រាដែល Malena ពុំអាចធ្វើដំណើរបានរួមជាមួយគូស្នេហ៍ខ្លួនទៅកាន់តំបន់ប៉ែកខាងត្បូង ដើម្បីគេចចេញពីរដូវរងារ ។
ទោះយ៉ាងណាពេលបែកគ្នារដូវរងារម្តងៗ ពុំអាចធ្វើឲ្យស្នេហារបស់ពួកវាត្រូវ បែកបាក់បានឡើយ។
រៀងរាល់ឆ្នាំពេលរដូវរងារជិតមកដល់ Klepetan ទុក Malena ឲ្យលោក Vokic ថែទាំ រួចហោះហើរទៅកាន់ប៉ែកខាងត្បូង ដើម្បីគេចពីអាកាសធាតុត្រជាក់ ។ រួចត្រឡប់មកវិញ នៅខែមីនា ឆ្នាំបន្ទាប់មក ។ ក្នុងរូបគឺជាកូនៗរបស់ពួកវាទាំងពីរ ។
នេះជាលើកទី ១៦ហើយ ដែលននៀលប្តី Klepetan បានហោះហើររាប់ពាន់គីឡូម៉ែត្រ ដើម្បីវិលមកផ្ទះជួបភរិយា Malena ដែលកំពុងរង់ចាំ ។
ប្រិយមិត្ត! ១៦ឆ្នាំហើយ ដែលននៀលឈ្មោលតែងចាកចេញទៅនៅរដូវរងារ រួចវិលត្រឡប់មកវិញដោយធ្វើដំណើររាប់ពាន់គីឡូ ដើម្បីជួបននៀលញី ពុំដែលខកខានមួយឆ្នាំណាឡើយ ។ ម្យ៉ាងទៀត ននៀលញី Malena ដែលរងពិការរភាពដោយសារព្រានព្រៃគឺត្រូវនៅ១កន្លែង…. ធ្វើឲ្យយើងនឹកគិតថា ពួកវាជាសត្វ ហេតុអ្វីក៏ស្នេហ៍ស្មោះច្រើនលើសពីមនុស្សខ្លះ!!!??? ។
ឃ្លីប: ជំនួបរវាងគូស្នេហ៍ននៀលនៅថ្ងៃទី ២៤ ខែមីនា ឆ្នាំ២០១៨
