ភ្នំពេញ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទបានអនុញ្ញាឲ្យលោក Ramesh Subramaniam អគ្គនាយកធនាគារអភិវឌ្ឍអាស៊ីប្រចាំតំបន់អាស៊ីអាគ្នេយ៍ និងសហការីចូលជួបសម្តែងការគួរសម និងពិភាក្សាការងារនៅទីស្តីការក្រសួងនារសៀលថ្ងៃអង្គារ ទី២៤ ខែមេសា ឆ្នាំ២០១៨។
មានមតិស្វាគមន៍លោករដ្ឋមន្ត្រី ក្នុងនាម ក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណយ៉ាងជ្រាលជ្រៅជូនចំពោះធនាគារអភិវឌ្ឍអាស៊ីដែលបានជួយឧបត្ថម្ភគាំទ្រយ៉ាងច្រើន ក្នុងដំណើរការស្តារនិងអភិវឌ្ឍប្រទេសកម្ពុជា ពិសេសជួយគាំទ្រផ្តល់ហិរញ្ញប្បទានលើវិស័យកសិកម្ម និងវិស័យពាក់ព័ន្ធដ៏ទៃទៀត។ នាឱកាសនេះលោករដ្ឋមន្ត្រីក៏បានជម្រាបជូនភ្ញៀវដោយសង្ខេបពីការរីកចម្រើនលើវិស័យកសិកម្មមានដូចជាផលិតកម្មស្រូវ ដំឡូងមី ស្វាយចន្ទី ផលិតកម្មបន្លែនិងវិស័យវារីវប្បកម្មដែលទទួលបានលទ្ធផលល្អប្រសើរគួរឲ្យកត់សម្គាល់។ នាឱកាសនេះលោក Ramesh Subramaniam បានសាទរចំពោះកំណើនសេដ្ឋកិច្ចដែលរាជរដ្ឋាភិបាលសម្រេចបាននាបណ្តាឆ្នាំកន្លងមកក្នុងនោះវិស័យកសិកម្មដែលបានរួមក្នុងការជំរុញកំណើនសេដ្ឋកិច្ចជាតិ ៧%។
លោក Ramesh Subramaniam បានជម្រាបជូនលោករដ្ឋមន្ត្រីពីគោលបំណងរបស់លោកនាថ្ងៃនេះគឺស្នើសុំការគាំទ្រ សហការ និងអនុសាសន៍សំខាន់ៗក្នុងការរៀបចំយុទ្ធសាស្ត្រភាពជាដៃគូថ្មីជាមួយប្រទេសកម្ពុជាដើម្បីអនុវត្តគម្រោងនានាដែលទាក់ទងនឹងវិស័យកសិកម្ម ជាពិសេសទាក់ទងទៅនឹងការបម្រែបម្រួលអាកាសធាតុ ការកែច្នៃវិចខ្ចប់ និងបង្កើនតម្លៃលើខ្សែសង្វាក់ផលិតកម្មកសិកម្ម។ ទាក់ទងនិងផែនការយុទ្ធសាស្ត្រដែលបានលើកឡើងខាងលើ។
លោករដ្ឋមន្ត្រីបានស្នើសុំឲ្យលោក Ramesh Subramaniam គិតគូពិចារណាលើចំណុចសំខាន់ៗមួយចំនួនដូចជា៖
ទី១- គួរបង្កើតក្រុមការងារមួយដែលមានសមាសភាពចូលរួមពីរាជរដ្ឋាភិបាល និងវិស័យឯកជន ដើម្បីធ្វើការសិក្សាស្វែងយល់ពីគោលនយោបាយគាំទ្ររបស់រដ្ឋាភិបាលនៃ បណ្តាប្រទេសនានាជាសមាជិក GMS លើការគ្រប់គ្រងផលិតផលកសិកម្ម ការកែច្នៃ ការវិចខ្ចប់ ការស្តុកទុក និងការដឹកជញ្ជូន ឆ្លើយតបទៅនឹងសេចក្តីត្រូវការទីផ្សារអន្តរជាតិ ។ ទី២-សិក្សាពីលទ្ធភាពលើការផ្តល់ឥណទានដែលមានការប្រាក់ទាបដល់ប្រជាកសិករ និងវិស័យឯកជនដែលលទ្ធភាពធ្វើការកែច្នៃកសិផល និងជំរុញការអនុវត្តការធ្វើអនាម័យនិងភូតគាមអនាម័យជាអាទិភាព ។ ទី៣-ពិនិត្យលទ្ធភាពលើការកសាងហេដ្ឋារចនាសម្ព័ន្ធនានាដែលទាក់ទងនឹងការកែច្នៃវិចខ្ចប់
។ ទី៤-ជួយជំរុញការធ្វើទំទើបកម្មកសិកម្ម ពិសេសការប្រើប្រាស់គ្រឿងយន្តកសិកម្មសមស្របទៅតាមលទ្ធភាព ក្នុងខណៈដែលកម្លាំងពលកម្មក្នុងវិស័យកសិកម្មបាននិងកំពុងមានការធ្លាក់ចុះជាបន្តបន្ទាប់ ។ ទី៥-ជួយជំរុញការងាររៀបចំផែនទីកំណត់តំបន់ដាំដុះឲ្យបានត្រឹមត្រូវ ដើម្បីជាប្រយោជន៍ក្នុងការបង្កើនផលិតភាពផលិតកម្មដោយការបង្កើនរដូវដាំដុះ ការបង្កើនទិន្នផលតាមរយៈការជ្រើសរើសពូជឲ្យសមស្របតាមស្ថានភាពដី និងគុណភាពដី។
សំណើរខាងលើដែលលោករដ្ឋមន្ត្រីបានលើកឡើង លោក Ramesh Subramaniam បានឯកភាពនិងគាំទ្រ ហើយ ខ្លួនលោកផ្ទាល់និងសហការីនឹងយកទៅពិនិត្យពិចារណាបញ្ចូលក្នុងផែនការយុទ្ធសាស្ត្រភាពជាដៃគូថ្មី ក៏ដូចជាគម្រោងអភិវឌ្ឍ វិស័យកសិកម្មផ្សេងៗទៀតផងដែរ។ ចុងបញ្ចប់នៃជំនួបពិភាក្សានេះ លោករដ្ឋមន្ត្រីសង្ឃឹមនិងជឿជាក់ថាធនាគារអភិវឌ្ឍអាស៊ីនឹងបន្តជួយគាំទ្រដល់រាជរដ្ឋាភិបាលកម្ពុជាក្នុងការអភិវឌ្ឍលើគ្រប់វិស័យ ពិសេសវិស័យកសិកម្មឲ្យកាន់តែរីកចម្រើននាពេលអនាគតស្របតាមប្រាថ្នាចង់បានរបស់ប្រមុខរាជរដ្ឋាភិបាល និងប្រជាជនកម្ពុជា៕ ដោយ៖បញ្ញាស័ក្តិ
