កំពង់ស្ពឺ៖ ដោយអនុវត្តន៍តាមដីការបស់ព្រះរាជអាជ្ញាខេត្តកំពង់ស្ពឺ កងកម្លាំងសមត្ថកិច្ចខេត្តកំពង់ស្ពឺ ឃាត់ខ្លួនស្ត្រីម្នាក់ ក្នុងករណីឆបោកប្រជាពលរដ្ឋ ដោយដើរចងការប្រាក់ និងខ្ចីប្រាក់ រួមទាំងចេញមូលប័ត្រ (សែក) គ្មានទឹកប្រាក់រាប់ម៉ឺនដុល្លារអាមេរិក ។ ចំណែកបក្ខពួកជាច្រើន ដែលកំពុងគេចខ្លួន ក៏ត្រូវសមត្ថកិច្ចតាមចាប់ខ្លួនផងដែរ។
លោកវរសេនីយ៍ឯក សម សាក់ នាយការិយាព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តកំពង់ស្ពឺ បានឱ្យដឹងថា ជនសង្ស័យមានឈ្មោះ ភឿន សុភ័ន ភេទស្រី អាយុ២៥ឆ្នាំ រស់នៅភូមិព្រះខែ ឃុំកាហែង ស្រុកសំរោងទង ខេត្តកំពង់ស្ពឺ ត្រូវបានឃាត់ខ្លួនកាលពីថ្ងៃទី២៤ ខែមេសា ឆ្នាំ២០១៨។ ស្ត្រីជាសមាជិកក្រុមរកស៊ីដើរចងការប្រាក់ និងខ្ចីប្រាក់ដោយសន្យាសងគេវិញតាមរយៈ ចេញមូលទានប័ត្រគ្មានសាច់ប្រាក់របស់ធនាគារ រាប់ម៉ឺនដុល្លារអាមេរិក ក្នុងចេតនាឆបោក ត្រូវបានចាប់ខ្លួនបានម្នាក់ និងនៅសល់មេខ្លោងជាច្រើននាក់ទៀត សមត្ថកិច្ចកំពុងស្រាវជ្រាវតាមចាប់ខ្លួន។ ក្រុមនេះត្រូវបានប្រជាពលរដ្ឋរងគ្រោះមកដាក់ពាក្យបណ្តឹងជាបន្តបន្ទាប់ និងទទួលបានបណ្តឹងចំនួន៣ករណី នៅស្នងការនគរបាលខេត្តកំពង់ស្ពឺ និងមានបណ្តឹងនៅសាលាដំបូងខេត្តកំពង់ស្ពឺ មួយចំនួនទៀត។ បើយោងតាមប្រភពពីក្រុមអ្នករកស៊ី និងអាជីវករមួយចំនួន បានបង្ហើបឱ្យដឹងថា ករណីក្រុមនេះ បានឆបោកពីពួកគាត់មិនតិចជាងលានដុល្លារទេ ហើយក្រុមនេះមានខ្នងបង្អែកជាមន្ត្រីពេទ្យយោធា ឈ្មោះ ស៊ឹម ផល្លី។
ករណីចាប់សមាជិកក្រុមឆបោកប្រាក់រាប់ម៉ឺនដុល្លារ ត្រូវបានឃាត់ខ្លួនកាលពីថ្ងៃទី២៤ ខែមេសា ឆ្នាំ២០១៨ ដោយបានការអនុញ្ញាតពីលោកព្រះរាជអាជ្ញា ទើបកម្លាំងការិយាល័យកម្រិតធ្ងន់ខេត្ត ចុះឆែកឆេរនៅក្នុងហាងមួយក្នុងខេត្តកំពង់ស្ពឺ ឈានទៅឃាត់ខ្លួនជនសង្ស័យម្នាក់ ដែលប្រើល្បិចយកមូលប្បទានប័ត្រគ្មានទឹកប្រាក់ ដើម្បីបោកប្រាក់ពីជនរងគ្រោះ រាប់ម៉ឺនដុល្លារ។
ក្រុមនេះមានទាំងស្រី-ប្រុស ដើររកស៊ីតែមុខរបរឆបោកនេះរាប់ឆ្នាំមកហើយ ដោយយកលេសខ្ចីលុយដើម្បីបង្វិលក្នុងមុខជំនួញ តែតាមពិតគឺល្បិចបោកប្រាស់ទាំងស្រុង និងរាប់លានដុល្លារឯណោះ។ ប្រភពមួយទៀតបានប្រាប់ឱ្យដឹងថាស្ត្រីឈ្មោះ ឌុច ចាន់រស្មី ក៏មានជាប់ពាក់ព័ន្ធនិងករណីនេះដែរ ហើយពេលនេះសមត្ថកិច្ចកំពុងស្រាវជ្រាវ ស្វែងអ្នកពាក់ព័ន្ធមកផ្តន្ទាទោសតាមនីតិវិធីច្បាប់៕ ដោយ៖បញ្ញាស័ក្តិ
