បុរសសញ្ជាតិចិនម្នាក់រស់នៅសៀងហៃ បានជ្រើសរើសយកវិធីអវិជ្ជមានមួយ និងប៉ងធ្វើអត្តឃាតដោយសារងប់ងល់នឹង “សន្លឹកឆ្នោត” អស់រយៈពេល ៧ឆ្នាំពេញ ។
លោក Xu Chao ក្នុងសវនាការកាត់ទោសកាលពីដើមខែមេសា ២០១៨
តាមនោះលោក Xu Chao អាយុ ៤១ឆ្នាំ បានទិញឆ្នោតជាប្រចាំពីឆ្នាំ ២០១០ ហើយតែងត្រូវសន្លឹកឆ្នោតតាម “លង” ជានិច្ច ។ ពេលទិញឆ្នោតម្តងៗ Chao ចំណាយអស់ជាមធ្យម ២០.០០០យាន់ (ប្រមាណ ៣.០០០ដុល្លារ) -នេះបើតាម Thepaper.en ចុះផ្សាយនៅថ្ងៃទី ២៥ ខែមេសា ។
សង្ឃឹមថានឹងត្រូវឆ្នោត Xu Chao បានលក់ផ្ទះរបស់ខ្លួន និងផ្ទះ៣ខ្នងទៀតរបស់ឪពុកម្តាយ មានតម្លៃសរុបប្រមាណ ៦លានយាន់ (ប្រហែល ៩៥០.០០០ដុល្លារ) ។ លោក Chao នៅបានខ្ចីលុយកាក់ពីមិត្តភក្តិ គ្រួសារ និងចងការបន្ថែមទៀត ។ គួរនិយាយថា ភាពងប់ងល់ សង្ឃឹម បែបនេះក៏ព្រោះតែធ្លាប់ត្រូវឆ្នោតបាន១លានយាន់ (ជាង ១៥៨.០០០ដុល្លារ) មុននេះ ៤ឆ្នាំ តែបានលាក់ដើម្បីទុកលុយបន្ត “វិនិយោគ” … ទិញឆ្នោត ។
ចុងក្រោយប្រពន្ធទ្រាំទ្រលែងបានក៏សុំលែងលះ ហើយនៅខែតុលា ឆ្នាំ ២០១៧ ក៏ត្រូវបាត់បង់ការងារ នាក្រុមហ៊ុនគ្រប់គ្រងអចលនទ្រព្យមួយ ។
ពេលអស់លុយ Xu Chao បានទៅកន្លែងលក់ឆ្នោត ដើម្បីសុំខ្ចីលុយ តែគេបានបដិសេធ ព្រោះបំណុលចាស់នៅពុំទាន់ទូទាត់សង ។
ទាល់ច្រកក៏សុញគំនិតទៅទិញអាកុល១ដប យកមកដាក់នៅកន្លែងលក់ឆ្នោត រួចដុតតែម្តង ។
ក្នុងសវនាការកាលពីខែ មីនា ឆ្នាំ២០១៨ Xu Chao និយាយថា ខ្លួនមានបំណងធ្វើអត្តឃាត ទើបពុំរត់ចេញពីកន្លែងលក់ឆ្នោតដូច្នេះ ។
នៅខែមេសា ២០១៨នេះ តុលាការបានកាត់ទោសឲ្យ Xu Chao ជាប់ពន្ធនាគារ ៤ឆ្នាំ ពីបទចេតនាបង្កអគ្គិភ័យ ៕