ភ្នំពេញ ៖ រដ្ឋបាលរាជធានីនឹងដាក់ចេញជាយន្តការកែប្រែបឹងមួយចំនួនឲ្យក្លាយជាបឹងធម្មជាតិ ការពារបណ្តាញប្រឡាយ បណ្តាញបង្ហូរទឹក សាងសង់ផ្លូវថ្មើជើង សួនច្បារនិងសំណង់សាធារណៈនានា រួមនិងការរៀបចំចិញ្ចើមផ្លូវដើរ អោយមានសណ្តាប់ធ្នាប់ល្អ ភ្ជាប់ជាមួយបណ្តាញរថយន្តក្រុងសាធារណៈ។
នារសៀលថ្ងៃព្រហស្បតិ៍ ទី២៦ ខែមេសា ឆ្នាំ២០១៨ រដ្ឋបាលរាជធានីភ្នំពេញបានប្រារព្ធពិធីបិទសិក្ខាសាលាស្តីពី ការបង្ហាញលទ្ធផល និងវឌ្ឍនភាពគម្រោងសហការលើការអភិវឌ្ឍនគរូបនីយកម្ម រវាងរដ្ឋបាលរាជធានីភ្នំពេញ និងសាលាក្រុងប៉ារីស ក្រោមអធិបតីភាព លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី EVA NGUYEN BINH ឯកអគ្គរដ្ឋទូតបារាំង ប្រចាំព្រះរាជាណាចក្រកម្ពុជា ដែលត្រូវបានរៀបចំឡើងដោយរដ្ឋបាលរាជធានីភ្នំពេញ រយៈពេលពេញមួយថ្ងៃ ។
ក្នុងពិធីបិទសិក្ខាសាលា លោកអភិបាលរាជធានីភ្នំពេញ បានថ្លែងអំណរគុណយ៉ាងជ្រាលជ្រៅ ចំពោះរដ្ឋធានីក្រុងប៉ារីស និងស្ថានទូតបារាំងប្រចាំព្រះរាជាណាចក្រកម្ពុជា ជាពិសេសលោកស្រី Eva NGUYEN BINH ឯកអគ្គរដ្ឋទូតបារាំងតែម្តង ដែលតែងតែជួយ គាំទ្រកិច្ចសហប្រតិបត្តិការ ដល់សាលារាជធានីភ្នំពេញ និងបានបញ្ជូនអ្នកជំនាញ មកសិក្សាពីការអភិវឌ្ឍរបស់រាជធានីភ្នំពេញ ដើម្បីបង្កើនប្រសិទ្ធភាពថែមទៀត នៃកិច្ចប្រតិបត្តិការលើការរៀបចំអភិវឌ្ឍ ជាពិសេសតំបន់ភាគខាងត្បូងរាជធានីភ្នំពេញ ដូចជា បណ្តាញធារាសាស្ត្រ សំណង់ធំតូច លំហូរចរាចរណ៍ និងគម្រោងប្លង់ បណ្តាញផ្លូវឱ្យកាន់តែទទួលបានលទ្ធផលល្អប្រសើរ ព្រមទាំងបន្តចូលរួមអនុវត្តលើការអភិវឌ្ឍនគរូបនីយកម្ម និងសំណង់ក្នុងរាជធានីភ្នំពេញ កាន់តែស៊ីជម្រៅ ក្នុងការកសាងហេដ្ឋារចនាសម្ព័ន្ធរូបវន្ត ឲ្យស្រស់បំព្រង ដើម្បីឆ្លើយតបទៅនឹងបរិការណ៍ថ្មីនៃសង្គម សេដ្ឋកិច្ចកម្ពុជា និងបរិការណ៍នៃតំបន់ទាំងមូលផងដែរ។
លោកឃួង ស្រេង បានមានប្រសាសន៍ថា តាមរយៈសិក្ខាសាលានេះ យើងមិនត្រឹមតែអាចពិនិត្យលើលទ្ធផលការងារជាមោទនៈ ដែលថ្នាក់ដឹកនាំនិងអ្នកចូលរួមទាំងអស់សម្រេចបានប៉ុណ្ណោះទេ ប៉ុន្តែថែមទាំងជាឱសថមួយសម្រាប់ថ្នាក់ដឹកនាំ អង្គភាពជំនាញនិងអ្នកពាក់ព័ន្ធទាំងអស់បានផ្លាស់ប្តូរបច្ចេកទេស វិធីសាស្ត្រថ្មីៗ បទពិសោធន៍និងការអនុវត្តល្អៗ ដើម្បីបង្កើនប្រសិទ្ធភាពថែមទៀតនៃកិច្ចសហប្រតិបត្តិការលើការរៀបចំអភិវឌ្ឍន៍ប៉ែកខាងត្បូងរាជធានីភ្នំពេញ ដូចជាបណ្តាញធារាសាស្ត្រ សំណង់តូចធំ លំហូរចរាចរណ៍និងគម្រោងប្លង់បណ្តាញផ្លូវឲ្យកាន់តែទទួលបានលទ្ធផលល្អប្រសើរក្នុងឆ្នាំខាងមុខ ព្រមទាំងបន្តចូលរួមអនុវត្តន៍លើការអភិវឌ្ឍនគរូបនីយកម្មនិងសំណង់នៅក្នុងរាជធានីភ្នំពេញ កាន់តែស៊ីជម្រៅ ក្នុងការកសាងហេដ្ឋារចនាសម្ព័ន្ធរូបវ័ន្តឲ្យស្រស់បំព្រង ដើម្បីឆ្លើយតបទៅនឹងបរិការណ៍ថ្មី នៃសង្គមសេដ្ឋកិច្ចកម្ពុជានិងបរិការណ៍នៃតំបន់ទាំងមូលផងដែរ។
លោកឃួង ស្រេង បានបន្តថា ការសិក្សានៅតំបន់ប៉ែកខាងត្បូងនិងការសិក្សាតិរវិថីព្រះស៊ីសុវត្ថិ បានបង្ហាញឲ្យឃើញពីការអភិវឌ្ឍយ៉ាងឆាប់រហ័ស ជាពិសេសការប្រែប្រួលដល់ធម្មជាតិក្នុងតំបន់នេះ ដូចជាបណ្តាញធារាសាស្ត្រ នៅតំបន់ប៉ែកខាងត្បូងនិងតិរវិថីព្រះស៊ីសុវត្ថិ មានភាពតូចចង្អៀត ដោយមានការចតយានយន្តគ្មានសណ្តាប់ធ្នាប់ ការលក់ដូរលើចិញ្ចើមផ្លូវនិងផ្លូវទៅកាន់មាត់ទន្លេត្រូវបានរាំងស្ទះដោយសារសកម្មភាពរបស់កំពង់ផែស្វយ័តភ្នំពេញ។ ដើម្បីគ្រប់គ្រងស្ថានភាពខាងលើនេះ រដ្ឋបាលរាជធានីនឹងដាក់ចេញជាយន្តការកែមួយចំនួន ដូចជា យន្តការកែប្រែបឹងមួយចំនួនឲ្យក្លាយជាបឹងធម្មជាតិ ការពារបណ្តាញប្រឡាយ បណ្តាញបង្ហូរទឹកនានានិងដីបម្រុងទុកសម្រាប់សាងសង់ផ្លូវថ្មើជើង សួនច្បារនិងសំណង់សាធារណៈនានា រួមនិងការរៀបចំចិញ្ចើមផ្លូវដើរ ឲ្យមានសណ្តាប់ធ្នាប់ល្អ ភ្ជាប់ជាមួយបណ្តាញរថយន្តក្រុងសាធារណៈ៕ ដោយ ៖ បញ្ញាស័ក្តិ
