ស្វាយរៀង ៖ លោកស្រីកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី រដ្ឋមន្ដ្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចបានថ្លែងយ៉ាងច្បាស់ថា បងប្អូនអតីតយុទ្ធជនព្រមទាំងក្រុមគ្រួសារទាំងអស់នៅទូទាំងប្រទេសបានចូលរួមលះបង់អាយុជីវិតប្ដូរសាច់ស្រស់ឈាមស្រស់ដើម្បីបុព្វហេតុតស៊ូរំដោះជាតិមាតុភូមិអោយរួចផុតពីរបបបនប្រល័យពូជសាសន៍ប៉ុលពតរហូតធ្វើអោយប្រទេសជាតិមានសុខសន្តិភាពនិងការអភិវឍ្ឍន៍ដូចសព្វថ្ងៃនេះ។
លោកស្រីកិត្តិសង្គហបណ្ឌិតបានថ្លែងបែបនេះខណៈដែលលោកស្រីជាតំណាងដ៍ខ្ពង់ខ្ពស់សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាអញ្ជើញចូលរួមក្នុងពិធីជួបសំណេះសំណាល និងបំពាក់មេដាយការពារជាតិជូនអតីតយុទ្ធជនកម្ពុជា ស្រុកស្វាយទាប,ស្រុកកំពង់រោទិ៍ ខេត្តស្វាយរៀងជិត១០០០នាក់នាព្រឹកថ្ងៃទី២៧មេសាឆ្នាំ២០១៨នៅសាលប្រជុំរបស់គណបក្សប្រជាជនកម្ពុជាខេត្តស្វាយរៀង។
លោកស្រីកិត្តិសង្គហបណ្ឌិត បានពាំនាំការផ្ដើមផ្ញើសួរសុខទុក្ខពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណចក្រកម្ពុជា និង សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាប្រធានកាកបាទក្រហមកម្ពុជាជូនដល់អង្គពិធីទាំងមូល ដោយលោកជំទាវបានលើកឡើងអំពីគម្រូវីរភាពរបស់សម្តេចទាំងទ្វេរ ដែលជានិច្ចជាកាល តែងតែគិតគូរដល់សុខទុក្ខអតីតយុទ្ធជនរបស់យើងទាំងអស់គ្នា ដែលឆ្លុះបញ្ចាំងតាមរយះការគិតគូរអំពីរបបសន្ដិសុខសង្គមប្រចាំខែជូនអតីតយុទ្ធជន គិតគូរពីការបាត់បង់សមត្ថភាពការងារ និងពិការភាព និងការគិតគូរអំពីប្រសិទ្ធភាព នៃនីតិវិធីផ្ដល់ប្រាក់របបឧបត្ថម្ភផ្សេងៗឱ្យបានឆាប់រហ័សប្រកបដោយតម្លាភាព សំដៅលើកកំពស់ជីវភាពបងប្អូន អតីតយុទ្ធជនឱ្យកាន់តែល្អប្រសើរឡើង ក៏ដូចជាការលើកទឹកចិត្តដល់អតីតយុទ្ធជនទាំងអស់ ដែលបានចូលរួមចំណែកយ៉ាងសំខាន់ក្នុងការការពារបូរណភាពទឹកដី និងការពារប្រជាជនកម្ពុជា។
ក្នុងពិធីនោះផងដែរក៏មានបំពាក់មេដាយការពារជាតិជូនអតីយុទ្ធជនកម្ពុជាទាំងនេះកាន់តែបង្ហាញច្បាស់ថា រាជរដ្ឋាភិបាលកម្ពុជា ដែលមាន សម្ដេចតេជោ ជានាយករដ្ឋមន្ដ្រី និងប្រធានសមាគមអតីយុទ្ធជនកម្ពុជា មិនដែលបំភ្លេចគុណបំណាច់របស់បងប្អូនអតីតយុទ្ធជនទាំងអស់ដែលបានលះបង់ពេលវេលា សេចក្ដីសុខ សុភមង្គលផ្ទាល់ខ្លួន និងក្រុមគ្រួសារដើម្បីបុព្វហេតុរំដោះជាតិ និងប្រជាជនឱ្យមានសុខសន្ដិភាព និងការអភិវឌ្ឍន៍។ សន្ដិភាពដែលនាំឱ្យកម្ពុជា មានការអភិវឌ្ឍន៍ដូចសព្វថ្ងៃនេះ គឺជាស្នាដៃដ៏ធំធេងរបស់យុទ្ធជនយើង ដែលគុណូបការៈនេះយើងម្នាក់ៗ មិនអាចបំភ្លេចបានទេ ។
សម្រាប់អតីតយុទ្ធជនទាំងអស់ដែលបានមកចូលរួមក្នុងកម្មវិធីនោះ ក៏បានទទួលនូវប្រាក់ឧបត្ថម្ភពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងម្នាក់ៗ ៥ម៉ឺនរៀលផងដែរ ៕ វ៉ៃកូ
