ប៉ូលិសថៃ បានឆ្មក់ចូលក្នុងផ្ទះមួយខ្នងស្ថិតក្នុងស្រុងមឿង ខេត្តផាធំ ថានី (Phathum Thani) និងបានចាប់ជនជាតិមីយ៉ានម៉ាចំនួន ៣នាក់ ដោយរកឃើញស្រាវីស្គីជាច្រើនឡាំងតម្លៃ ១០លានថៃបាត (ជាង ៣១០.០០០ដុល្លាអាមេរិច)។ នេះបើតាមការចុះផ្សាយរបស់ការសែតថៃ Bangkok Post។
ប្រតិបត្តិការឆែកឆេរនេះធ្វើឡើងតាមដីការរបស់ស្ថាប័នកម្មសិទ្ធបញ្ញាមជ្ឈិម (Central Intellectual Property) និងតុលាការ ពាណិជ្ជកម្មអន្តរជាតិ។ ប៉ូលិសថៃបានរឹបអូសស្រាក្លែងក្លាយចំនួន ២០០ឡាំង ដែលមានស្លាកសញ្ញាឈ្មោះជាច្រើនប្រភេទ និងចំនួន ១.០០០ដប ដោយមិនទាន់បិទស្លាកឈ្មោះ។
ជនជាតិមីយ៉ានម៉ាទាំងនោះមានឈ្មោះ Kuanou អាយុ ២៣ឆ្នាំ Leng អាយុ ២៣ឆ្នាំ និងម្នាក់ទៀតឈ្មោះ Pae អាយុ ២១ឆ្នាំ។ អ្នកទាំង ៣ ត្រូវបានចាប់ខ្លួន និងចោទប្រកាន់ពីបទរក្សាទុកផលិតផលដែលមានស្លាកសញ្ញាពាជិណ្ជកម្មក្លែងក្លាយ ក្នុងគោលបំណងធ្វើពាណិជ្ជកម្ម។
ជនទាំង ៣នេះ អាចប្រឈមនឹងការជាប់គុករយៈពេល ៥ឆ្នាំ ឬត្រូវពិន័យជាប្រាក់គុណនឹង ៤ លើតម្លៃផលិតផលពិត។
ប៉ូលិសថៃម្នាក់ឈ្មោះ Surachet បានបញ្ជាក់ថា ស្រាវីស្គីទាំងនោះ គេមានបំណងដាក់លក់អនឡាយ ឬលក់ទៅឲ្យភោជនីយដ្ឋាន៕ សុភ័ក្ត្រ
