ស្វាយរៀង ៖ លោកនាយឧត្តមសេនីយ៍ប៉ែនវិបុលអគ្គស្នងការរងនគរបាលជាតិជាប្រធាននាយដ្ឋានបុគ្គលិកតំណាងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញប្រកាសផ្ទេរភារកិច្ចតែងតាំងមុខតំណែង បំពាក់ឋានន្តរស័ក្កិ គ្រឿងឥស្សរយសនិងប្រគល់ប័ណ្ណសរសើរ លិខិតសរសើរជូនមន្ត្រីនគរបាលជាតិនៃស្នងការនគរបាលខេត្តស្វាយរៀង នៅព្រឹកថ្ងៃទី២៧ ខែមេសា ឆ្នាំ២០១៨។
ក្នុងនោះស្នងការរង៣រូប ត្រូវបានប្រកាសអោយចូលនិវត្តន៍ និងប្រកាសស្នងការរង៤រូបឲ្យចូលកាន់មុខតំណែងផងដែរ។
នាយឧត្តមសេនីយ៍ ប៉ែន វិបុល បានថ្លែងនូវការផ្តាំផ្ញើសាកសួរសុខពីសំណាក់សម្តេចក្រឡាហោមស ខេងរដ្ឋមន្ត្រីក្រសួងមហាផ្ទៃនិងនាយឧត្តមសេនីយ៍សន្តិបណ្ឌិតនេតសាវឿនអគ្គស្នងការនគរបាលជាតិជូនមន្ត្រីនគរបាលទាំងអស់នៅខេត្តស្វាយរៀង។
លោកនាយឧត្តមសេនីយ៍បានថ្លែងបន្តទៀតថាៈជាការធម្មតាទេសំរាប់មន្ត្រីនគរបាលជាតិយើងដែលដល់អាយុដាក់អោយចូលនិវត្តន៍នោះគឺដើម្បីដាក់អោយមន្ត្រីនគរបាលជំនាន់ក្រោយកាន់នូវមុខតំណែងបើទោះបីជាមន្ត្រីនគរបាលចូលនិវត្តន៍ក៏ពិតមែនតែរាជរដ្ឋាភិបាលនៅតែគិតគូរជានិច្ចចំពោះជីវភាពរស់នៅមិនអោយមន្ត្រីចូលនិវត្តន៍ណាម្នាក់ឯកោនោះទេ។
ចំណែកមន្ត្រីនគរបាលដែលចូលកាន់មុខតំណែងថ្មីត្រូវតែខិតខំយកចិត្តទុកដាក់បំពេញការងារអោយបានល្អប្រសើរបន្ថែមទៀតនិងទទួលយកបទពិសោធន៍ល្អៗពីរៀមច្បងដែលចូលនិវត្តមកអនុវត្តន៍ការងារផងដែរ។
សូមបញ្ជាក់ថា ៖ ស្នងការរងនៃស្នងការដ្ឋាននគរបាលខេត្តស្វាយរៀងដែលដាក់អោយចូលនិវត្តន៍នោះមានចំនួនបីរូបគឺ ៖ មានទី១.លោកឧត្តមសេនីយ៍ត្រី ណុប គឹមហេង ទី២.ឧត្តមសេនីយ៍ត្រី ហែម សាបាន ទី៣.ឧត្តមសេនីយ៍ត្រី ឡឹក ចំរើន។ ចំណែកនាយនគរបាលដែលត្រូវប្រកាសជាស្នងការរងនៃស្នងការដ្ឋាននគរបាលខេត្តស្វាយរៀងថ្មី ទី១ លោកវរៈសេនីយ៍ឯក កែវ សុថា ទី ២លោកវរៈសេនីយ៍ទោ ម៉ែន កល្យាណ ទី៣.វរៈសេនីយ៍ត្រី ហូ សុងរចនា និងទី៤.លោកឧត្តមសេនីយ៍ត្រីប្រាក់ សុជាតិ ៕ វ៉ៃកូ