វេជ្ជបណ្ឌិតនៅឥណ្ឌាត្រូវបានមន្ទីរពេទ្យបណ្តេញចេញបន្ទាប់ពីធ្វើការវះកាត់ជើង ច្រឡំអ្នកជំងឺ ។
តាម Asiaone វេជ្ជបណ្ឌិតរូបនេះ បានចោះរន្ធនៅឆ្អឹងជើងខាងស្តាំរបស់អ្នកជំងឺ ឈ្មោះ Vijendra Tyagi រួចចាប់ខ្ចៅទៅលើឆ្អឹង ទើបដឹងថាខ្លួនបានវះកាត់ច្រឡំអ្នកជំងឺ ។ តាមនោះលោក Tyagi បានចូលមន្ទីរពេទ្យបានរងរបួសនៅក្បាលក្នុងគ្រោះថ្នាក់ចរាចរណ៍រថយន្តមួយកាលពីសប្តាហ៍មុន ។ វេជ្ជបណ្ឌិតរូបនេះបានច្រឡំរូបលោកជាមួយអ្នកជំងឺដែលបាក់ជើងតម្រូវឲ្យវះកាត់ដើម្បីព្យាបាលស្នាមប្រេះឆ្អឹងជើង ដែលលោក Tyagi ពុំមានរបួសអ្វីបន្តិចសោះនៅជើង ។
នាយកមន្ទីរពេទ្យ Ajay Bahi និាយប្រាប់ AFP ថា អ្នកជំងឺត្រូវបានចាក់ថ្នាំសន្លប់ ហេតុនេះពុំអាចជំទាស់នឹងការភ័ន្តច្រឡំបែបនេះបានឡើយ ។ ឈ្មោះរបស់វេជ្ជបណ្ឌិតដែលបានវះកាត់អ្នកជំងឺច្រឡំពុំត្រូវបានគេទម្លាយប្រាប់ឡើយ ដោយគ្រាន់តែនិយាយថា វេជ្ជបណ្ឌិតរូបនេះបានដឹងខុស ហើយសុំទោស ប៉ុន្តែមន្ទីរពេទ្យពុំអាចលើកលែង ព្រោះកំហុសឆ្គងធ្ងន់ធ្ងរបែបនេះឡើយ ។ គេបានបញ្ឈប់ការងារ ចំណែកលោក Tyagi វិញ ទើបតែត្រូវបានចាកចេញពីមន្ទីរពេទ្យ ព្រោះការស្វានរន្ធនៅជើង បង្ខំឲ្យលោកបន្តសម្រាកបន្ថែម១សប្តាហ៍ទៀត។
ទង្វើគ្មានការទទួលខុសត្រូវបែបនេះ ពុំមែនជារឿងកម្រឡើយ នៅឥណ្ឌា ហើយពេលខ្លះបានបណ្តាលឲ្យអ្នកជំងឺស្លាប់ ជាអាទិ៍កាលពីសប្តាហ៍មុនវេជ្ជបណ្ឌិត ២រូប ត្រូវបានចាប់ខ្លួន ក្រោយពីគេរកឃើញថា អ្នកទាំងពីរបានធ្វើរោគវិនិច្ឆ័យខុសចំពោះអ្នកជំងឺម្នាក់ អាយុ ៥១ឆ្នាំ ដែលមានសម្ពាធឈាមខ្ពស់ ។ កំហុសនេះបានធ្វើឲ្យអ្នកជំងឺគាំងបេះដូង បន្ទាប់មកក៏ស្លាប់បាត់ទៅ ។ លើសពីនេះទៀត នៅសប្តាហ៍មុនដដែល មានស្ត្រីវ័យ ៣០ឆ្នាំម្នាក់ បានកើតរោគឈឺពោះ ហើយត្រូវគេបញ្ជូនច្រឡំទៅកាន់កន្លែងលាងឈាម ។ ក្រោយពេលដឹងថា មានការភ័ន្តច្រឡំ វេជ្ជបណ្ឌិតព្យាបាលប្រឹងប្រែងផ្លាស់ប្តូរឯកសារប៉ងលាក់បាំងកំហុសឆ្គងខ្លួន ប៉ុន្តែបានគេរកឃើញហើយបញ្ឈប់ពីការងារ ៕ សូយន
