វីដេអូមួយដែលថតដោយអ្នកដើរផ្សារ បានបង្ហាញឲ្យឃើញស្ត្រីអ្នកមានចិត្តឆេវឆាវម្នាក់ បានស្រែកដាក់អ្នកលក់គ្រឿងអលង្ការ និងបន្ទាប់មក បានដកលុយពីក្នុងកាបូប គប់ទៅលើផ្ទៃមុខរបស់នាងទាំងដុំៗ ដោយគ្មានញញើតដៃ និងកោតខ្លាចនរណាម្នាក់ឡើយ ។ ដែលទង្វើដ៏កោងកាចរបស់នាង បានធ្វើឲ្យគេរិះគន់យ៉ាងខ្លាំងតែម្តង ។
បើតាមប្រភពព័ត៌មានបានឲ្យដឹងថា មុនពេលកើតហេតុ ស្ត្រីអ្នកមានរូបនោះ ចង់មើលខ្សែក១ខ្សែ ប៉ុន្តែ នារីអ្នកលក់ត្រូវធ្វើតាមច្បាប់របស់ហាង ដែលមិនអនុញ្ញាតឲ្យដកគ្រឿងអលង្ការចេញពីក្នុងទូកញ្ចក់ទេ ព្រោះវាអាចប្រឈមការលួចឆក់ ។ ហេតុការណ៍នេះត្រូវបានដឹងថាបានកើតឡើងនៅក្នុងទី២៥ ខែកញ្ញា ស្ថិតនៅហាងគ្រឿងអលង្ការមួយកន្លែង នៅក្នុងខេត្ត Handan ភាគឦសាន្តនៃប្រទេសចិន ។
គេបានជឿជាក់ថា ស្ត្រីអតិថិជននេះមិនយល់អំពីក្បួនច្បាប់របស់ហាង ហេតុនេះ នាងក៏ផ្ទុះកំហឹង និងចាប់ផ្តើមស្រែកអ្នកនារីអ្នកលក់ដោយនិយាយថា៖ «នាងស្មានថាខ្ញុំអត់លុយទិញវាមែនទេ?» ហើយស្ត្រីនេះក៏ត្រូវបានលឺនិយាយទៀតថា៖ «តើនាងដឹងថាឪពុកខ្ញុំគាត់ជាអ្នកណាទេ?» ។
ទោះយ៉ាងណា នារីអ្នកលក់រងគ្រោះនៅតែរក្សាភាពស្ងប់ស្ងាត់ និងញញឹមជំនួសភាពអាម៉ាសនេះ ។ ប៉ុន្តែ ឥរិយាបទដ៏កោងកាចរបស់ស្ត្រីអ្នកមានរូបនេះ បានធ្វើឲ្យទើសទាល់ដល់អតិថិជនស្រីម្នាក់ទៀត ចូលមកអន្តរាគមន៍ ។
ទន្ទឹមនោះផងដែរ អ្នកលេងអ៊ីនធើរណេតជាច្រើន បានជជីកសួរថា តើឪពុករបស់ស្ត្រីរូបនេះជានរណា បានជានាងនេះខ្លាំងដៃម្លេះ? ប៉ុន្តែ ព័ត៌មានទាក់ទងនឹងស្ត្រីបញ្ចេញកំហឹងនេះពុំត្រូវបានបង្ហាញឲ្យដឹងនោះទេ ៕ ចន្ទី