ភ្នំពេញ៖ ខុទ្ទកាល័យ សម្តេចអគ្គមហាពញាចក្រី ហេង សំរិន ប្រធានរដ្ឋសភាថ្ងៃសុក្រ ទី២៧ ខែមេសា ឆ្នាំ២០១៨។ សេចក្តីប្រកាសព័ត៌មាន ប្រកាសថ្កោលទោស និងបដិសេធ ចំពោះសកម្មភាពរបស់ឈ្មោះ អាំ ផល្លីន និងឈ្មោះ ហ៊ាង គន្ធី អតីតទីប្រឹក្សាសម្តេច ហេង សំរិន ដែលបានយកឈ្មោះថ្នាក់ដឹកនាំទៅប្រើប្រាស់ ក្នុងគ្រប់ទង្វើទុច្ចរិតទាំងឡាយ ដែលនាំឲ្យប៉ះពាល់កិត្តិយសថ្នាក់ដឹកនាំ។
សេចក្តីប្រកាសព័ត៌មាន បានបញ្ជាក់ថា “ខុទ្ទកាល័យសូមប្រកាសថ្កោលទោស និងបដិសេធ ចំពោះសកម្មភាពរបស់ឈ្មោះ អាំ ផល្លីន និងឈ្មោះ ហ៊ាង គន្ធី ដែលបានយកឈ្មោះថ្នាក់ដឹកនាំទៅប្រើប្រាស់ ក្នុងគ្រប់ទង្វើទុច្ចរិតទាំងឡាយ ដែលនាំឲ្យប៉ះពាល់កិត្តិយសថ្នាក់ដឹកនាំ និងសូមអំពាវនាវដល់អាជ្ញាធរមានសមត្ថកិច្ច មេត្តាចាត់វិធានការតាមផ្លូវច្បាប់ជាធរមាន ឲ្យបានតឹងរ៉ឹងបំផុត”។
ក្រោយខុទ្ទកាល័យសម្តេចពញាចក្រី ហេង សំរិន ចេញសេចក្តីប្រកាសពីអ្នកយកឈ្មោះថ្នាក់ដឹកនាំទៅប្រើនោះ លោក អាំ ផល្លីន និងភរិយា ហ៊ាង គន្ធា នៅល្ងាចថ្ងៃទី២៧ ខែមេសា ឆ្នាំ២០១៨នេះ បានចេញមុខអះអាងថា ចាប់តាំងពីរូបលោក និងភរិយា បានលាឈប់ទីប្រឹក្សាសម្ដេចពញាចក្រី ហេង សំរិន ប្រធានរដ្ឋសភា រហូតមកដល់ពេលនេះ មិនដែលយកងារ ជាទីប្រឹក្សានោះ ទៅប្រើប្រាស់ ឬគំរាមកំហែងប្រជាពលរដ្ឋស្លូតត្រង់ម្ដងណានោះឡើយ។
លោក អាំ ផល្លីន និងភរិយា បញ្ជាក់ទៀតថា លោក និងក្រុមគ្រួសារ បានទៅទិញដីពីប្រជាពលរដ្ឋ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត គ្រាន់តែដើម្បីធ្វើកសិកម្មជាលក្ខណៈគ្រូសារតែប៉ុណ្ណោះ ហើយការធ្វើកសិកម្មជាមួយប្រជាពលរដ្ឋនៅក្នុងមូលដ្ឋាននោះ ក៏គ្មានទំនាស់អ្វីកើតឡើងទេ ម្យ៉ាងមានការសហការ និងមានការគាំទ្រពីអាជ្ញាធរគ្រប់ជាន់ថ្នាក់ ព្រមទាំងសមត្ថកិច្ចនានាផងដែរ។
សូមជម្រាបថា ការចេញមុខបកស្រាយបែបនេះ បន្ទាប់ពីខុទ្ទកាល័យសម្តេច ហេង សំរិន ប្រធានរដ្ឋសភាកម្ពុជា នៅថ្ងៃទី២៧ ខែមេសា ឆ្នាំ២០១៨នេះ បានចេញសេចក្តីប្រកាសមួយ ដោយស្នើឲ្យសម្ថកិច្ចចាត់ការតាមផ្លូវច្បាប់លើ លោក អាំ ផល្លីន និងលោកស្រី ហ៊ាង គន្ធី ដែលបានយកឈ្មោះថ្នាក់ដឹកនាំ ទៅប្រើប្រាស់។
លោក អាំ ផល្លីន និងលោកស្រី ហ៊ាង គន្ធា ដែលតែងតែដើរប្រាប់មហាជនថា ខ្លួនជាទីប្រឹក្សា របស់សម្តេចអគ្គមហាពញាចក្រី ហេង សំរិន ប្រធានរដ្ឋភាជាតិនោះ។
សូមរំលឹកថា កាលពីថ្ងៃទី២១ ខែមេសា ឆ្នាំ២០១៨ កន្លងទៅនេះ លោក អាំ ផល្លីន និងអ្នកស្រី ហ៊ាង គន្ធី ដែលអួតខ្លួនជាទីប្រឹក្សាសម្តេចពញាចក្រី ហេង សំរិន បានជួលកម្មករប្រមាណជាង ២០នាក់ ទៅកាប់បំផ្លាញផលដំណាំប្រជាពលរដ្ឋ ស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។ ចំពោះដំណាំដែលបានក្រុមលោក អាំ ផល្លីន និងប្រពន្ធកាប់បំផ្លាញមានដូចជា ស្វាយ ខ្នុរ និងចេកអស់ជាច្រើនដើម និងវាយបំផ្លាញឡដុតធ្យូងដែលពលរដ្ឋប្រកបរបរចិញ្ចឹមជីវិត ព្រមទាំងដុតបំផ្លាញផ្ទះស្បូវមួយខ្នងទៀតផង។
បន្ទាប់ពីមានរឿងអាស្រូវទំនាស់ដីធ្លី ជាមួយប្រជាពលរដ្ឋ ក្នុងតំបន់ខាងលើ ពលរដ្ឋបានប្តឹងទៅកាន់អាជ្ញាធរគ្រប់លំដាប់ថា្នក់នៅខេត្តកំពត ដើម្បីជូយអន្តរាគមដោះស្រាយ ប៉ុន្តែហាក់គ្មាមលទ្ធផលអ្វីទាល់តែសោះរហូតធ្លាយរឿងរ៉ាវថា ឈ្មោះ អាំ ផល្លីន និងលោកស្រី ហ៊ាង គន្ធា បានយកឈ្មោះថ្នាក់ដឹកនាំទៅប្រើប្រាស់ ក្នុងអំពើទុច្ចរិតទើប ខុទ្ទកាល័យសម្តេចអគ្គមហាពញាចក្រី ហេង សំរិន ប្រធានរដ្ឋភា ចេញសេចក្តីប្រកាសព័ត៌មានបដិសេធ និងស្នើសុំដល់អាជ្ញាធរមានវិធានការផ្លូវលើបុគ្គលខិលខូចទាំងនេះឲ្យបានតឹងរឹងបំផុត។
តាមប្រភពព័ត៌មាន អ្នកធ្លាប់ស្គាល់លោក អាំ ផល្លីន បានប្រាប់ថា លោក អាំ ផល្លីន ពីមុខជាមន្ត្រីយោធាភូមិភាគ៣ ដែលមានមូលដ្ឋានក្នុងក្រុងច្បារមន ខេត្តកំពង់ស្ពឺ។ បន្ទាប់មកលោកមានទំនាក់សេហ្នាជាមួយលោកស្រី ហ៊ាន គន្ធា រួមបានក្លាយជាប្តី-ប្រពន្ធគ្នា កាលនោះបុគ្គលនេះដើរអួតខ្លួនប្រាប់មិត្តភក្តិ ព្រមទាំងអ្នកធ្លាប់ស្គាល់ខ្លួនមានងារជាឯកឧត្តមទីប្រឹក្សាសម្តេច ហេង សំរិន រួមមកបានផ្ទេរចេញពីភូមិភាគ៣។ ក្រោយមកទៀតស្រាប់តែលោក អាំ ផល្លីន មានដីធ្លីនៅស្រុកឈូក ខេត្តកំពត និងក្លាយខ្លួនជាម្ចាស់រមណីយដ្ឋានទឹកធម្មជាតិមួយដែលមានឈ្មោះថា អន្លុងក្មេងលេង ព្រំប្រទល់ខេត្តកពង់ស្ពឺ និងកំពត ម្តុំតំបន់អភិវឌ្ឍន៍យោធិនពិការ ៣១៧។
ពលរដ្ឋនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត អះអាងថា ទីប្រឹក្សាសម្តេច ហេង សំរិននិងបក្ខពួក បានបន្តគំរាមកំហែង និងបំផ្លិចបំផ្លាញដំណាំ និងផ្ទះសម្បែងរបស់ពួកគាត់ ដោយគ្មានការជួយអន្តរាគមន៍ពីសំណាក់អាជ្ញាធរមូលដ្ឋាននៅទីនោះឡើយ។ បញ្ហានេះបានរុញច្រានពួកគាត់ ឱ្យបង្ខំចិត្តគេចខ្លួនចេញពីដីដែលធ្លាប់កាន់កាប់ ដើម្បីរកកន្លែងមានសុវត្ថិភាព។
ករណីទំនាស់ដីធ្លីរវាងពលរដ្ឋភូមិព្រៃពាយ និងក្រុមលោក អាំ ផល្លីន ដែលតាំងខ្លួនជាទីប្រឹក្សាផ្ទាល់របស់សម្តេច ហេង សំរិន គឺជាទំនាស់ ដ៏រ៉ាំរ៉ៃដែលអូសបន្លាយពេលជាច្រើនឆ្នាំមកហើយ។ ជាញឹកញាប់ ក្រុមលោក អាំ ផល្លីន តែងតែប្រើអំពើហិង្សា ដុតបំផ្លាញផ្
ទះសម្បែង និងកាប់បំផ្លាញផលដំណាំពលរដ្ឋ ដោយគ្មានការចេញមុខធ្វើអន្តរាគមន៍ពីសំណាក់អាជ្ញាធរពាក់ព័ន្ធឡើយ បើទោះបីជាក្រុមពលរដ្ឋបានស្វះស្វែងរកអន្តរាគមន៍ទៅក្រុមអាជ្ញាធរ បូករួមទាំងស្ថាប័នតុលាការខេត្តកំពតយ៉ាងណាក្តី។ ផ្ទុយទៅវិញ ពលរដ្ឋមួយចំនួនបែរជារងការប្ដឹងបកពីក្រុមឈ្មួញដីទាំងនោះទៅវិញ ខណៈពួកគាត់គឺជាជនរងគ្រោះនៃអំពើហិង្សានោះ៕ ដោយ ៖ បញ្ញាស័ក្តិ
