ភ្នំពេញ ៖ លុយ ៣ម៉ឺនដុល្លារនឹងទ្រព្យសម្បត្តិមានតម្លៃជាច្រើនត្រូវជនសង្ស័យចាក់ចូលបន្ទប់លួចយកទៅបាត់ដោយសុវត្ថិភាព ថ្ងៃទី២៧ ខែមេសា ឆ្នាំ២០១៨ វេលាម៉ោង៥និង៣០នាទីព្រឹក ត្រង់ចំណុចផ្ទះលេខ៤២ ផ្លូវបេតុងព្រៃស ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។
លោកឈឹម ប៊ុនរ័ត្ន អធិការ អធិការរងខណ្ឌដង្កោបានឲ្យដឹងថាជនរងគ្រោះឈ្មោះ ចេង ផាន់ ហៅ រ៉ា ភេទប្រុស អាយុ៤៥ឆ្នាំ មុខរបរយោធា មានទីលំនៅផ្ទះលេខ៤២ ផ្លូវបេតុងព្រៃស ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
សម្ភារៈបាត់បង់៖ លុយដុល្លារចំនួន៣៨.០០០ដុល្លារ, លុយខ្មែរចំនួន៤០០.០០០រៀល, ទូរស័ព្ទដៃម៉ាកIphone 6S មួយគ្រឿង, ចិញ្ចៀនពេជ្រ៦វង់ តម្លៃ៣០.០០០ដុល្លារ, នាឡិកាពេជ្រមួយ តម្លៃ៦.០០០ដុល្លារ, ខ្សែផ្លាកទីន៥ឈុតចំនួន១០០.០០០ដុល្លារ, កាតគ្រីម៉ូតូ, កាតគ្រីរថយន្ត, ប្លង់ដី, សៀវភៅធនាគារ, កាតអេធីអឹម និង ឯកសារផ្សេងៗមួយចំនួនទៀត។
លោកអធិការរងបន្តថា កាលពីថ្ងៃទី២៧ ខែមេសា ឆ្នាំ២០១៨ ជនរងគ្រោះ បានរៀបចំមង្គលការកូន នៅផ្ទះលេខ៤២ ផ្លូវបេតុងព្រៃស ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។ លុះដល់វេលាម៉ោង០០និង១៥នាទី ឈានចូលថ្ងៃទី២៧ ខែមេសា ឆ្នាំ២០១៨ កម្មវិធីមង្គលការបានបញ្ចប់ រួចជនរងគ្រោះ និងប្រពន្ធ បានឡើងទៅលើឡៅតឿ រៀបចំងូតទឹក ហើយបានទុកលុយ និងសម្ភារៈខាងលើ មួយចំនួនបានទុកក្នុងទូដែកក្រោមតុ និងមួយចំនួនទៀត ទុកនៅលើតុក្នុងបន្ទប់ រួចជនរងគ្រោះនិងប្រពន្ធបានចាក់គន្លឹះទ្វារចូលដេកលង់លក់ រហូតដល់វេលាម៉ោង៥និង ៣០នាទី ថ្ងៃខែឆ្នាំដដែល ស្រាប់តែឮសំឡេងស្រែកឆោឡោថា បាត់កាបូបលុយ រួចជនរងគ្រោះភ្ញាក់ឡើងមើលក្នុងបន្ទប់ ស្រាប់តែបាត់ទូដែក និងសម្ភារៈលើតុខាងលើទាំងអស់ ។ បន្ទាប់មក ជនរងគ្រោះក៏បានចេញពីបន្ទប់ដើរមើលតាមបន្ទប់ផ្សេងទៀត បានឃើញមានសភាពរើកកាយ រួចជនរងគ្រោះ ក៏បានទូរស័ព្ទរាយការណ៍ប្រាប់សមត្ថកិច្ចប៉ុស្តិ៍នគរបាលរដ្ឋបាលព្រៃសអោយជួយអន្តរាគមន៍ សមត្ថកិច្ចយើងក៏បានចុះទៅដល់កន្លែងកើតហេតុភ្លាមៗ រួចបានរាយការណ៍ទៅការិយាល័យបច្ចេកទេស នៃស្នងការដ្ឋាននគរបាលរាជធានីភ្នំពេញ ដើម្បីចុះមកធ្វើកោសល្យវិច័យស្នាមក្រយ៉ៅដៃនៅកន្លែងកើតហេតុ និងបានរាយការណ៍ទៅការិយាល័យព្រហ្មទណ្ឌកម្រិតធ្ងន់ និងស្រាល នៃស្នងការដ្ឋាននគរបាលរាជធានីភ្នំពេញ ចុះមកសហការជួយធ្វើការស្រាវជ្រាវបន្ត។ បច្ចុប្បន្នកម្លាំងសមត្ថកិច្ចកំពុងស្វែងរកចាប់ខ្លួនជនល្មើសយកមកផ្តន្ទាទោសតាមផ្លូវច្បាប់ ៕ ដោយ៖បញ្ញាស័ក្តិ