ភ្នំពេញ ៖ ឧត្តមសេនីយ៍ឯក លឹម សុខារស្មីបានអះអាងថា វិស័យសន្តិសុខឯកជន គឺជាវិស័យដ៏សំខាន់មួយដែលត្រូវចូលរួមចំណែកយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ ទ្រព្យសម្បត្តិ សុវត្ថិភាព អាយុជីវិត ជូនប្រជាពលរដ្ឋអ្នកវិនិយោគ ភ្ញៀវទេសចរជាតិ អន្តរជាតិ ហើយមិនតែប៉ុណ្ណោះពួកគេ មានតួនាទីជាកម្លាំងជំនួយ ដ៏សំខាន់ដល់អាជ្ញាធរមានសមត្ថកិច្ច ខណៈកងកម្លាំងសមត្ថកិច្ចមិនបានដាក់គ្រប់ទីកន្លែង ។
ក្នុងកម្មវិធី បិទវគ្គបណ្តុះបណ្តាលបំប៉នជំនាញភ្នាក់ងារសន្តិសុខឯកជន លើកទី៣ នៅថ្ងៃទី២៧ ខែមេសា ឆ្នាំ២០១៨នេះ លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិឯកជន នៃអគ្គស្នងការដ្ឋាននគរបាលជាតិ បានថ្លែងថា ក្រុមហ៊ុនសន្តិសុខទាំងអស់ ត្រូវតែជ្រាប់គ្រប់គ្នាថា សន្តិសុខឯកជនពុំមែនមានតួរនាទីត្រឹមតែជាអ្នកការពារ ទ្រព្យសម្បត្តិឯកជន ឬក៏សហគ្រាសគ្រឹះស្ថានឯកជនប៉ុណ្ណោះទេ តែក៏មានកាតព្វកិច្ចចូលរួមការពារសាធារណៈសន្តិសុខ សង្គម និងអាយុជីវិត របស់ប្រជាពលរដ្ឋផងដែរ ជាពិសេសមានតួនាទីជាកម្លាំងជំនួយដ៏សំខាន់ ដល់អាជ្ញាធរមានសមត្ថកិច្ច ។
លោកឧត្តមសេនីយ៍ឯកប្រធាននាយកដ្ឋានគ្រប់គ្រងសន្ដិឯកជន បានបន្តទៀតថា ប្រទេសកម្ពុជាមានការអភិវឌ្ឍន៍លើគ្រប់វិស័យ ក្រោមការដឹកនាំរបស់ សម្ដេចតេជោ ហ៊ុន សែន ធ្វើឲ្យប្រទេសជាតិយើង ទទួលបានសុខសន្តិភាពស្ថេរភាពសង្គម ។ ហេតុនេះបានធ្វើឲ្យទាក់ទាញអ្នកវិនិយោគជាច្រើន មកបណ្តាក់ទន់ស្ទើរគ្រប់វិស័យ ក្នុងនោះវិស័យសន្តិសុខឯកជន គឺជាវិស័យដ៏សំខាន់មួយដែលត្រូវចូលរួមចំណែកយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ ទ្រព្យសម្បត្តិ សុវត្ថិភាព អាយុជីវិត ជូនប្រជាពលរដ្ឋអ្នកវិនិយោគ ភ្ញៀវទេសចរជាតិ អន្តរជាតិផង ។ ហេតុដូច្នេះហើយទើបរាជរដ្ឋាភិបាលជាពិសេសក្រសួងមហាផ្ទៃ តែងតែយកចិត្តទុកដាក់ជំរុញ និងលើកទឹកចិត្តដល់វិស័យសន្តិសុខឯកជន នៅក្នុងប្រទេសកម្ពុជា ឲ្យទទួលបានទំនុកចិត្តក្នុងការប្រកបអាជីវកម្មរបស់ខ្លួន ដោយសុខស្ថេរភាព និងនិត្យានុកូលភាព។ ដោយយោងតាមស្មារតីសេចក្តីណែនាំ របស់ក្រសួងមហាផ្ទៃ និងពិនិត្យឃើញថា ភ្នាក់ងារសន្តិសុខឯកជន បានចូលរួមចំណែកយ៉ាងសកម្ម ក្នុងការថែរក្សាសន្តិសុខសណ្តាប់ធ្នាប់ ទ្រព្យសម្បត្តិសុវត្ថិភាព អាយុជីវិត ជូនប្រជាពករដ្ឋ អ្នកវិនិយោគភ្ញៀវទេសចរជាតិ អន្តរជាតិ។
លោកបន្តថា “ការបើកវគ្គបណ្តុះបណ្តាលនេះ គឺមិនមែនមើលងាយសមត្ថភាពដល់បងប្អូន ដែលជាសន្តិសុខឯកជននោះទេ គឺធ្វើឡើងដើម្បីបង្កើនសមត្ថភាពដល់ពួកគេ បន្ថែមទៀតទាំងជំនាញការពារ និងគ្រប់គ្រងស្ថានភាពផ្សេងដែលកើតឡើង ដោយយកថាហេតុណាមួយ” ៕ ដោយ៖បញ្ញាស័ក្តិ
