ភ្នំពេញ៖ កម្លាំងមូលដ្ឋានអាវុធហត្ថខណ្ឌទួលគោកបានឃាត់ខ្លួន ក្មេងប្រុសអនិតិជន(ក្មេងមិនទាន់គ្រប់អាយុ) ៣នាក់ ពាក់ព័ន្ធករណីគ្រឿងញៀន រួម និងដកហូតបានក្រាមពណ៌សថ្លា ៧០កញ្ចប់(ប្រភេទម៉ាទឹកកក) ដែលត្រូវបានជនអគតិមួយចំនួន បានប្រើឲ្យរូបគេ លក់គ្រឿងញៀន ដើម្បីបំភាន់ភ្នែកពីសមត្ថកិច្ច យកលុយមកខ្លួន ដែលធ្វើឲ្យប៉ះពាល់យ៉ាងខ្លាំងដល់អនាគតរបស់ក្មេងៗ។
អាវុធហត្ថរាជធានីភ្នំពេញ បានបញ្ជាក់ថា ក្មេងៗ ទាំង ៣នាក់ នេះ ត្រូវបានកម្លាំងល្បាតអាវុធហត្ថខណ្ឌទួលគោក នៅវេលាម៉ោង១១:៥០នាទី ថ្ងៃទី២៧ ខែមេសា ឆ្នាំ២០១៨ ឃាត់ខ្លួនបាន នៅចំណុច ប្លុករោងចក្រឆ្នាំង ភូមិ២៣ ផ្លូវរថភ្លើង សង្កាត់បឹងកក់២ ខណ្ឌទួលគោក រាជធានីភ្នំពេញ និងបញ្ជូនមកទីបញ្ជាការដ្ឋាន កងរាជអាវុធហត្ថរាជធានីភ្នំពេញ ធ្វើការសួរនាំ ហើយបានប្រគល់រូបគេទាំង ៣នាក់ ទៅឲ្យមន្ទីរសង្គមកិច្ចជាអ្នកគ្រប់គ្រងវិញ។ ពួកគេទាំង ៣នាក់ មាន៖ ឈ្មោះ ទ្រី ឆាត ភេទប្រុស អាយុ ១២ឆ្នាំ ឈ្មោះ ទ្រី ណាត ភេទប្រុស អាយុ ១០ឆ្នាំ ឈ្មោះ ស្រ៊ុន វិត ភេទប្រុស អាយុ ១២ឆ្នាំ៕ ដោយ៖បញ្ញាស័ក្តិ