រាជធានីភ្នំពេញ ៖ នៅដំណាក់កាលនគរបាលព្រហ្មទណ្ឌ ថៅកែខុនដូ លោកឧត្តមសេនីយ៍ត្រី ប៉ិច តុងហេង ដែលបានវាយកម្មកររើសអេតចាយបណ្តាលឲ្យរយះក្បាល បានសងជំងឺចិត្តទៅជនរងគ្រោះ ជាអ្នករើសអេតចាយចំនួន ៤.០០០ដុល្លារអាមេរិករួចទៅហើយ តាមពាក្យបណ្តឹងរបស់ជនរងគ្រោះ។ នគរបាលព្រហ្មទណ្ឌ បានបញ្ជាក់ថា នេះគ្រាន់តែជាសំណងរដ្ឋប្បវេណីទេ លោក ប៉ិច តុងហេង នៅជាប់បណ្តឹងអាជ្ញាមួយទៀត ដូច្នោះហើយបានជានគរបាលនាំខ្លួនលោក ប៉ិច តុងហេង ទៅតុលាការ ដើម្បីបំពេញតាមនីតិវិធី។
ករណីថៅកែខុនដូ លោកឧត្តមសេនីយ៍ត្រី ប៉ិច តុងហេង វាយកម្មកររើសអេតចាយ កាលពីវេលាម៉ោង១០ព្រឹក ថ្ងៃទី២៧ មេសា ២០១៨ បានចូលសារភាពនៅស្នងការដ្ឋាននគរបាលរាជធានីភ្នំពេញ។ ក្រោយពីចូលសារភាព នៅវេលាម៉ោងជាង៥ល្ងាចថ្ងៃដដែលនេះ កម្លាំងសមត្ថកិច្ចនគរបាលព្រហ្មទណ្ឌកម្រិតស្រាល បានបញ្ជូនខ្លួនលោក ប៉ិច តុងហេង ទៅកាន់សាលាដំបូងរាជធានីភ្នំពេញ។
នៅសាលាដំបូងរាជធានីភ្នំពេញ លោក ប៉ិច តុងហេង គ្រាន់តែត្រូវបានមន្ត្រីរដ្ឋបាលសាលាដំបូងថតរូបទុកជាឯកសារតែប៉ុណ្ណោះទេ។ សំណុំរឿងនេះមិនទាន់បានចាត់ការតាមរបៀបណានៅឡើយ ។ នគរបាលព្រហ្មទណ្ឌក៏បាននាំខ្លួនលោក ប៉ិច តុងហេង ទៅវិញ និងតម្រូវឲ្យព្រឹកថ្ងៃទី២៨ មេសា នេះមកបង្ហាញខ្លួនម្តងទៀត ដើម្បីសាកសួរជាផ្លូវការ។
សូមបញ្ជាក់ថា ហេតុការណ៍នេះបានកើតឡើង នៅថ្ងៃទី ២៤ មេសា ឆ្នាំ ២០១៨ វេលាម៉ោងជាង ១១ ថ្ងៃត្រង់ នៅក្បែខុនដូររបស់ជនបង្ករស្ថិតនៅផ្លូវលេខ ៣៦៨ សង្កាត់ បឹងកេងកង ៣ ខណ្ឌ ចំការមន រាជធានី ។
បើតាមសាក្សីនៅជិតកន្លែងកើតហេតុបានអោយដឹងថា មុនពេលកើតហេតុ បុរសជាម្ចាស់ខុនដូរ និង ជាម្ចាស់រថយន្តស្ព័រ Chevrolet Camaro ពាក់ស្លាកលេខ 2AP-8989 ភ្នំពេញ បានបើករថយន្តដោយរោទិ៍សំឡេងឮខ្លាំងៗ ។ ពេលនោះកម្មកររើសអេតចាយនៅក្បែនោះ ក៏ក្រឡេកមើល។ ពេលឃើញកម្មករមើលមុខម្ចាស់រថយន្ត បានបើកត្រឡប់រថយន្តមកវិញហើយចុះពីលើរថយន្តដោយមានកាន់កាំភ្លើងខ្លី នៅនឹងដៃវាយកម្មករបែកក្បាលតែម្ដង ។
កម្មកររងគ្រោះមានឈ្មោះ សាំង តុលា អាយុ ២១ ឆ្នាំ រងរបួសបែកក្បាលដេរច្រើនថ្នេរ ។ ចំណែកជនបង្កត្រូវបានសមត្ថកិច្ចមូលដ្ឋានប្រាប់ថា ឈ្មោះ ប៉ិច តុងហេង ជាម្ចាស់ខុនដូ និង ជាម្ចាស់រថយន្តស្ព័រ មានទីលំនៅផ្ទះលេខ ៥៨ ផ្លូវ ៣៦៨ ភូមិ ៣៨ សង្កាត់ បឹងកេងកង៣ ខណ្ឌ ចំការមន ។
ជនរងគ្រោះបានដាក់ពាក្យបណ្ដឹងនៅនគរបាលមូលដ្ឋានដោយទាមទារសំណង ១០.០០០ ដុល្លារ និង សំណូមពរឲ្យសមត្ថកិច្ចចាត់ការជនល្មើសតាមច្បាប់ ។ លោកនាយប៉ុស្តិ៍បឹងកេងកង៣ បានឲ្យដឹងថា លោកបានទទួលពាក្យបណ្ដឹងជនរងគ្រោះរួចហើយ ហើយបានកោះហៅជនបង្កឈ្មោះ ប៉ិច តុងហេង ឲ្យចូលខ្លួនមកបំភ្លឺ៕ ដោយ៖បញ្ញាស័ក្តិ
