ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៨ ខែមេសា ឆ្នាំ២០១៨នេះ បានចេញសេចក្តីប្រកាសព័ត៌មានអំពីលទ្ធផល នៃកិច្ចប្រជុំត្រៀមរៀបចំ សម្រាប់កិច្ចប្រជុំកំពូល អាស៊ានលើកទី៣២ នៅរសៀលថ្ងៃសុក្រ ទី២៧ ខែ មេសា ឆ្នាំ២០១៨ លោកទេសរដ្ឋមន្ត្រី ប្រាក់ សុខុន ព្រមទាំងរដ្ឋមន្ត្រីការបរទេស នៃប្រទេសសមាជិកអាស៊ាន បានចាប់ផ្ដើមកិច្ចប្រជុំលើកទី២១ របស់ក្រុមប្រឹក្សាសម្របសម្រួលអាស៊ាន ដើម្បីត្រៀមរៀបចំកិច្ចប្រជុំកំពូលអាស៊ានលើកទី៣២ នៅសាធារណរដ្ឋសិង្ហបុរី ។
កិច្ចប្រជុំរដ្ឋមន្ត្រីការបរទេសអាស៊ាន (AMM) ក្នុងកិច្ចប្រជុំ រដ្ឋមន្ត្រីការបរទេស បានពិភាក្សាអំពីការកសាងសហគមន៍អាស៊ាន និងទំនាក់ទំនងខាងក្រៅរបស់អាស៊ាន និងបានផ្លាស់ប្តូរទស្សនៈអំពីការអភិវឌ្ឍតំបន់និងអន្តរជាតិ។
នៅក្នុងបទអន្តរាគមន៍ស្តីពីការកសាងសហគមន៍អាស៊ាន លោកប្រាក់ សុខុន បានលើកឡើងអំពីភាពមិនច្បាស់ជាសកល និងនិន្នាការកើនឡើងនៃការគាំពារនិយមជុំវិញពិភពលោក ហើយនឹងលទ្ធភាពកើនឡើងនៃសង្គ្រាមពាណិជ្ជកម្ម។ លោក បានសម្តែងការព្រួយបារម្ភអំពីផលប៉ះពាល់នៃបញ្ហាទាំងនោះចំពោះការកសាងសហគមន៍អាស៊ាន និងបានផ្តល់គំនិតមួយចំនួន សម្រាប់ការឆ្លើយតបទៅនឹងការកើនឡើងនៃការគាំពារនិយម ដូចជាអាស៊ាន ត្រូវមានភាពចាំបាច់ក្នុងការរក្សាភាពរឹងមាំសេដ្ឋកិច្ច និងវិបុលភាព ការកសាងសហគមន៍អាស៊ានត្រូវតែទទួលយកបដិវត្តន៍ឧស្សាហកម្មជំនាន់ទី៤ អាស៊ានមានភាបចាំបាច់បន្តដោះស្រាយគម្លាតអភិវឌ្ឍន៍រវាងសមាជិកអាស៊ានចាស់ និងថ្មី ថ្វីត្បិតតែគម្លាតនេះបានខិតជិតបន្តិចម្តងៗ នៅពេលដែលប្រទេសកម្ពុជា ឡាវ ម៉យ៉ាន់ម៉ា និងវៀតណាម មានអត្រាកំណើនសេដ្ឋកិច្ចថេរក៏ដោយ។
ក្នុងការដោះស្រាយទំនាក់ទំនងខាងក្រៅរបស់អាស៊ាន លោកប្រាក់ សុខុន បានថ្លែងថា ទំនាក់ទំនងងតានតឹងរវាងគូប្រជែងមហាអំណាច នឹងធ្វើឲ្យមានការលំបាកដល់ប្រទេសអាស៊ានក្នុងការជ្រើសរើសមិត្ត។ លោកទេសរដ្ឋមន្ត្រី បានគូសបញ្ជាក់ពីសន្ទុះវិជ្ជមាន ក្នុងទំនាក់ទំនងទ្វេភាគីរវាងចិន និងជប៉ុន ដែលអាចនាំមកនូវកិច្ចសហប្រតិបត្តិការបន្ថែមក្នុងក្របខ័ណ្ឌអាស៊ានបូកបី និងជោគជ័យនៃកិច្ចប្រជុំកំពូលអាស៊ាន ជាមួយឥណ្ឌា និងជាមួយអូស្ត្រាលី ដែលជាចំណុចរួមជាវិជ្ជមានសម្រាប់កិច្ចសហប្រតិបត្តិការជាមួយដៃគូខាងក្រៅ។
ចំពោះបញ្ហាឧបទ្វីបកូរ៉េ លោកទេសរដ្ឋមន្ត្រី បានគូសបញ្ជាក់ថា “ការវិវឌ្ឍនាពេលថ្មីៗ គឺមានការចាប់អារម្មណ៍ លើកទឹកចិត្ត និងមិនដែលកើតមានសោះនៅលើឧបទ្វីបកូរ៉េ ក្នុងប្រវត្តិសាស្ត្រថ្មីៗនេះ” ហើយការវិវឌ្ឍនេះ គឺជាការប្រើប្រែងអត់ឈប់ឈររបស់ប្រធានាធិបតី ម៉ូន ជេអីន នៅក្នុងកិច្ចស្វះស្វែងរបស់គាត់ ស្តីពី “គំនិតផ្តួចផ្តើមបែឡាំង” ។ លោកទេសរដ្ឋមន្ត្រី យល់ឃើញថា កិច្ចប្រជុំកំពូលចិន-សាធារណរដ្ឋប្រជាមាននិតប្រជាធិបតេយ្យកូរ៉េ នៅទីក្រុងប៉េកាំង គឺជាការទម្លុះទំលាយភាពទាល់ច្រកដ៏សំខាន់មួយ។ ក្នុងឋានៈជាប្រទេសសម្របសម្រួលទំនាក់ទំនងដៃគូសន្ទនាអាស៊ាន-សាធារណរដ្ឋកូរ៉េ កម្ពុជាផ្តល់សារសំខាន់ចំពោះដំណោះស្រាយនយោបាយនៅឧបទ្វីបកូរ៉េនិងក្នុងការថែរក្សាសន្តិភាព ស្ថិរភាព និងសន្តិសុខ នៅក្នុងតំបន់។
ចំពោះបញ្ហាសមុទ្រចិនខាងត្បូង លោកប្រាក់ សុខុន បានគូសបញ្ជាក់ថា “រយៈកាលពីឆ្នាំកន្លងទៅ កិច្ចប្រឹងប្រែងក្នុងការកសាងភាពជឿជាក់ និងទំនុកចិត្ត បាននាំមកឲ្យយើងនូវសមិទ្ធផលដ៏សំខាន់ ៖ ការបញ្ចប់ក្របខ័ណ្ឌការងារសម្រាប់ក្រមប្រតិបត្តិនៅសមុទ្រចិនខាងត្បូង និងការចាប់ផ្តើមជាផ្លូវការនូវកិច្ចពិគ្រោះយោបល់ប្រកបដោយខ្លឹមសារ៕ ដោយ ៖ បញ្ញាស័ក្តិ
ខាងក្រោមនេះជាលទ្ធផល នៃកិច្ចប្រជុំត្រៀមរៀបចំ សម្រាប់កិច្ចប្រជុំកំពូល អាស៊ានលើកទី៣២ ដែលប្រកាសដោយក្រសួងការបរទេស ៖