កោះកុង ៖ ក្នុងឧប្បទ្ទវហេតុ គ្រោះថ្នាក់ រថយន្ដ Lexus470 បុកជាមួយរថយន្ដដឹកសាំងក្រុមហ៊ុន PTT បានរកឃើញសពជនរងគ្រោះ៥នាក់នៅក្នុងរថយន្ដ Lexus ចំណែកអ្នកបើករថយន្តដឹកសាំងពីរនាក់របួសផងដែរ។
លោកវរសេនីយ៍ទោ អ៊ុំ សោភ័ណ្ឌ នាយរងការិយាល័យនគរបាលចរាចរណ៍ខេត្តកោះកុង បានឲ្យដឹងថាមានមនុស្ស៥នាក់បានស្លាប់នៅក្នុងរថយន្តឡិចស៊ីស និង២នាក់ទៀតរងរបួសធ្ងន់ ក្រោយពីមានករណីគ្រោះថ្នាក់ចរាចរណ៍មួយកើតឡើងរវាងរថយន្តដឹកប្រេងក្រុមហ៊ុន PTT បុកជាមួយរថយន្តឡិចស៊ីល RX470 បណ្ដាលឲ្យផ្ទុះឆេះយ៉ាងសន្ធោសន្ធៅ នៅថ្ងៃទី២៨ ខែមេសា ឆ្នាំ២០១៨នេះ លើផ្លូវជាតិលេខ៤ ចន្លោះគីឡូម៉ែត្រលេខ១៤២-១៤៣ ត្រង់ចំណុចចម្ការឈ្មោះ ដន ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង។
លោកនាយរងការិយាល័យបានបន្តថា មុនពេលកើតហេតុមានរថយន្តមួយគ្រឿងម៉ាកឡិចស៊ីស ពណ៌ទឹកមាស មានទិសដៅពីខេត្តព្រះសីហនុ ឆ្ពោះទៅរាជធានីភ្នំពេញ បានបុកជាមួយរថយន្តដឹកប្រេងរបស់ក្រុមហ៊ុន PTT ពាក់ស្លាកលេខ ភ្នំពេញ 4A-1215 មានទិសដៅពីរាជធានីភ្នំពេញ ឆ្ពោះទៅខេត្តព្រះសីហនុ បណ្ដាលឲ្យផ្ទុះឆេះភ្លើងយ៉ាងសន្ធោសន្ធៅ។
ក្រោយកើតហេតុ កម្លាំងកងរាជអាវុធហត្ថស្នាក់ការសនិ្តសុខ៤០២ សហការជាមួយកម្លាំងអធិការដ្ឋាននគរបាលស្រុកកំពង់សីលា និងកម្លាំងអធិការដ្ឋាននគរបាលស្រុកស្រែអំបិល បានចុះទៅជួយសម្រួលចរាចរណ៍នៅកនែ្លងកើតហេតុ ដោយយកឡានទឹកចំនួន២គ្រឿង (ស្រុកកំពង់សីលា និងស្រុកស្រែអំបិល) មកជួយបាញ់ពន្លត់ភ្លើងកំពុងតែឆេះ ឲ្យបានរលត់ទាំងស្រុង។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដែលបានបញ្ជាឲ្យកម្លាំងនគរបាលស្រុកកំពង់សីលា សហការជាមួយកម្លាំងនគរបាលស្រុកស្រែអំបិល បានឲ្យដឹងថា បន្ទាប់ពីការកាត់គ្រោងដែករបស់រថយន្ដ ដើម្បីយកសពជនរងគ្រោះចេញក្រៅ រកឃើញសពជនរងគ្រោះ៥នាក់ ក្នុងនោះអាចមានស្ដ្រីផងដែរ ព្រោះឃើញមានកងដៃនៅលើសាកសព។ សពក្នុងរថយន្ដ Lexus470 អាចជាគ្រួសារនឹងគ្នា ប៉ុន្ដែពេលនេះមិនទាន់បានស្គាល់អត្ដសញ្ញាណនៅឡើយទេ ដោយជំហ៊ានដំបូងគ្រាន់តែដឹងថា ជនរងគ្រោះជាអ្នកបើករថយន្ដរស់នៅ ខេត្តព្រះសីហនុ និងជាមន្ដ្រីរាជការនៅខេត្តកំពត៕ ដោយ៖បញ្ញាស័ក្តិ
