ភ្នំពេញ៖ បុរសដែលគេស្គាល់ថា ជាទាហានពាក់ស័ក្តិ៤ ខណៈកំពុង មានទំនាស់ជាមួយគូរដណ្តឹង បានបើកទ្វារចុះពីលើរថយន្ត ហើយឡើងលើបង្កាន់ដៃស្ពានជ្រោយចង្វាលោតសម្លាប់ខ្លួនបានសម្រេចតែម្តង។
ហេតុការណ៍នេះបាន បង្កឲ្យមានការភ្ញាក់ផ្អើលកាលវេលា ម៉ោង ១០យប់ ថ្ងៃទី២៨ ខែមេសា ឆ្នាំ២០១៨ នៅត្រង់ចំណុចកណ្តាលស្ពានជ្រោយចង្វាថ្មី ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
បុរសដែលលោតទឹកសម្លាប់ខ្លួនមានឈ្មោះដេង សុវណ្ណឌឿន អាយុ៣២ឆ្នាំ ជនជាតិខ្មែរ មុខរបរធ្វើយោធាពាក់ស័ក្តិ ៤ ស្នាក់នៅផ្ទះម្តុំសន្ធរម៉ុក។ គូរដណ្តឹងមានឈ្មោះ ហែល រចនា ភេទស្រី អាយុ៣០ឆ្នាំ ជនជាតិខ្មែរ។
តាមសម្តីមិត្តភក្តិជនរងគ្រោះបាន ប្រាប់ឲ្យដឹងថា មុនដំបូងពួកគាត់បានចេញពីញ៉ាំការគេ នៅព្រែកលៀប ក្នុងគោលបំណងទៅផ្ទះ ដោយជិះឡានម៉ាកកាមរី បាឡែន ពណ៌ស មានស្លាកលេខភ្នំពេញ2AS.2105 បើកតាមបណ្តោយផ្លូវជាតិលេខ៦A ទិសដៅពីកើតទៅលិច ដោយខាងស្រី ជាអ្នកបើកបរមកដល់ពាក់កណ្តាលផ្លូវ ក៏មានការឈ្លោះគ្នាបន្តិចបន្តួច ហើយពេលជិះមកដល់លើស្ពាន ជនរងគ្រោះប្រាប់ថា ចុះជុះនោមបន្តិច ឲ្យឈប់ឡាន ពេលនោះស្រាប់តែបើកទ្វារឡាន រត់ឡើងលើបង្កាន់ដៃស្ពាន លោតចុះក្នុងទឹកបាត់ឈឹង ក៏មានការស្រែកឆោឡោ ពីសំណាក់ខាងស្រី ដែលត្រូវជាគូរដណ្តឹង ហើយក៏បត់ឡានចុះមកត្រើយរង្វង់មូលតាព្រហ្មវិញ ប្រាប់សមត្ថកិច្ច ដែលនៅគល់ស្ពានឲ្យជួយរក និងតេទូរស័ព្ទប្រាប់ឪពុកមា្តយ និងបងប្អូន ក៏បានមកជាច្រើននាក់ដល់កន្លែងកើតហេតុផងដែរ ។ សមត្ថកិច្ចក៏ឲ្យទូកចាម ជួយចេញរកដែរតែរកមិនឃើញ។ រុករកអស់ជាច្រើនម៉ោង ក៏នៅតែមិនឃើញ មិនដឹងស្លាប់ ឬរស់នោះទេ។ ក្រោយមកសាច់ញាតិ ក៏វិលត្រឡប់មកផ្ទះវិញ ដោយក្តីអស់សង្ឃឹម។ រហូតមកទល់នឹងម៉ោងជាង៦ព្រឹក ថ្ងៃអាទិត្យ ទី២៩ ខែមេសា ឆ្នាំ២០១៨នេះ សពត្រូវបានរកឃើញ ហើយក្រុមគ្រួសារយកទៅធ្វើបុណ្យ៕ ដោយ៖បញ្ញាស័ក្តិ