នៅថ្ងៃទី ៣០ ខែមេសា ប្រព័ន្ធផ្សព្វផ្សាយរបស់កូរ៉េខាងជើង បានឲ្យដឹងថា រដ្ឋសភាប្រទេសនេះ បានប្រកាសសម្រេចឯកភាពគ្នាប្រើប្រាស់ម៉ោងតែ១ ជាមួយកូរ៉េខាងត្បូង ដោយគិតចាប់ពីថ្ងៃទី ៥ ខែឧសភាតទៅ ។
ឥរិយាបថរបស់កូរ៉េខាងជើង ត្រូវបានបង្ហាញ បន្ទាប់ពីមេដឹកនាំគីម ជុងអ៊ុន បានលើកសំណើរដែលគេពុំនឹកស្មានដល់ថា នឹងតម្លើងម៉ោងរបស់ប្រទេសនេះលឿនជាងមុន ៣០នាទី ដើម្បីស្របគ្នាជាមួយនឹងម៉ោងរបស់កូរ៉េខាងត្បូង ។
KCNA បានដកស្រង់សម្តីរបស់មេដឹកនាំគីម ជុងអ៊ុន អះអាងថា “ទង្វើនេះរបស់ខ្លួន គឺជាជំហានជាក់ស្តែងដំបូង សម្រាប់ការស្រុះស្រួល និងឯកភាពប្រទេស”។
មុននោះព័ត៌មានខាងលើក៏ត្រូវបានប្រធានក្រុមលេខាសារព័ត៌មានរបស់ប្រធានាធិបតីកូរ៉េខាងត្បូង បានចេញសេចក្តីថ្លែងការណ៍នៅថ្ងៃទី ២៩ ខែមេសាផងដែរ ។
គួររំលឹកថា កាលពីខែសីហា ឆ្នាំ ២០១៥ កូរ៉េខាងជើងបានសម្រេចបន្ថយម៉ោងឲ្យយឺតជាងកូរ៉េខាងត្បូង ៣០នាទី បំណងអះអាងពីការលុបចោលស្លាកស្នាមបន្សល់ទុករបស់អាណានិគមជប៉ុន នៅដំណាក់កាល ១៩១០-១៩៤៥ នៅឧបទ្វីបកូរ៉េ ៕ សូយន
