អ្នកការទូតខ្ពស់បំផុតរបស់ចិន គឺលោក Wang Yi នឹងធ្វើដំណើរទស្សនៈកិច្ចទៅកាន់ប្រទេសកូរ៉េខាងជើងនៅក្នុងសប្តាហ៍នេះ ដែលដំណើរទស្សនៈកិច្ចនេះ កើតឡើងបន្ទាប់ពីមេដឹកនាំកូរ៉េខាងជើងនិងកូរ៉េខាងត្បូង បានធ្វើកិច្ចប្រជុំកំពូលកាលពីសប្តាហ៍កន្លងទៅនេះ។ នេះបើតាមការចេញផ្សាយរបស់សារព៌តមាន Channel News Asia នៅថ្ងៃច័ន្ទនេះ។
បើតាមសេចក្តីប្រកាសរបស់ក្រសួងការបរទេសចិន បានឲ្យដឹងថា ដំណើរទស្សនៈកិច្ចរបស់មន្ត្រីការទូតជាន់ខ្ពស់របស់ខ្លួន ទៅកាន់កូរ៉េខាងជើងនឹងធ្វើឡើងនៅថ្ងៃពុធ និងព្រហស្បតិ៍។
ដំណើរទស្សនៈកិច្ចកើតឡើង ក្រោយពីមានការវិវឌ្ឍន៍គួរឲ្យកត់សម្កាល់ក្នុងដំណើរ ស្វែងរកសន្តិភាពនៅឧបទ្វីបកូរ៉េ បន្ទាប់ពីមានជំនួបកំពូលរវាងមេដឹកនាំ កូរ៉េខាងជើង គីម ជុងអ៊ុន និងមេដឹកនាំកូរ៉េខាងត្បូង ម៉ូន ជេអ៊ីន។
នៅក្នុងកិច្ចប្រជុំ មេដឹកនាំកំពូលទាំងពីរសច្ចាថា នឹងធ្វើការលុបបំបាត់ចោលអាវុធនុយក្លេអ៊ែរទាំងស្រុង។
កាលពីថ្ងៃអាទិត្យម្សិលមិញនេះ ការិយាល័យរបស់ប្រធានាធិបតីកូរ៉េខាងត្បូង បានឲ្យដឹងថា មេដឹកនាំកូរ៉េខាងជើង គីម ជុងអ៊ុន បានបញ្ជាក់ប្រាប់លោក ម៉ូនថា ខ្លួននឹងធ្វើការបិទចោលនូវកន្លែងធ្វើការបាញ់សាកល្បងនុយក្លេអ៊ែរនៅក្នុងខែឧសភាខាងមុខ និងមានការអញ្ជើញអ្នកជំនាញ និងអ្នកកាសែត ដើម្បីបញ្ជាក់ពីតម្លាភាពផងដែរ៕ សុភ័ក្ត្រ
