ស្វាយរៀង ៖ នាយឧត្តមសេនីយ៍បណ្ឌិត ជ័យ សុន អគ្គលេខាធិការអាជ្ញាធរជាតិទប់ស្កាត់អាវុធគីមី នុយក្លេអ៊ែ ជីវសាស្ត្រនិងវិទ្យុសកម្ម អមដំណើរដោយឧត្តមសេនីយ៍ឯក សៅ សុវណ្ណី អគ្គលេខាធិការរងនិងឧត្តមសេនីយ៍ឯក កេ ដា អគ្គលេខាធិការរង ព្រមទាំងនាយទាហាន នាយទាហានរង និងពលទាហានជំនាញអាវុធគីមី បានធ្វើដំណើរចុះសិក្សាវាយតំលៃ នឹងត្រួតពិនិត្យផលប៉ះពាល់ដោយគ្រាប់បែកគីមីនៅក្នុងតំបន់វត្តគគីរចំនួន៤០គ្រាប់ទំលាក់ដោយយន្តហោះសហរដ្ឋអាមេរិចក្នុងអំឡុងឆ្នាំ១៩៧០ ដែលស្ថិតនៅក្នុងភូមិគគីរ ឃុំគគីរ ស្រុករមាសហែខេត្តស្វាយរៀងនៅរសៀលថៃ្ងទី២៩ ខែមេសា ឆ្នាំ២០១៨នេះ។
បើតាមមន្ត្រីជាន់ខ្ពស់អាជ្ញាធរគីមីបានថ្លែងអោយដឹងថាការរុករកគ្រាប់បែកគីមីនៅឃុំគគីរស្រុករមាសហែកនេះមានរយះពេលជាងឆ្នាំមកហើយក្នុងនោះមន្ត្រីជំនាញបានចុះរុករកនៅក្នុងភូមិសាស្ត្រឃុំគគីរស្រុករមាសហែករកឃើញគ្រាប់បែកគីមីរបស់អាមេរិចមានចំនួន៤០គ្រាប់គិតត្រឹមថ្ងៃទី២៩ខែមេសារឆ្នាំ២០១៨នេះ។មន្ត្រីដដែលបានបន្តថាក្នុងប្រតិបត្តិការរុករកគ្រាប់បែកគីមីនេះមន្ត្រីយើងបានសហការជាមួយមន្ត្រីសុីម៉ាក់ធ្វើកិច្ចការងារនេះទាល់តែបោសសម្អាតរួចរាល់នៅក្នុងឃុំគគីរនេះដើម្បីសុខមាលភាពរបស់ពលរដ្ឋ។
មន្ត្រីអាជ្ញាធរគីមីបានបញ្ជាក់ថា ដោយសារឥទ្ធិពលសារធាតុគីមី បានបង្ខំឲ្យពលរដ្ឋឃុំគីគរ ត្រូវបញ្ជូនទៅពិនិត្យនៅមន្ទីរពេទ្យ បន្ទាប់ពីមានបញ្ហាសុខភាព ដោយសារថប់ដង្ហើម ក្តៅក្រហាយ និងរមាស់លើស្បែក នៅពេលដែលប្រជាពលរដ្ឋកាយប៉ះរណ្តៅគ្រាប់បែកគីមីក្នុងរយះពេលកន្លងមកនេះ។ដោយមានការយកចិត្តទុកពីសំណាក់សម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជានិងលោកស្រីឧបនាយករដ្ឋមន្ត្រីម៉ែនសំអននោះរាជរដ្ឋាភិបាលបានកសាងមណ្ឌលសុខភាពនៅក្នុងឃុំគគីរទីដែលរងគ្រោះគ្រាប់បែកគីមីដើម្បីព្យាបាលជនរងគ្រោះដោយឥទ្ធិពលគ្រាប់បែកគីមីនិងព្យាបាលជង្ងឺទូទៅផងដែរ៕ វ៉ៃកូ