នេះជាខណៈពេលនៃគ្រោះថ្នាក់ចរាចរណ៍ខ្លួនឯងដ៏សែនរន្ធត់មួយ ដែលរថយន្តកុងតឺន័រ១គ្រឿង បើកមិនប្រុងប្រយ័ត្នបានក្រឡាប់ធ្លាក់ផ្លូវ នៅចំណុចផ្លូវកោងក្រោមស្ពានអាកាសតំបន់ភ្នំមួយកន្លែង នៅក្នុងកោះតៃវ៉ាន់ ។
យោងតាមប្រភពព័ត៌មានបានឲ្យដឹងថា ខ្សែវីដេអូថតបានពីរថយន្តបើកខាងក្រោយ ដែលស្ត្រីម្នាក់ត្រូវបានលឺស្រែកឡើងស្ទើរគាំងបេះដូង បានបង្ហាញឲ្យឃើញរថយន្តកុងតឺន័រនោះ ក្រឡាប់ធ្លាក់ផ្លូវចូលក្នុងព្រៃជើងភ្នំកម្ពស់ ២០ ម៉ែត្រ ស្ថិតនៅក្នុងទីក្រុង Keelung (តៃវ៉ាន់) ។
អ្នកបើកបរអាយុ ៦២ ឆ្នាំ ឈ្មោះថា Zhuang ត្រូវបានដឹងថា បានរងរបួសឆាក់ឆ្អឹងច្រើនកន្លែង និងត្រូវបានប្រកាសស្លាប់នៅនឹងកន្លែងកើតហេតុ ។
នាយកដ្ឋានពន្លត់អគ្គីភ័យក្រុង Keelung បានបញ្ជូនក្រុមសង្គ្រោះទៅកាន់កន្លែងកើតហេតុ បន្ទាប់ពីទទួលបានព័ត៌មានពីអ្នកដែលបានឃើញហេតុការណ៍នេះកើតឡើង ។
យោងតាមប៉ូលីស នោះការស៊ើបអង្កេតជំហានដំបូងបានបញ្ជាក់ថា រថយន្តកុងតឺន័រនេះបើកក្នុងល្បឿនលឿន ក្នុងអំឡុងពេលបត់ឆ្វេង ដែលបណ្តាលឲ្យផុតលំនឹងក្រឡាប់ធ្លាក់ផ្លូវបែបនេះតែម្តង ៕ ចន្ទី