ស្ត្រីថៃម្នាក់ត្រូវបានចាប់ខ្លួន នៅព្រំដែនសាកែវ (Sa Kaew) កាលពីព្រឹកថ្ងៃច័ន្ទ ខណៈឆ្លងកាត់ត្រឡប់ពីប្រទេសកម្ពុជា ជាមួយថ្នាំញៀន ០.៧៦១ ក្រាម ដែលនាងនិយាយថា នាងបានទិញនៅក្នុងទីក្រុងបាងកក ។
តាមប្រភពព័ត៌មានពី The Nation ស្ត្រីថៃស្រស់ស្អាតម្នាក់ឈ្មោះ Satawaree Sudjai អាយុ ២៥ ឆ្នាំ ត្រូវបានចាប់ខ្លួននៅច្រកព្រំដែន Aranyaprathet នៅវេលាម៉ោង ៩ ព្រឹក នៅពេលនាងកំពុងវិលត្រឡប់ពីក្រុងប៉ោយប៉ែត្រ ។
មន្ត្រីបាននិយាយថា ពួកគេបានធ្វើការត្រួតពិនិត្យនាង ព្រោះតែនាងបង្ហាញនូវឥរិយាបទគួរឲ្យសង្ស័យដូចជាជនប្រើប្រាស់ថ្នាំញៀន ។
ថ្នាំញៀនត្រូវបានរកឃើញនៅក្នុងថង់ប្លាស្ទិកមួយ ដែលលាក់នៅកាតប័ណ្ណឥណទាន ATM របស់នាង ។
ស្ត្រីរូបនេះបានសារភាពថា នាងបានឆ្លងកាត់ព្រំដែន ដើម្បីទៅចូលរួមពិធីខួបកំណើតមិត្តភក្តិម្នាក់នៅឯកាស៊ីណូ ប៉ុន្តែ នាងបានទិញថ្នាំញៀននៅក្នុងទីក្រុងបាងកក ដើម្បីប្រើប្រាស់ផ្ទាល់ខ្លួនរបស់នាង ។ នាងនិយាយថា នាងប្រើប្រាស់អស់មួយចំនួន និងទុកខ្លះ ប៉ុន្តែ ភ្លេចយកវាចេញ មុនពេលនាងឆ្លងកាត់ព្រំដែនចូលប្រទេសកម្ពុជា ៕ ចន្ទី
