នេះជាខណៈដ៏មហាស្លុតរន្ធត់មួយ ដែលកូនកំលោះត្រូវបានបាញ់ប្រហារយ៉ាងស្រស់ៗ នៅក្នុងពិធីមង្គលការរបស់គាត់ ខណៈលោតាអាចារ្យ និងសាច់ញាតិចូលរួម បានត្រឹមសម្លឹងមើលដាក់មុខគ្នាទៅវិញទៅមុខ ព្រោះតែពុំដឹងថា នរណាជាជនដៃដល់នាខណៈពេលនោះ ។
គេហទំព័រ independent បានចុះផ្សាយឲ្យដឹងថា កូនកំលោះឈ្មោះ Sunnil Verma អាយុ ២៥ ឆ្នាំ ត្រូវបានគេបាញ់ប្រហារចំដើមទ្រូង ខណៈគាត់កំពុងត្រូវបានលោកតាអាចារ្យធ្វើពិធីមួយ ក្នុងអំឡុងពេលនៃមង្គលការរបស់គាត់ ។
តាមរយៈវីដេអូថតដោយជាងថតរូប បានបង្ហាញបុរសម្នាក់ស្ថិតក្នុងសម្លៀកបំពាក់អាវពណ៌ទឹកក្រូច បានដកកាំភ្លើងខ្លីបាញ់ទៅលើកូនកំលោះយ៉ាងលឿន និងញ៉ុកកាំភ្លើងចូលក្នុងហោប៉ៅខោវិញ ។ បន្ទាប់រងការបាញ់ប្រហាររួច កំលោះរងគ្រោះបានរកមើលជនដៃដល់ ខណៈយកដៃឱបទ្រូងដ៏ឈឺចុកចាប់បំផុត និងបន្ទាប់មក ដួលគ្រឹបតែម្តង ។
អំពើបាញ់សម្លាប់នេះ ហាក់ដូចជាបានកើតឡើងក្នុងអំឡុងពេលការបាញ់ប្រារព្ធពិធីមង្គលការ ប៉ុន្តែ វាមិនច្បាស់ថាតើហេតុការណ៍នេះ គឺជាចេតនា ឬ កើតឡើងដោយចៃដន្យនោះទេ ។
ទោះយ៉ាងណា បច្ចុប្បន្ន ប៉ូលីសនៅក្នុងស្រុក Lakhimpur Kheri រដ្ឋ Uttar Pradesh ប្រទេសឥណ្ឌា កំពុងតាមប្រមាញ់ជនដៃដល់ ពីបទសង្ស័យអំពើមនុស្សឃាតដ៏សាហាវនេះ ៕ ចន្ទី
