ភ្នំពេញ៖ ជនជាតិវៀតណាមចំនួន២៨នាក់ ដែលស្នាក់នៅនិងប្រើប្រាស់ឯកសារមិនត្រឹមត្រូវស្របតាមច្បាប់កម្ពុជា ត្រូវបានក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ សហការជាមួយ កម្លាំងស្នងការដ្ឋាននគរបាលរាជធានីភ្នំពេញ និងខេត្តកណ្តាល ឃាត់ខ្លួនយកទៅសួរនាំ នៅថ្ងៃទី១ ខែឧសភា ឆ្នាំ២០១៨ ក្នុងពេលដែលក្រុមជនជាតិវៀតណាមទាំងនោះ កំពុងធ្វើការនៅការដ្ឋានកប៉ាល់បូមខ្សាច់ លើផ្ទៃទឹក តាមបណ្តោយទន្លេមេគង្គលើ រាជធានីភ្នំពេញ និងទន្លេមេគង្គក្រោម ស្ថិតក្នុងស្រុកល្វាឯម ខេត្តកណ្តាល។
លោកវរសេនីយ៍ទោ ជា ចិត្រា ការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញបានចុះសហការជាមួយនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ និងកម្លាំងសមត្ថកិច្ចមូលដ្ឋាន សម្របសម្រួលផ្លូវច្បាប់ដោយលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នឹងលោក លឹម ស៊ាងហៃ ក្រឡាបញ្ជី និងលោក ឯក ស៊ុនរស្មី ព្រះរាជអាជ្ញា នៃអយ្យការអមសាលាដំបូងខេត្តកណ្តាល និងសមត្ថកិច្ចពាក់ព័ន្ធខេត្តកណ្តាល ដើម្បីចុះត្រួតពិនិត្យ ជនជាតិវៀតណាម នៅតាមគោលដៅការដ្ឋានកប៉ាល់បូមខ្សាច់ លើផ្ទៃទឹក តាមបណ្តោយទន្លេមេគង្គលើ រាជធានីភ្នំពេញ និងទន្លេមេគង្គក្រោម ស្ថិតក្នុងស្រុកល្វាឯម ខេត្តកណ្តាល។
លោកឧត្តមសេនីយ៍ប្រធាននាយកដ្ឋាន បានបញ្ជាក់ថា ក្នុងប្រតិបត្តិការនេះ កម្លាំងជំនាញបានពិនិត្យឃើញមានជនជាតិវៀតណាមសរុប ចំនួន២៨នាក់ ស្រី៣នាក់ បានលួចចូលមកស្នាក់នៅ និងប្រមុខរបរដោយខុសច្បាប់កាន់កាប់ និងប្រើប្រាស់ឯកសារមិនត្រឹមត្រូវ ហើយត្រូវបានបញ្ជូនមកកាន់អគ្គនាយកដ្ឋានអន្តោប្រវេសន៍ ដើម្បីធ្វើការណែនាំ និងត្រួតពិនិត្យឯកសារតាមនីតិវិធីច្បាប់បន្ត៕ ដោយ៖បញ្ញាស័ក្តិ
