ភ្នំពេញ ៖ ប្រធានអង្គភាពប្រឆាំងអំពើពុករលួយ បានបញ្ជាក់ថា ខែមេសា ឆ្នាំ២០១៨នេះ អង្គភាពប្រឆាំងអំពើពុករលួយ (ACU) បានទទួលការប្រកាសទ្រព្យសម្បត្តិ និងបំណុលសរុបចំនួន ១១៧២នាក់។
បើតាមសេចក្តីជូនដំណឹងរបស់អង្គភាពប្រឆាំងអំពើពុករលួយ ស្តីពីកិច្ចប្រជុំលើកទី៣៤ អាណត្តិទី២ នៃក្រមប្រឹក្សាជាតិប្រឆាំងអំពើពុករលួយ នៅថ្ងៃទី៣០ ខែមេសា ឆ្នាំ២០១៨នេះ លោកទេសរដ្ឋមន្ត្រីឱម យ៉ិនទៀង ប្រធានអង្គភាពប្រឆាំងអំពើពុករលួយ បានរាយការណ៍អំពីសកម្មភាពការងាររបស់អង្គភាព ក្នុងអំឡុងខែមេសាឆ្នាំ២០១៨ ក្នុងចំណោម មន្ត្រីទាំង១១៧២នាក់នោះ ដែលមានមកប្រកាសទ្រព្យសម្បត្តិនិងបំណុល ទទួលបានការតែងតាំងថ្មីចំនួន ៩១០នាក់ លាលែង ចប់អាណត្តិចំនួន ១២៧នាក់ ចូលនិវត្តន៍ ៦នាក់ និងបញ្ចប់មុខដំណែងចំនួន ១២៩នាក់។ ក្នុងខែមេសានេះ បានទទួលពាក្យប្តឹងចំនួន ៤៨ពាក្យ ដែលក្នុងនោះមានបណ្តឹងអនាមិក ១១ពាក្យ ស្មើនឹង២៣ភាគរយ។
លោកទេសរដ្ឋមន្ត្រី បានបញ្ជាក់ថា ក្នុងខែមេសា អង្គភាព បានចូលរួមស្តាប់វឌ្ឍនភាពការងារប្រឆាំងការសម្អាត់ប្រាក់ និងហិរញ្ញប្បទានភេរវកម្ម ហើយទាំងធនាគារជាតិ នៃមានអង្គភាពស៊ើបការហិរញ្ញវត្ថុជាសេនាធិការ ទាំងក្រសួងមហាផ្ទៃ ក្រសួងយុត្តិធម៌ ក្រសួងសេដ្ឋកិច្ចនិងហិរញ្ញវត្ថុ និងអង្គភាពប្រឆាំងអំពើពុករលួយ សុទ្ធតែមានការរីកចម្រើនថ្មីៗទៀត របស់ខ្លួន ក្នុងការប្រឆាំងការសម្អាតប្រាក់។
ក្នុងឱកាសនោះដែរ លោកតុប សំ ប្រធានក្រុមប្រឹក្សាជាតិប្រឆាំងអំពើពុករលួយ បានវាយតម្លៃខ្ពស់ចំពោះការខិតខំប្រឹងប្រែង របស់អង្គភាពប្រឆាំងអំពើពុករលួយ ក្នុងការបន្តជំរុញឲ្យមន្ត្រីជាប់កាតព្វកិច្ច មកប្រកាសទ្រព្យសម្បត្តិ និងបំណុល។ លោកបានបន្តថា ការបន្តអនុវត្តនូវការអប់រំ បង្ការ ទប់ស្កាត់ និងប្រឆាំងអំពើពុករលួយ នៅតែជាវិធានការស្នូល ក្នុងការកាត់បន្ថយអំពើពុករលួយ ដើម្បីលើកស្ទួយសង្គមឲ្យមានភាពស្អាតស្អំ៕ ដោយ ៖ បញ្ញាស័ក្តិ
