វីដេអូដ៏រន្ធត់មួយត្រូវបានថត ដោយជនបរទេសដែលមានការហួសចិត្តជាខ្លាំងឈ្មោះ Torsten Schubert និងបង្ហោះនៅលើគណនីហ្វេសប៊ុករបស់ខ្លួន កាលពីថ្ងៃទី០១ ខែឧសភា ឆ្នាំ២០១៨ ដោយបានសរសេរចំណងជើងថា៖ «ជនជាតិកម្ពុជាពេលខ្លះបើកបរឆ្កួតៗណាស់… ខ្ញុំដឹងថា ពុំមែនពួកគាត់ទាំងអស់ សុទ្ធតែបើកបរឆ្កួតៗបែបនេះទេ… ប៉ុន្តែអ្នកក៏អាចឃើញករណីនេះនៅក្នុងបណ្តាប្រទេសផ្សេងៗផងដែរ» ។
តាមវីដេអូរយៈពេល ៣៣ វិនាទី នេះបានបង្ហាញឲ្យឃើញដំបូងឡើយ មានរថយន្តតូចធំបីបួនគ្រឿង កំពុងឈប់រង់ចាំរថភ្លើងឆ្លងកាត់ ប៉ុន្តែ ខណៈរថភ្លើងចូលមកដល់ ស្រាប់តែរថយន្តកាម៉ារីពណ៌ខ្មៅ១គ្រឿង បើកឆ្លងកាត់ដ៏ព្រហើន ប៉ុន្តែ សំណាងហើយដែលអាចគេចផុតពីក្បាលរថភ្លើងត្រឹមតែប៉ុន្មានសង់ទីម៉ែត្រប៉ុណ្ណោះ កុំអីប្រហែលខ្ទេចក្រោមកង់រថភ្លើងទៅហើយ ។ ដែលហេតុការណ៍ដ៏រន្ធត់នេះ បានធ្វើឲ្យអ្នកយាមគ្រប់គ្រងបារ៉ាស់មានការហួសចិត្តយ៉ាងខ្លាំង ។
យ៉ាងណាមិញ ចំពោះហេតុការណ៍នេះផងដែរ ពុំត្រូវបានដឹងថាបានកើតឡើងនៅក្នុងទឹកដីតំបន់ណាមួយ នៅក្នុងប្រទេសកម្ពុជាយើងទេ ។ ប្រសិនមានប្រិយមិត្តណាបានស្គាល់ សូមជួយប្រាប់ផង ៕ ចន្ទី