តុលាការរដ្ឋបាលជាន់ខ្ពស់របស់ថៃ បានធ្វើការច្រានច្រោលទៅនឹងញតិ្តទាមទាររបស់អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ត្រា ដែលទាមទារឲ្យតុលាការប្រគល់លិខិតឆ្លងដែនឲ្យខ្លួនវិញ។ ចំពោះការច្រានចោលសំណើរ ត្រូវបានលោកថាកស៊ីន និយាយនៅក្នុងបណ្តាញសង្គម Twitter របស់លោកថា ប្រព័ន្ធយុត្តិធ៌មបរាជ័យក្នុងការបញ្ជាក់ថា ខ្លួនមានភាពឯករាជ្យពីបញ្ហានយោបាយ។ នេះបើតាមការចេញផ្សាយរបស់ទីភ្នាក់ងារសារព៌តមាន Xinhua នៅថ្ងៃពុធនេះ។
តុលាការរដ្ឋបាលជាន់ខ្ពស់ថៃ កាលពីថ្ងៃអង្គារម្សិលមិញនេះ បានយល់ស្របទៅនឹងការសម្រេចចិត្តរបស់តុលាការរដ្ឋបាលបជ្ឍិមក្នុងការច្រានចោលញតិ្តទាមទាររបស់លោក ថាក់ស៊ីន។ កាលពីឆ្នាំ ២០១៦ តុលាការនេះ បានបដិសេធបណ្តឹងដែលដាក់ដោយ លោកថាក់ស៊ីន ក្រោយពេលរដ្ឋាភិបាលថៃបានលុបចោលលិខិត្តឆ្លងដែនរបស់លោក ២។
សូមបញ្ជាក់ថា លោកថាក់ស៊ីន ដែលបច្ចុប្បន្នកំពុងរស់នៅនិរទេស ធ្លាប់កាន់តំណែងជានាយករដ្ឋមន្ត្រីថៃពីឆ្នាំ ២០០១ រហូតដល់ឆ្នាំ ២០០៦ នៅពេលដែលរដ្ឋាភិបាលរបស់លោក ត្រូវបានទម្លាក់ដោយរដ្ឋប្រហារយោធា។
នៅឆ្នាំ ២០១១ អ្នកគាំទ្ររបស់លោក គឺគណបក្សភឿថៃ ដែលដឹកនាំដោយប្អូនស្រីបង្កើតរបស់លោក គឺអ្នកស្រី យីងឡាក់ ស៊ីណាវ៉ាត់ត្រា បានឈ្នះការបោះឆ្នោត ប៉ុន្តែរដ្ឋបាលដែលដឹកនាំដោយប្អូនស្រីរបស់លោក ក៏ត្រូវបានទម្លាក់ដោយរដ្ឋប្រហារយោធាផងដែរកាលពីឆ្នាំ ២០១៤៕ ដោយ ៖ សុភ័ក្ត្រ