អ្នកដំណើរម្នាក់មកពីប្រទេសចិន ត្រូវបានចាប់ឃាត់ខ្លួន បន្ទាប់ពីបានធ្វើសកម្មភាពបើកទ្វាអាសន្នរបស់យន្តហោះ មុនពេលពេលហោះហើរ ដោយសារតែគាត់ចង់ស្រូបយកខ្យល់អាកាសបរិសុទ្ធខ្លះៗ ។
យោងតាម Shanghaiist បានឲ្យដឹងថា ហេតុការណ៍ដ៏ហួសចិត្តនេះបានកើតឡើងនៅពាក់កណ្តាលអាធ្រាត្រថ្ងៃអាទិត្យ នៅឯព្រលានយន្តហោះក្នុងទីក្រុង Mianyang ខេត្ត Sichuan ។
អ្នកដំណើររូបនោះដែលគេស្គាល់មានឈ្មោះថា Chen អាយុ ២៥ ឆ្នាំ ត្រូវបានចាប់ខ្លួនក្នុងករណីបានធ្វើសក្មភាពដកឧបករណ៍អាកាសចរណ៍ដោយគ្មានការអនុញ្ញាត និងត្រូវបានឃុំខ្លួនរយៈពេល ១៥ ថ្ងៃ ។ គាត់ក៏ត្រូវបានបង្គាប់ឲ្យបង់ប្រាក់ពិន័យចំនួន ១ម៉ឺន១ពាន់ដុល្លារ ។
នៅពេលសួរនាំ Chen បានប្រាប់ប៉ូលីសថា គាត់គ្រាន់តែចង់បង្អួចយន្តហោះ ព្រោះតែខាងក្នុងយន្តហោះក្តៅស្អុះខ្លាំងពេក ។
Chen ដែលធ្វើដំណើរតាមជើងហោះហើរ Lucky Air លេខ 8L9720 បាននិយាយថា គាត់បានទាញដៃគន្លឹះនៅក្បែរគាត់ ដោយគិតថាវានឹងបើកបង្អួច ប៉ុន្តែ ពិតជាមានការភ្ញាក់ផ្អើលយ៉ាងខ្លាំង ពេលមើលឃើញ «ជញ្ជាំង» ទាំងស្រុងបានដួលរំលំ អមជាមួយនឹងការបញ្ចេញជណ្តើររអិលសង្គ្រោះបន្ទាន់របស់យន្ត ។
អ្នកដំណើររូបនេះបានអះអាងថា រូបគាត់ពុំដឹងថាដៃគន្លឹះដែលគាត់ទាញ វាជាផ្នែកមួយនៃទ្វាច្រកចេញគ្រាអាសន្ននោះទេ ។
Chen ត្រូវបានដកស្រង់សម្តីដោយនិយាយថា៖ «ដោយសារតែអាកាសធាតុអាប់អួរពេក ហេតុដូច្នេះ វាក្តៅខ្លាំងនៅលើយន្តហោះ, ហើយខ្ញុំគ្រាន់តែរុញបង្ហើបបង្អួចក្បែរខ្ញុំឲ្យខ្យល់ចូលប៉ុណ្ណោះ ។ នៅពេលទ្វារបានដួលរំលំ ខ្ញុំពិតជាភ័យតក់ស្លុតយ៉ាងខ្លាំងតែម្តង» ។
ទោះយ៉ាងណា ចំពោះកំហុសឆ្គងរបស់ Chen ត្រូវបានគេរាយការណ៍ថា បានបង្កឲ្យយន្តហោះទទួលរងការខាតបង់ ៧០,០០០ យ័ន (ស្មើនឹង ១១,០០០ ដុល្លារ) ។
ក្រុមហ៊ុនអាការណ៍នេះ និយាយថា៖ «មុនពេលយន្តហោះនីមួយៗហោះហើរ អ្នកបំរើលើយន្តនោះបានជម្រាប់ជូនព័ត៌មានដល់អ្នកដំណើរទាំងអស់ អំពីសុវត្ថិភាពដ៏គួរឲ្យប្រុងប្រយ័ត្ន» ៕ ចន្ទី
