ក្រោយពីបានបាញ់បោះសេរីអស់ជាច្រើនគ្រាប់ នៅរសៀលថ្ងៃទី ០២ ខែឧសភា នេះ សមត្ថកិច្ចបានបញ្ចូនខ្លួនលោកហ៊ុន ជា ទៅដល់អយ្យការ អមសាលាដំបូងរាជធានីភ្នំពេញហើយ ដើម្បីចាត់ការបន្តតាមនីតិវិធី។
យោងតាមសេចក្ដីរាយការណ៍បឋមបានឱ្យដឹងថា មកទល់ពេលនេះ លោក ហ៊ុន ជា កំពុងស្ថិតនៅក្នុងចំណាត់ការនីតិវិធីរបស់ព្រះរាជអាជ្ញារងអមសាលាដំបូងរាជធានីភ្នំពេញ គឺលោក សៀង សុខ ។
គួរបញ្ជាក់ដែរថា កាលពីវេលាម៉ោង ១១យប់ថ្ងៃទី១ ខែឧសភា ឆ្នាំ២០១៨ លោក ហ៊ុន ជា ព្រមទាំងអង្គរក្សបានធ្វើដំណើរដោយរថយន្តទំនើប មកដល់ទីតាំងមុខផ្ទះវេរលុយទ្រូម៉ាន់នី យីហោ គឹម ឡេង ក៏បានដកកាំភ្លើងខ្លី ២ដើម បាញ់អស់ចំនួនច្រើនគ្រាប់ បង្កឱ្យមានការភ្ញាក់ផ្អើលយ៉ាងខ្លាំង ដែលករណីនេះបានកើតឡើងនៅ តាមបណ្តោយផ្លូវ១១៨កែងផ្លូវ៥៣ មុខផ្ទះវេរលុយទ្រូម៉ាន់នី យីហោ គឹម ឡេង ស្ថិតនៅក្នុងសង្កាត់ផ្សារថ្មី១ ខណ្ឌដូនពេញ ៕ សាវុធ