ភ្នំពេញ ៖ ប្រជាពលរដ្ឋប្រមាណ៣០០នាក់ មកពីខេត្តកោះកុង បាននាំមកតវ៉ានៅមុខក្រសួងដែនដី នគរូបនីយកម្មនិងសំណង់ ដើម្បីទាមទារដល់លោកទេសរដ្ឋមន្ត្រីជា សុផារ៉ា ជួយដោះស្រាយទំនាស់ដីធ្លីដ៏រ៉ាំរ៉ៃ របស់ពួកគាត់ ជាមួយលោកឧកញ៉ា លី យ៉ុងផាត់។ ការតវ៉ានេះ បានធ្វើងកាលពីរសៀលថ្ងៃទី២ខែឧសភាឆ្នាំ២០១៨ នៅមុខក្រសួងដែនដី។
ប្រជាពលរដ្ឋម្នាក់ បាននិយាយថា ពួកគាត់នាំគ្នាមកពីឃុំជីខលើ ស្រុកស្រែអំបិល ខេត្តកោះកុង ក្នុងថ្ងៃនេះ ដើម្បីរកដំណោះស្រាយ ។ ពលរដ្ឋរូបនោះ ដែលបាននិយាយក្នុងលក្ខខណ្ឌសុំមិនបញ្ចេញឈ្មោះ បានប្រាប់ថា ការដោះស្រាយក្នុងតំបន់មានទំនាស់នោះ គឺខាងក្រុមហ៊ុនស្ករអំពៅកោះកុងស៊ូហ្គ័រ (Koh kong Sugar)របស់លោកឧកញ៉ាលី យ៉ុងផាត់ បានដោះស្រាយសំណងមួយចំនួនជូនជាច្រើនគ្រួសារហើយ ចំណែកក្រុមពួកគាត់ជាង៣០០នាក់នេះមិនទាន់ដោះស្រាយនៅឡើយ ហើយក៏បាននាំគ្នាមកសុំឲ្យរដ្ឋមន្ត្រីជួយដោះស្រាយបញ្ចប់បញ្ហាតាមការសន្យានាពេលកន្លងមកនោះ។
ពលរដ្ឋដដែល បានស្នើដល់កុងសីក្រសួងដែនដី ឲ្យដោះស្រាយដីធ្លីជូនប្រជាពលរដ្ឋ ហើយឲ្យក្រុមហ៊ុននោះទទួលខុសត្រូវ។ ទី១ សុំដី ទី២ សុំផ្ដល់សំណងដែលក្រុមហ៊ុនបានឈូសឆាយបំផ្លិចបំផ្លាញដីធ្លីស្រែចម្ការពួកខ្ញុំ បាញ់សម្លាប់សត្វគោក្របី ដើម្បីសងពួកខ្ញុំវិញ។
ពលរដ្ឋឃុំជីខលើ មានវិវាទដីធ្លីជាមួយក្រុមហ៊ុនកោះកុងស៊ូហ្គ័រ របស់ លោក លី យ៉ុងផាត់ តាំងពីថ្ងៃទី១៩ ខែឧសភា ឆ្នាំ២០០៦ មក ដែលមានការប្ដឹងផ្ដល់គ្នាជាច្រើនលើកច្រើនសា ព្រមទាំងបានឡើងមកភ្នំពេញតវ៉ាស្ទើរគ្រប់ស្ថាប័នពាក់ព័ន្ធ តែពុំមានដំណោះស្រាយ៕ ដោយ៖បញ្ញាស័ក្តិ
