ស្ត្រីម្នាក់រងរបួសធ្ងន់ធ្ងរស្ទើរតែគ្មានជិវិតរស់ បន្ទាប់ពីត្រូវបានប្ដីរបស់នាងឈ្មោះលោក Jose Castillo អាយុ ៦៦ឆ្នាំ ចាក់ប្រហារដោយទួណឺវីស ខណៈដែលនាងអង្គុយមិនដឹងខ្លួនអ្វីសោះនៅក្នុងហាងសម្លៀកបំពាក់មួយកន្លែងក្នុងទីក្រុងញូយ៉ក ។
ស្ត្រីរងគ្រោះពុំឱ្យស្គាល់ឈ្មោះ នាងមានអាយុ ៣៣ឆ្នាំ ទើបតែមកពីសាធារណរដ្ឋដូមីនីកែន បច្ចុប្បន្នជាអ្នករត់តុនៅក្នុងទីក្រុងញូយ៉ក ។ នាងមានកូនស្រីម្នាក់ជាមួយប្ដីរបស់នាងដែលជាជនបង្កអាយុ ៥ឆ្នាំ ។
យោងតាមកាមេរ៉ាសុវត្ថិភាពបានបង្ហាញឱ្យឃើញថា ខណៈដែលនារីរងគ្រោះអង្គុយនៅក្នុងហាងកើតហេតុ គេឃើញប្ដីរបស់នាងដើរចូលមក រួចប្រើទួណឺវីស ចាក់ទៅលើនាងទាំងកម្រោលតែម្ដង ។ ដោយសារតែភាពភ័យខ្លាច ធ្វើឱ្យស្ត្រីរងគ្រោះពុំអាចរត់គេចពីក្រញ៉ាំជនដៃដល់ រហូតទាល់តែមានការអន្តរាគមន៍ពីសំណាក់ម្ចាស់ហាងឈ្មោះលោក Angel Sierra ដោយជួយចាប់ជនដៃដល់ចេញ បើពុំដូច្នេះទេស្ត្រីរងគ្រោះច្បាស់ជាគ្មានជិវិតរស់ឡើយ ។
ក្រោយកើតហេតុ ជនដៃដល់ត្រូវបានសមត្ថកិច្ចចាប់ខ្លួន ចំណែកស្ត្រីរងគ្រោះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈមកទល់ពេលនេះពុំទាន់បានធូរស្រាលនៅឡើយដោយសារស្ថានភាពរបួសពេញខ្លួន ហើយនាងអាចដង្ហើមបានតាមបំពង់តែប៉ុណ្ណោះ ។
ជនដៃដល់ត្រូវបានប៉ូលិសចាប់ខ្លួន និងចាត់ការតាមច្បាប់ ដោយចោទប្រកាន់ពីបទមនុស្សឃាតដោយចេតនា ៕ សាវុធ