ភ្នំពេញ ៖ ក្នុងពិធីអបអរសាទរទិវាឆ្មបអន្តរជាតិ ៥ ឧសភា ២០១៨ ក្រោមប្រធានបទ ឆ្មបនាំមកនូវការថែទាំប្រកបដោយគុណភាព ដោយមានការអញ្ជើញចូលរួមជាគណៈអធិបតីលោកសាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលនោះ និងមន្ត្រីសុខាភិបាល ឆ្មបយ៉ាងច្រើនកុះករ នៅសណ្ឋាគារភ្នំពេញ កាលពីថ្ងៃទី២ខែឧសភាឆ្នាំ២០១៨ បានរងការរិះគន់យ៉ាងខ្លាំងពីបណ្តាញសង្គមហ្វេសប៊ុក ក៏ដូចជាអ្នកចូលរួមក្នុងកម្មវិធីផងដែរ ដែលមិនបានពិនិត្យឲ្យបានដិតដល់លើការសរសេរអក្សរ។ ការរិះគន់នោះ ដោយសារតែអ្នកកាន់កម្មវិធីនិងអ្នករៀបចំកម្មវិធី បានសរសេរលើផ្ទាំងបដាកន្លែងគណៈអធិបតីអង្គុយយ៉ាងខ្ពស់ជាងគេ ខុសអក្ខរាវិរុទ្ទ ដោយបានប្រែក្លាយពី ទិវាឆ្មបអន្តរជាតិ ទៅជាទិវាធ្មបអន្តរជាតិទៅវិញ។
តាមរយៈផេកហ្វេសប៊ុក ដែលមានឈ្មោះម៉ៅ ច័ន្ទដារា បានសរសេររិះគន់ក្នុងផេកផ្លូវការរបស់លោកថា “មុនយកបដាមកដាក់ ហេតុអ្វី មិនព្រមនាំគ្នាបើកភ្នែកមើលផងទាន? សរសេរខុស ថ្ងៃ ខែ ឆ្នាំ? ថ្ងៃនេះ ថ្ងៃទី២ ខែឧសភា ឆ្នាំ២០១៨ ទេតើ លោកព្រះ?? ទិវាធ្មបជាតិ ហីចុះបើថែមបន្តក់មួយពីលើ (ប) មិនអានថា (ទិវាធ្មប់ជាតិ) ទៅហើយ ទាន???
តាមពិត គេចង់សរសេរថា “ទិវាឆ្មបជាតិ” តែអ្នកវាយអត្ថបទ គាត់ច្រឡំអក្សរ! (សូមកុំប្រើពាក្យអសុរស ណាទានណា៎!)”។
លោកសាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងថា ក្រោមការយកចិត្តទុកដាក់ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន បានធ្វើឱ្យវិស័យសុខាភិបាលនៅកម្ពុជា មានការរីកចម្រើនជាពិសេសកំណើនឆ្មប យ៉ាងឆាប់រហ័ស។
ថ្នាក់ដឹកនាំបានយកចិត្តទុកដាក់លើកម្ពស់បន្ថែមប្រាក់បៀវត្សរ៍ មូលដ្ឋាន និងប្រាក់មុខងារជូនដល់បុគ្គលិកមន្ត្រីរាជការសុខាភិបាលមិនប៉ុណ្ណោះ ចំពោះឆ្មបវិញរាជរដ្ឋាភិបាលបានបន្ថែមប្រាក់លើកទឹកចិត្ត ដល់ឆ្មបណាបានបង្កើតទារកមានសុខភាពល្អ មានសុវត្ថិភាពនៅតាមមណ្ឌលសុខភាព និងមន្ទីពេទ្យនានារប់សរដ្ឋផងដែរ។
លោកសាស្ត្រចារ្យ បានបន្ថែមទៀតថា មិនតែប៉ុណ្ណោះឆ្មបត្រូវបានលើកតម្កើនស្ថានភាពជាមន្ត្រីរាជការ ការលើកកម្ពស់ឋានានុក្រម មួយកម្រិតទៀត ។
លោករដ្ឋមន្ត្រីបានបញ្ជាក់ថា គុណតម្លៃរបស់ឆ្មប គឺបានចូលរួមថែទាំអាយុជីវិតមនុស្សពីរនាក់ មានន័យស្ត្រីនៅពេលសម្រាលកូន ត្រូវបានយកចិត្តទុកដាក់ពីសំណាក់ឆ្មប ដើម្បីសង្គ្រោះកូនក្នុងផ្ទៃ និងម្តាយនៅពេលសម្រាលកូនដែលជាដំណាក់កាលមួយដ៏ពិបាកសម្រាប់ស្ត្រី និងកូន ដូច្នេះឆ្មបមានសារៈសំខាន់ខ្លាំងណាស់ ដើម្បីជួយសម្រាលបន្ទុកមាតា និងទារក។
លោកបណ្ឌិតសាស្ត្រចារ្យ បានបញ្ជាក់បន្ថែមទៀតថា បច្ចុប្បន្ននេះ រាជរដ្ឋាភិបាលព្យាយាម បង្កើនចំណេះដឹងដល់ឆ្មបឱ្យកាន់តែមានជំនាញ ចំណេះដឹង វិជ្ជាជីវៈឱ្យមានប្រសិទ្ធភាពខ្ពស់បន្ថែមទៀត ដើម្បីកាត់បន្ថយការខ្លះខាតការថែទាំ និងការធ្វេសប្រហែសនៃការមិនយល់ដឹងដោយប្រការណាមួយ។
គិតត្រឹមខែធ្នូ ឆ្នាំ២០១៧ ឆ្មប ដែលបានចុះបញ្ជីសរុបចំនួន៧០៨២នាក់ ក្នុងនោះសេវាសាធារណៈ មានចំនួន៦៣៩១នាក់ ស្មើនឹង៩៦ភាគរយ សេវាឯកជន មានចំនួន៥១៤នាក់ អង្គការក្រៅរដ្ឋាភិបាល (ឆ្មបខ្មែរ) មានចំនួន១៦៩នាក់ និងឆ្មបបរទេស មានចំនួន៨នាក់៕ ដោយ ៖ បញ្ញាស័ក្តិ