ខេត្តកំពង់ចាម ៖ មានករណីគ្រោះថ្នាក់ចរាចរពេលដែលបុរសម្នាក់បើកម៉ូតូដួលកណ្តាលផ្លូវ ហើយរថយន្តមកដល់ បុកនិងកិនបន្ថែម ស្លាប់ម្នាក់នៅនឹងកន្លែង កាលពីថ្ងៃទី២ ខែឧសភា ឆ្នាំ២០១៨ វេលាម៉ោង១រសៀល ស្ថិតនៅភូមិតាមាង ឃុំកោះរកា ស្រុកកំពង់សៀម ខេត្តកំពង់ចាម។
នគរបាលមូលដ្ឋានស្រុកកំពង់សៀម បានឲ្យដឹងថា ម៉ូតូម៉ាកScoopy ពណ៌ផ្កាឈូក ពាក់ស្លាកលេខ កំពង់ចាម 1M-6047 បើកបរដោយឈ្មោះ ចេន ហ្សូង់ទីន ភេទប្រុស អាយុ១៦ឆ្នាំ មានទីលំនៅភូមិកោះរកាក្រៅ ឃុំកោះរកា ស្រុកកំពង់សៀម ខេត្តកំពង់ចាម ចំណែករថយន្ត ម៉ាកហាយឡិនឌ័រ ពណ៌ស ពាក់ស្លាកលេខ ភ្នំពេញ 2AF-9185 បើកបរដោយឈ្មោះ សូ សុវណ្ណារ៉េត ភេទប្រុស អាយុ២៨ឆ្នាំ មានទីលំនៅភូមិទី៧ សង្គាត់កំពង់ធំ ក្រុងស្ទឹងសែន ខេត្តកំពង់ធំ។
នៅមុនពេលកើតហេតុ ជនរងគ្រោះ បើកម៉ូតូពីទិសខាងកើតទៅលិច ដោយដឹកធុងហ្គាសធំមួយ លុះមកដល់កន្លែងកើតហេតុ ជនរងគ្រោះក៏បានបានដួល ហើយគាប់ជួនពេលនោះ ក៏មានរថយន្តមួយគ្រឿងបើកពីទិសខាងលិចទៅកើតបញ្ច្រាសទិសគ្នា បុកនិងកិនជនរងគ្រោះផ្លោងចូលក្រោមរថយន្ត បណ្តាលឲ្យបុកស្លាប់តែម្តង។ វត្ថុតាងទាំងពីរ ត្រូវសមត្ថកិច្ចជំនាញ បានយកមករក្សាទុក នៅអធិការដ្ឋាននគរបាលស្រុកកំពង់សៀម រង់ចាំការដោះស្រាយ៕ ដោយ ៖ បញ្ញាស័ក្តិ