ភ្នំពេញ៖ នាថ្ងៃទី៣ ខែឧសភា ឆ្នាំ២០១៨ ទិវាសេរីភាពសារព័ត៌មានសកលលោក ឆ្នាំ២០១៨នេះ ក្រោមប្រធានបទ ប្រព័ន្ធផ្សព្វផ្សាយ និងនីតិរដ្ឋ ដែលមានសារសំខាន់ស្របតាមតម្រូវការចាំបាច់របស់រាជរដ្ឋាភិបាលកម្ពុជា ដែលចង់ឱ្យប្រព័ន្ធមានថាមពល និងប្រកបដោយគុណភាព យុត្តិធម៌ និងការទទួលខុសត្រូវក្នុងការផ្តល់ព័ត៌មានពិត ដែលជាកញ្ចក់ឆ្លុះបញ្ចាំងនូវការពិតជាក់ស្តែងក្នុងសង្គម មិនឆ្វេងពេក មិនស្តាំពេក គឺចលនាកណ្តាល ដែលអាចទទួលយកបានទាំងអស់គ្នា ហើយសំខាន់បំផុត គឺហ៊ាននិយាយការពិត និងរិះគន់ក្នុងន័យស្ថាបនា ដើម្បីចូលរួមក្នុងការលើកស្ទួយលទ្ធិប្រជាធិបតេយ្យ កសាងសង្គមមួយមានយុត្តិធម៌ នីតិរដ្ឋ សុខសន្តិភាព និងការអភិវឌ្ឍប្រកបដោយចីរភាព ដែលជាបំណងប្រាថ្នា និងជាចក្ខុវិស័យរបស់រាជរដ្ឋាភិបាលកម្ពុជា។
សារលិខិតសម្តេចតេជោ ហ៊ុន សែន បានលើកឡើងថា ទិវាសេរីភាពសារព័ត៌មាន ក្នុងគោលបំណងលើកស្ទួយសេរីភាពនៃការបញ្ចេញមតិសេរីភាពសារព័ត៌មាន និងធានាបាននូវការផ្សព្វផ្សាយព័ត៌មានប្រកបដោយគុណភាព យុត្តិធម៌ និងការទទួលខុសត្រូវតាមវិជ្ជាជីវៈ ដើម្បីលើកស្ទួយតម្លៃសារព័ត៌មាន និងជំរុញឲ្យសារព័ត៌មានដើរតួនាទីកាន់តែសកម្ម និងមានសារសំខាន់ថែមទៀត នៅក្នុងសង្គមប្រជាធិបតេយ្យ និងជាដៃគូរបស់រាជរដ្ឋាភិបាលដែលមិនអាចខ្វះបាន។
សម្តេចតេជោ បានថ្លែងថា “ជាថ្មីម្តងទៀត ខ្ញុំសូមបងប្អូនអ្នកសារព័ត៌មានទាំងអស់ ចៀសវាងឲ្យបាននូវការផ្សាយព័ត៌មានមិនពិត ការក្លែងព័ត៌មាន បន្តុះបង្អាប់នាំឲ្យមានការស្អប់គុំកួន ការញុះញង់អុជអាលឲ្យមានការប្រកាន់ពូជសាសន៍ ពណ៌សម្បុរ ភេទ ជំនឿ សាសនា និន្នាការនយោបាយ និងការផ្សព្វផ្សាយព័ត៌មានដែលបង្កឲ្យកើតមានអរិភាពដល់ទំនាក់ទំនងជាមួយប្រទេសដទៃ ដែលបង្កប់ទៅដោយចេតនាទុច្ចរិតក្នុងគោលបំណងបង្កចលាចលក្នុងសង្គមធ្វើឲ្យប៉ះពាល់សណ្តាប់ធ្នាប់សាធារណៈ ដែលទង្វើទាំងនេះ ជាអំពើល្មើសរបស់អ្នកសារព័ត៌មានដែលគ្មានវិជ្ជាជីវៈ គ្មានការទទួលខុសត្រូវ បង្កើតជាបញ្ហា បង្កឲ្យមានការបែកបាក់ជាតិសាសន៍ និងមានសង្គ្រាមជាមួយបរទេស បង្កឲ្យអន្តរាយដល់ប្រទេសជាតិ។ ការជេរប្រមាថ ការញុះញង់ឲ្យកើតមានជម្លោះជាតិសាសន៍ឬ ជម្លោះប្រដាប់អាវុធបង្កសង្គ្រាមនោះ មិនមែនជាវិជ្ជាជីវៈរបស់អ្នកសារព័ត៌មានទេ ហើយក៏មិនមែនជាដំណើរការនៃលទ្ធិប្រជាធិបតេយ្យដែរ” ។
សម្តេចក៏បានអំពាវនាវផងដែរ ដល់អ្នកសារព័ត៌មានជាតិ និងអ្នកសារព័ត៌មានបរទេស ទាំងអស់ ដែលកំពុងបំពេញការងារនៅក្នុងព្រះរាជាណាចក្រកម្ពុជា និងបំពេញការងារនៅបរទេសក្តី សូមយកចិត្តទុកដាក់អនុវត្តន៍ឲ្យបានត្រឹមត្រូវតាមក្រមសីលធម៌ វិជ្ជាជីវៈ ចៀសវាងការផ្សព្វផ្សាយព័ត៌មានតែមួយជ្រុង ហើយឆ្លុះបញ្ចាំងសភាពការទាំងមូល ដោយពុំបានគិតអំពីក្បួនខ្នាតក្រឹត្យក្រមនៃការសរសេរព័ត៌មានឬការផ្សព្វផ្សាយព័ត៌មានមិនពិត បំប៉ោងសភាពការណ៍ ដោយគិតតែអំពីផលប្រយោជន៍ផ្ទាល់ខ្លួនធ្វើឲ្យបាត់បង់តម្លៃសារព័ត៌មានខ្លួនឯង និងខិតខំអភិវឌ្ឍឲ្យមានការយល់ដឹងខ្ពស់ មានសមត្ថភាពក្នុងការវិភាគសភាពការណ៍ទាំងព្រឹត្តិការណ៍ជាតិ និងអន្តរជាតិដើម្បីដើរទាន់ការអភិវឌ្ឍសភាពការណ៍សកលលោក។ ដោយ៖បញ្ញាស័ក្តិ
ខាងក្រោយជាខ្លឹមសារទាំងស្រុងនៃសាលិខិតរបស់ប្រមុខរាជរដ្ឋាភិបាលកម្ពុជាដូចតទៅ៖
