ពូកអ្នកវិទ្យាសាស្ត្រនៅអាហ្វ្រិកខាងត្បូង កំពុងលើកឡើងពីគោលគំនិតអូសទាញភ្នំទឹកកកដែលកំពុងរសាត់អណ្តែតនៅប៉ូលខាងត្បូង មកកាន់ដីគោក ដើម្បីផ្គត់ផ្គង់ទឹកស្អាតដល់ទីក្រុង Cape Town ដែលបច្ចុប្បន្នកំពុងរងស្ថានភាពកង្វះទឹកស្អាតព្រោះតែគ្រោះរាំងស្ងួតត្រូវបានអូសបន្លាយ ។
ប្រជាជនតម្រៀបជួរគ្នា រង់ចាំត្រងទឹកសាបនៅបំពង់ទឹកសាធារណៈមួយ កាលពីថ្ងៃទី ១៩ ខែមករា ។
បច្ចុប្បន្ននេះ ក្រុមអ្នកវិទ្យាសាស្ត្រលំដាប់ដំបូងនៃសកលវិទ្យាល័យ Cape Town កំពុងពិនិត្យមើលពីភាពវិជ្ជមានក្នុងអនុវត្តផែនការនេះ។
បើគិតតាមការគណនារបស់អ្នកវិទ្យាសាស្ត្ររៀងរាល់ឆ្នាំ ភ្នំទឹកកកដែលផ្តាច់ចេញពីតំបន់ប៉ូលខាងត្បូងមានទម្ងន់សរុបដល់ទៅ 2.000 ពាន់លានតោន ។ ក្រោយពេលផ្តាច់ចេញភ្នំទឹកកកទាំងនោះបានអណ្តែតតាមចរន្តរបស់ទឹក ហើយបានរលាយបន្តិចម្តងៗក្នុងសមុទ្រ ។ ចម្ងាយផ្លូវដែលត្រូវគេអូសពីតំបន់និរតី មកកាន់ទីក្រុង Cape Town គឺមានចម្ងាយ 2.700 km ។
អាហ្វ្រិកខាងត្បូងកំពុងប្រឈមស្ថានភាពខ្វះទឹកដ៏អាក្រក់បំផុត ក្នុងច្រើនសតវត្សរ៍មកនេះ ។ តាម Sloane ដែលជាប្រធានក្រុមបច្ចេកទេសរបស់ Southern Ice ។ ឲ្យដឹងថា លោកអាចអូសផ្ទាំងទឹកកកដែលធំសម្បើមនោះ តាមរយៈសំណាញ់នៅខាងក្រោមទឹក ហើយប្រើបច្ចេកវិទ្យា ក្រណាត់ទន់ ដើម្បីផ្ទុកកុំឲ្យផ្ទាំងទឹកកកទាំងនោះរលាយមុនពេលមកដល់អាហ្វ្រិកខាងត្បូង តាមយៈការបន្ថយល្បឿន ចំហាយទឹក ។ តាមលោកវាអាចបាត់បង់បរិមាណប្រហែល ៣០% ប៉ុណ្ណោះ។
រដ្ឋធានី Cape Town របស់អាហ្វ្រិកខាងត្បូងត្រូវបានព្រមានថា បណ្តាចរន្តទឹកនៅក្រោមដី អាចនឹងរាំងស្ងួតនៅឆ្នាំក្រោយប្រសិនបើគ្មានភ្លៀង ៕ ចន្ទ្រា
