កណ្តាល៖ កម្លាំងជំនាញប្រឆាំងគ្រឿងញៀន នៃអធិការដ្ឋាននគរបាលស្រុកកោះធំ បង្ក្រាបនិងឃាត់ខ្លួនជនជាតិវៀតណាម៥នាក់ ក្នុងករណីជួញដូរនិងប្រើប្រាស់ដោយខុសច្បាប់នូវសារធាតុញៀន កាលពីថ្ងៃពុធ ថ្ងៃទី២ ខែឧសភា ឆ្នាំ២០១៨ វេលាម៉ោង១៥និង៣០នាទី នៅចំណុចផ្ទះជួលស្ថិតក្នុងភូមិព្រែកស៊ឹង ឃុំសំពៅពូន ស្រុកកោះធំ ខេត្តកណ្តាល។
មន្ត្រីនគរបាលស្រុកកោះធំ បានឲ្យដឹងថា ជនសង្ស័យសមត្ថកិច្ចឃាត់ខ្លួនមានចំនួន៥នាក់ រួមមាន៖ ១-ឈ្មោះ ដាំង ថាន់ធី ភេទស្រី អាយុ ២០ឆ្នាំ ជនជាតិវៀតណាម មានទីលំនៅទីក្រុងហូជីមិញ ប្រទេសវៀតណាម មុខរបរមិនពិតប្រាកដ ,២-ឈ្មោះ ជា វិបុល(ហៅឡុង) ភេទប្រុស អាយុ៣០ ឆ្នាំ ជនជាតិខ្មែរ មានទីលំនៅ ផ្ទះ3DE1 ផ្លូវ388 ភូមិ3 មុខរបរបុគ្គលិកកាស៊ីណូ NAGA,៣-ឈ្មោះ ប៊ួយ ធីជិន ភេទស្រី អាយុ ២៧ ឆ្នាំ ជនជាតិវៀតណាម មានទីលំនៅភូមិ អានថេរ ឃុំអានថេរ ស្រុកកេសិត ខេត្តសុចាំង ប្រទេសវៀតណាម មុខរបរបុគ្គលិកកាស៊ីណូក្រេនដ្គ្រាកនរីសត ,៤-ឈ្មោះ ង្វៀង យាំងសាង ភេទប្រុស អាយុ២៧ឆ្នាំ ជនជាតិវៀតណាម មានទីលំនៅភូមិប៉ិនយី ឃុំឃិនប៉ិន ស្រុកអាងភូ ខេត្តអាងយ៉ាង ប្រទេសវៀតណាម មុខរបរទិញលក់ផ្លែស្វាយ និងទី៥-ឈ្មោះ ប៊ួយ ធីគីមទ្រី ភេទស្រី អាយុ ២៧ឆ្នាំ ជនជាតិវៀតណាម មានទីលំនៅទីក្រុងហូជីមិញ ប្រទេសវៀតណាម មុខរបរបុគ្គលិកបម្រើហាងខារ៉ាអូខេ(ជ្រៃធំ)។ វត្ថុតាងចាប់យករួមមាន៖
១-ម្ស៉ៅក្រោមពណ៌សថ្លាសង្ស័យសារធាតុ ញៀន(ម៉ាទឹកកកIce)ចំនួន២កញ្ចប់ធំ,អ៊ិចស្តាស៊ី(ADMA) ១៣គ្រាប់,ថ្នាំម៉ាទឹកកកលាយ ADMAចំនួន២កញ្ចប់តូច,ADMA បំបែកហើយចំនួន១កញ្ចប់តូច និងកញ្ឆាក្រៀមចំនួន១កញ្ចប់។២-ទូរស័ព្ទចល័តចំនួន៩គ្រឿង IPHONE 6 PLUS ចំនួន៤គ្រឿង,ម៉ាក HIYA ពណ៌ខ្មៅចំនួន១គ្រឿង,ម៉ាក HIC ពណ៌សចំនួន១គ្រឿង,ម៉ាក HUAWEL ពណ៌សចំនួន១គ្រឿង,ម៉ាក់ APPO ពណ៌សចំនួន១គ្រឿង,ម៉ាក W ពណ៌ស ចំនួន១គ្រឿង។ ៣-ប្រាក់វៀតណាមចំនួន ១.៥៦៦.០០០ដុង, ប្រាក់ដុល្លារចំនួន ១៥១ដុល្លារ និងប្រាក់រៀលចំនួន ៧៣០០រៀល និង៤-សម្ភារៈកែច្នៃប្រើប្រាស់គ្រឿងញៀនមួយចំនួន។
កាលពីពេលវេលាកើតហេតុខាងលើ កម្លាំងនគរបាលនៃអធិការដ្ឋាននគរបាលស្រុកកោះធំ សហការជាមួយកម្លាំងប៉ុស្តិ៍សំពៅពូន ចុះបង្ក្រាប់មុខសញ្ញាជួញដូរ រក្សាទុក និងប្រើប្រាស់សារធាតុញៀន នៅផ្ទះជួល ចំណុចភូមិព្រែកស៊ឹង ឃុំសំពៅពូន ក៏បានជួបមុខសញ្ញាសង្ស័យ ២នាក់ ១-ឈ្មោះ ដាំង ថាន់ហ្វី ២-ឈ្មោះ ជា វិបុល ។ សមត្ថកិច្ចបានធ្វើការឆែកឆេរត្រួតពិនិត្យបន្ទប់ជួលដែលអ្នកទាំងពីរជួលស្នាក់នៅ រកឃើញមាន ម្ស៉ៅក្រោមពណ៌សថ្លាសង្ស័យសារធាតុញៀន(ម៉ាទឹកកកIce)ចំនួន ២កញ្ចប់ធំ អ៊ិចស្តាស៊ី(ADMA) ១៣ គ្រាប់ ថ្នាំម៉ាទឹកកកលាយ ADMA ចំនួន១កញ្ចប់តូច ADMA បំបែកហើយចំនួន ១ កញ្ចប់តូច និង កញ្ឆាក្រៀមចំនួន ១ កញ្ចប់ ប្រាក់រៀលមួយចំនួន និងសម្ភារៈកែច្នៃប្រើប្រាស់គ្រឿងញៀនមួយចំនួន។ ពេលនោះក៏បន្តឆែកឆេរបន្ទប់ជួលក្បែរគ្នារកឃើញថ្នាំញៀន(ម៉ាទឹកកក)លាយជាមួយអ៊ិចស្តាស៊ី(ADNA)ចំនួន១កញ្ចប់តូចប្រាក់មួយចំនួននិងសម្ភារៈកែច្នៃប្រើប្រាស់គ្រឿងញៀនមួយចំនួន រួមជាមួយជនសង្ស័យចំនួន ៣ នាក់ទៀត ១.ឈ្មោះប៊ួយ ធីជិន ភេទស្រី អាយុ ២៧ ឆ្នាំ ២.ឈ្មោះ ង្វៀង យ៉ាំងសាង ភេទប្រុស អាយុ ២៧ឆ្នាំ ឈ្មោះ ប៊ួយ ធីគីមធី ភេទស្រី អាយុ ២៧ឆ្នាំ ។
ភ្លាមនោះ ជនសង្ស័យទាំង ៥នាក់ខាងលើ រួមនិងវត្ថុតាងដូចបានចាប់យកខាងលើ ត្រូវបានបញ្ជូនមកកាន់អធិការដ្ឋាននគរបាលស្រុកកោះធំ ដើម្បីចាត់ការបន្តតាមនីតិវិធី ៕ ដោយ ៖ បញ្ញាស័ក្តិ