ភ្នំពេញ ៖ ក្នុងកិច្ចប្រជុំជាមួយតំណាងក្រសួង ស្ថាប័នពាក់ព័ន្ឋ អាជ្ញាធរខេត្តព្រះសីហនុ និងក្រុមហ៊ុន វិនិយោគចំនួន២៤ មកពីខេត្តព្រះសីហនុ នៅទីស្តីការក្រសួងបរិស្ថាន នាព្រឹកថ្ងៃទី២ ខែឧសភា ឆ្នាំ២០១៨ លោក សាយ សំអាល់ រដ្ឋមន្ត្រីក្រសួងបរិស្ថាន បានលើកទឹកចិត្តដល់ក្រុមហ៊ុនវិនិយោគទាំងអស់ ដែលគិតគូពីបរិស្ថាននៅក្នុងគម្រោងអភិវឌ្ឍន៍របស់ខ្លួន។
លោក រដ្ឋមន្ត្រីក្រសួងបរិស្ថាន បានជំរុញដល់ក្រសួង ស្ថាប័នពាក់ព័ន្ធ អាជ្ញាធរមូលដ្ឋាន និងដៃគូសហការ ក្នុងការដោះស្រាយប្រព័ន្ធលូបង្ហូរទឹកកខ្វក់ ទាំងក្នុងទីក្រុងភ្នំពេញ និងនៅតាមបណ្តាខេត្ត ជាពិសេសខេត្តព្រះសីហនុនេះ ដើម្បីរក្សាគុណភាពទឹក និងរក្សាតំបន់ឆ្នេរនៅខេត្តព្រះសីហនុ ដែលជាបញ្ហាសំខាន់ត្រូវយកចិត្តទុកដាក់ ជៀសបង្កផលប៉ះពាល់ដល់សុខភាពសាធារណៈ និងសោភ័ណភាពទីក្រុង។ ជាមួយគ្នានេះ លោក រដ្ឋមន្ត្រី ក៏បានសំណូមពរ ដល់បណ្តាក្រុម ពាក់ព័ន្ធទាំងអស់ចូលរួម ធ្វើយ៉ាងណាឱ្យមានការកសាងអាងប្រព្រឹត្តិកម្មទឹកកខ្វក់ ក្នុងការលើកកម្ពស់ និងកែប្រែគុណភាពទឹកអោយមានភាពប្រសើរឡើង។
សូមបញ្ជាក់ថា កិច្ចប្រជុំស្តីពីកិច្ចគាំពារបរិស្ថានក្នុងខេត្តព្រះសីហនុបរិស្ថាន បានរៀបចំឡើង ដើម្បីពិភាក្សាអំពីបញ្ហាការបង្ហូរទឹកកខ្វក់ចូលទៅក្នុងសមុទ្រពីបណ្តាសណ្ឋាគារ រមណីដ្ឋាន តំបន់ពាណិជ្ជកម្មតាមបណ្តោយឆ្នេរសមុទ្រ ស្ថិតក្នុងភូមិសាស្ត្រខេត្តព្រះសីហនុ។ កិច្ចប្រជុំ បានដាក់ចេញនូវចំណុចមួយចំនួន ដើម្បីរកដំណោះស្រាយសមស្របលើការធ្វើប្រព័ន្ធលូ ដែលបច្ចុប្បន្នកំពុងមានបញ្ហាប្រឈមរួមមាន ការជំរុញឱ្យមានការរៀបចំប្រព័ន្ធលូទឹកភ្លៀង និងលូទឹកស្អុយដាច់ដោយឡែកពីគ្នា និងត្រូវធ្វើការស្តារអូរធម្មជាតិឡើងវិញ ដើម្បីធានាលំហូរទឹកជាប្រក្រតីទាំងរដូវប្រាំង និងរដូវវស្សា ព្រមទាំង ត្រូវមានការកំណត់ទីតាំងដីចំណីមាត់អូរធម្មជាតិ ដើម្បីងាយស្រួលគ្រប់គ្រងក្នុងការបម្រើប្រយោជន៍រួម ។ អង្គប្រជុំបានស្នើឱ្យ មន្ត្រីជំនាញពាក់ព័ន្ឋ អាជ្ញាធរ បង្កើនការចូលរួមរបស់ប្រជាពលរដ្ឋ ក៏ដូចជាម្ចាស់ទីតាំងទាំងអស់ បំពាក់អាងប្រព្រឹត្តិកម្មទឹកកខ្វក់ សម្រាប់ធ្វើការសំអាត និងមានការឆ្លើយតបកម្រិតកំណត់ស្តង់ដាបញ្ចេញមុននឹងបង្ហូរចូលអូរធម្មជាតិ ចុងក្រោយគឺចូលសមុទ្រ ក៏ដូចជាស្វែងរក ការគាំទ្រជាថវិការរួម សម្រាប់រៀបចំអាងប្រព្រឹត្តិកម្ម ពីបណ្តាក្រុមហ៊ុនពាក់ព័ន្ធផងដែរ៕ ដោយ ៖ បញ្ញាស័ក្តិ