ភ្នំពេញ៖ លោក លី សៅប៊ីន (Liu Shaobin) អគ្គនាយក នៃអគ្គនាយកដ្ឋានសន្តិសុខក្រៅប្រទេស ក្រសួងការបរទេសចិន បានដឹកនាំប្រតិភូចូលសម្តែងការគួរសម និងសំណេះសំណាលការងារជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ នៅថ្ងៃទី៣ ខែឧសភា ឆ្នាំ២០១៨ទីស្តីការក្រសួង។ លោក លី សៅប៊ីន បានដឹកនាំគណៈប្រតិភូ មកកាន់ប្រទេសកម្ពុជា ដើម្បីចូលរួមកិច្ចប្រជុំពិគ្រោះយោបល់កម្ពុជា-ចិនលើកទី៣ ស្តីពី បញ្ហាសន្តិសុខគ្រប់ជ្រុងជ្រោយ និងកិច្ចប្រជុំក្រុមការងារការពារសន្តិសុខ នៃការអនុវត្តន៍គម្រោង ខ្សែក្រវ៉ាត់ និងផ្លូវ ឆ្នាំ២០១៨ ដែលធ្វើឡើង នៅខេត្តសៀមរាប ថ្ងៃទី៤ ខែឧសភា ឆ្នាំ២០១៨។
បន្ទាប់ពីបញ្ចប់ជំនួបនោះ លោក ជុំ សុន្ទរថា អ្នកនាំពាក្យក្រសួងការបរទេស បានឲ្យដឹងថា លោក លី សៅប៊ីន បានប្រកាសបង្ហាញពីការគាំទ្រដល់ដំណើរការបោះឆ្នោតនៅកម្ពុជា។ លោកអ្នកនាំពាក្យ បន្តថា អគ្គនាយក នៃអគ្គនាយកដ្ឋានសន្តិសុខក្រៅប្រទេស ក្រសួងការបរទេសចិន ដែលក្នុងនាមរដ្ឋាភិបាលចិន បានប្រកាសថា រដ្ឋាភិបាលចិន មានជំហរឥតងាករេ ក្នុងការគោរពឯករាជ្យ អធិបតេយ្យ និងចំណាត់ការរបស់រាជរដ្ឋាភិបាលកម្ពុជា ក្នុងការរក្សាការពារនូវសន្តិសុខ និងស្ថេរភាពនៅក្នុងប្រទេស។ លោក លី សៅប៊ីន បានអះអាងថា “រដ្ឋាភិបាលចិន គាំទ្រយ៉ាងពេញលេញ ចំពោះដំណើរការបោះឆ្នោតនៅកម្ពុជា”។
ក្នុងជំនួបនេះលោកទេសរដ្ឋមន្ត្រី ប្រាក់ សុខុន ក៏បានជម្រាបពីដំណើរនៃការបោះឆ្នោតនៅកម្ពុជាថា កំពុងប្រព្រឹត្តទៅក្នុងបរិយាកាសមួយល្អប្រសើរ ហើយមានគណបក្សនយោបាយជាច្រើន កំពុងរៀបចំដាក់បេក្ខភាព ចូលរួមប្រកួតប្រជែង ការបោះឆ្នោតជ្រើសរើស តំណាងរាស្ត្រ អាណត្តិទី៦ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។
លោកទេសរដ្ឋមន្ត្រី ប្រាក់ សុខុន បានគូសបញ្ជាក់ប្រាប់ប្រតិភូចិនថា គណបក្សចូលរួមប្រកួតប្រជែង ការបោះឆ្នោតនេះមានទាំងបក្សគាំទ្រ បក្សកាន់អំណាច និងបក្សនយោបាយ ដែលប្រឆាំងជាមួយបក្សកាន់អំណាច។
លោកទេសរដ្ឋមន្ត្រី ប្រាក់ សុខុន និងលោក លី សៅប៊ីន ក៏បានពិភាក្សាពីការពង្រឹងពង្រីកទំនាក់ទំនង និងកិច្ចសហប្រតិបត្តិការប្រទេសទាំងពីរ ដែលបច្ចុប្បន្នឈានដល់ខួប៦០ឆ្នាំហើយនោះ។ លោកទេសរដ្ឋមន្ត្រី ប្រាក់ សុខុន ក៏គ្រោងនឹងបំពេញទស្សនកិច្ចនៅប្រទេសចិននាចុងឆ្នាំ២០១៨នេះ ដើម្បីពង្រឹងទំនាក់ទំនង និងកិច្ចសហប្រតិបត្តិការជាយុទ្ធ សាស្ត្រគ្រប់ជ្រុងជ្រោយនៃប្រទេសទាំងពីរ៕ ដោយ៖បញ្ញាស័ក្តិ