សៀមរាប ៖ ផ្ទះវិឡាឈើរបស់ថៅកែតារាងវាយកូនគោលអង្គរហ្គោល រីសត ត្រូវបានអគ្គិភ័យលេបត្របាក់អស់ទាំងស្រុង នៅរសៀលថ្ងៃទី៣ ខែឧសភា ឆ្នាំ២០១៨ ស្ថិតនៅតារាងវាយកូនគោលអង្គរហ្គោល រីសតនៅក្នុងក្រុមទី៤ ភូមិរកាធំ សង្កាត់ស្រង៉ែ ក្រុងខេត្តសៀមរាប។
នគរបាលខេត្តសៀមរាប បានឲ្យដឹងថា ម្ចាស់ផ្ទះដែលត្រូវភ្លើងឆេះមានឈ្មោះ ហូ ឡិច ភេទប្រុស អាយុ ៤២ឆ្នាំ ជនជាតិឥណ្ឌូណេស៊ី មុខរបរថៅកែ តារាងវាយកូនគោលអង្គរហ្គោល រីសត រស់នៅក្នុងក្រុមទី៤ ភូមិរកាធំ សង្កាត់ស្រង៉ែ ក្រុងខេត្តសៀមរាប។ ផ្ទះដែលត្រូវភ្លើងឆេះមានទំហំ៩ម៉ែត្រគុណ១០ម៉ែត្រ។ កម្លាំងជំនាញ បង្ការពន្លត់អគ្គិភ័យនៃស្នងការនគរបាលខេត្តនិងកងរាជអាវុធហត្ថខេត្តនិងរថយន្តអង្គភាពបេតិកភណ្ឌ បានចេញជួយអន្តរាគមន៍ ប៉ុន្តែមិនអាចជួយបានដោយសារជាផ្ទះឈើ ទើបភ្លើងឆេះលឿនអស់តែម្តង។ ការសន្និដ្ឋានករណីឆេះនេះ បណ្តាមកពីរន្ទះបាញ់ឆេះ។ ចំណែកសម្ភារៈនៅក្នុងផ្ទះបណ្តាលឲ្យមានការខូចខាតទាំងស្រុង តែពុំបណ្តាលឲ្យមានគ្រោះថ្នាក់ដល់មនុស្សជីវិតឡើយ៕ ដោយ ៖ បញ្ញាស័ក្តិ