សៀមរាប ៖ លោកវរសេនីយ៍ត្រី នួន សក្តិចំរើនរិទ្ធ អធិការរងទទួលបន្ទុកព្រហ្មទណ្ឌនគរបាលក្រុងសៀមរាប បានឲ្យដឹងថា
ដោយមានការយកចិត្តដាក់ខ្ពស់ ពីសំណាក់ លោកអគ្គស្នងការនគរបាលជាតិ ប្រធាននាយកដ្ឋាននគរបាលព្រហ្មទណ្ឌ នឹងដោយមានការដឹកនាំបញ្ជារផ្ទាល់ ពីសំណាក់ លោកឧត្តមសេនីយ៍ត្រី ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប ករណីឃាតកម្ម កាលពីចន្លោះម៉ោង២០:៣០នាទីទៅម៉ោង២១:៣០នាទី ថ្ងៃទី២៣ ខែមេសា ឆ្នាំ២០១៨កន្លងទៅ លើជនរងគ្រោះ ឈ្មោះ ពិត បារាំង ភេទប្រុស អាយុ៤៩ឆ្នាំ មុខរបរ លក់គ្រឿងបន្លាស់រថយន្ត មានទីលំនៅខាងក្រោយសណ្ឋាគារគោកធ្លក ក្នុងភូមិគ្រួស សង្កាត់ស្វាយដង្គំ រហូតមកដល់ថ្ងៃទី៣ ខែឧសភា ឆ្នាំ២០១៨ នេះ នគរបាលខេត្តសៀមរាប បានបើកការស៊ើបអង្កេត ស្រាវជ្រាវបំបែកសំណុំរឿងដ៏ស្មុគស្មាញ នេះបានហើយ ដោយបានធ្វើការឃាត់ខ្លួនជនសង្ស័យ និងអ្នកជាប់ពាក់ព័ន្ធ បានចំនួន៣នាក់ដកហូតបានវត្ថុតាងបានមួយចំនួនផងដែរ។
លោកបន្តថា ជនសង្ស័យម្នាក់ ដែលសមត្ថកិច្ចចាប់ខ្លួននាពេលកន្លងទៅ មានឈ្មោះ ព្រហ្ម សុព្រឹក្ស ហៅ ថាន ភេទប្រុស អាយុ២៨ឆ្នាំ ដែលត្រូវបានចាប់ខ្លួនកាលពីថ្ងៃទី២៥ ខែមេសា ឆ្នាំ២០១៨នោះ ស្ថិតនៅចំណុចព្រៃគុយ ក្នុងឃុំអំពិល ស្រុកប្រាសាទបាគង ខេត្តសៀមរាប មិនមែនជាជនដៃដល់ពិតប្រាកដទេ គឺជននោះគ្រាន់តែជាសាក្សីតែប៉ុណ្ណោះ។
គិតត្រឹមល្ងាចថ្ងៃទី៣ ឧសភា ២០១៨ នេះ កម្លាំងសមត្ថកិច្ចនគរបាលខេត្តសៀមរាប បានធ្វើការឃាត់ខ្លួនជនសង្ស័យ៣នាក់ ពាក់ករណីសម្លាប់ថៅកែលក់គ្រឿងបន្លាស់រថយន្ត និងប្លន់យកទ្រព្យសម្បត្តិ។ ជនសង្ស័យ ១.ឈ្មោះ សយ ឡុន ភេទប្រុស អាយុ២៤ឆ្នាំ មុខរបរមិនពិតប្រាកដ ស្រុកកំណើតនៅភូមិថ្នល់ដាច់ ឃុំដានរុន ស្រុកសូទ្រនិគម ខេត្តសៀមរាប បានមកស្នាក់នៅបន្ទប់ជួល ភូមិសាលាកន្សែង សង្កាត់ស្វាយដង្គំ ក្រុងសៀមរាប ជាជនដៃដល់។ ២.ឈ្មោះ អ៊ុន ប៉ូឡូញ ភេទប្រុស អាយុ៣២ឆ្នាំ មុខរបររត់ម៉ូតូឌុប មានទីលំនៅភូមិដំដែក ឃុំដំដែក ស្រុកសូទ្រនិគម ជាអ្នករៀបគម្រោង និងដឹកជនដៃដល់ចេញពីកន្លែងកើតហេតុ និង ៣.ឈ្មោះ អ៊ី យូហាន ភេទប្រុស អាយុ២៦ឆ្នាំ មុខរបរលក់ទូរស័ព្ទ ទីនៅភូមិត្រពាំងសេះ សង្កាត់គោកចក ក្រុងសៀមរាប ជាអ្នកទិញទូរស័ព្ទពីជនដៃដល់។
គួររម្លឹកថា បុរសម្ចាស់អាជីវករលក់គ្រឿងបន្លាស់រថយន្តម្នាក់ត្រូវឃាតករចាក់សម្លាប់ដោយកាំបិតចុងស្រួចនាអំឡុងម៉ោង២១ ថ្ងៃទី២៣ ខែមេសា ឆ្នាំ២០១៨ ហើយទើបភ្ញាក់ផ្អើលនាម៉ោង៧ព្រឹក ថ្ងៃទី២៤ ខែមេសា ឆ្នាំ២០១៨ដដែល។ ជនរងគ្រោះឈ្មោះ ពិត បារាំង អាយុ៤៥ឆ្នាំ រស់នៅផ្ទះកើតហេតុភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
ក្រោយពីធ្វើសកម្មភាពហើយ ជនដៃដល់បាន រត់គេចខ្លួនបាត់។ សមត្ថកិច្ចបានអះអាងថា ជាករណីប្លន់ ហើយសម្លាប់ដោយមានរៀបគម្រោងទុក៕ ដោយ ៖ បញ្ញាស័ក្តិ