ខេត្តត្បូងឃ្មុំ ៖ នគរបាលខេត្តត្បូងឃ្មុំ បានឃាត់ខ្លួនឃាតករពីរនាក់បងប្អូនបង្កើត ក្នុងករណីសំណុំរឿងឃាតកម្មរំលោភសម្លាប់ស្រី្តខ្មែរអ៊ិស្លាម មានផ្ទៃពោះ៣ខែក្នុងចម្ការពោត ដោយសារខឹងសង្សារ មិនយកកូនចេញ ។ ជនសង្ស័យទាំងពីរនាក់ត្រូវបានបញ្ជូនទៅតុលាការ ដើម្បីចាត់ការតាមច្បាប់ផងដែរ។
ឃាតករទាំងពីរនាក់ត្រូវបានចាប់ខ្លួន កាលពីរសៀលថ្ងៃ ទី២ ឧសភា ឆ្នាំ២០១៨ ។ ក្នុងដំណាក់កាលនគរបាល ជនសង្ស័យ បានសារភាពថា ដោយសារខឹងនារីរងគ្រោះ មិនព្រមយកកូនចេញ ហើយខ្លាចបែបការណ៍ ក៏រួមដៃជាមួយបងស្រីរបស់ខ្លួន ហៅជនរងគ្រោះទៅចំការពោត រួមរក្សរួចរឹតកសម្លាប់តែម្តង ដើម្បីបំបិតភស្តុតាង។
សមត្ថកិច្ចនគរបាលខេត្តត្បូងឃ្មុំ បានឲ្យដឹងថា ជនសង្ស័យមាន ១-ឈ្មោះ សុះ ស្មីន ភេទស្រី អាយុ២៩ឆ្នាំ ជាខ្មែរអ៊ិស្លាម ២-ឈ្មោះ សុះ ហារើស ហៅទីន ភេទប្រុស អាយុ២៨ឆ្នាំ ។ ទាំងពីរនាក់ត្រូវជាបងប្អូនបង្កើត រស់នៅភូមិព្រែកតូច ឃុំជីរោទិ៍ទី១ ស្រុកត្បូងឃ្មុំ ។ ចំណែកស្ត្រីរងគ្រោះមាន ឈ្មោះ ទីន ហៃសាក់ អាយុ២៤ឆ្នាំ នៅភូមិព្រែកតូច ឃុំទន្លេបិទ ស្រុកត្បូងឃ្មុំ មានផ្ទៃពោះ៣ខែ ជាជនជាតិខ្មែរអ៊ិស្លាម ។ ស្ត្រីមានផ្ទៃពោះ៣ខែ ត្រូវបានប្រទះឃើញស្លាប់ នៅក្នុងចម្ការពោតមួយកន្លែង ជាប់មាត់ទន្លេមេគង្គ នៅមិនឆ្ងាយពីផ្ទះអ្នកស្លាប់ នៅយប់ថ្ងៃទី៣០ មេសា ២០១៨។
នៅចំពោះមុខសមត្ថកិច្ច ជនសង្ស័យឈ្មោះ សុះ ហារើស ហៅទីន បានសារភាពថា ខ្លួន នឹងស្ត្រីរងគ្រោះ ឈ្មោះ ទីន ហៃសាក់ បានស្រឡាញ់គ្នាលួចលាក់ជាយូរខែមកហើយ រហូតនាងមានផ្ទៃពោះ៣ខែទៀតផង ។ ដោយសារនាងមានផ្ទៃពោះខុសទំនៀម ទម្លាប់ប្រពៃណីខ្មែរអ៊ិស្លាម ខ្លួននឹងបងស្រី ក៏អង្វរនាងឲ្យយកកូនចេញ តែនាងមិនព្រម។ ដោយសារអង្វរនាង ច្រើនលើក នៅតែនាងមិនព្រម ទើបបងស្រីនិងខ្លួន មានផែនការសម្លាប់នាងចោល។ លុះមកដល់យប់ថ្ងៃទី៣០ ខែមេសា ឆ្នាំ ២០១៨ បងស្រីរបស់ខ្លួនបានទៅល្បួងលួងលោមនាងឲ្យទៅអូសមងជាមួយ។ លុះពេលនាងចាកចេញពីផ្ទះ បានបន្តិច បងស្រី បានប្រាប់ ឲ្យនាង ទៅជួបខ្លួន ក្នុងចម្ការពោត ហើយពេលទៅដល់ ខ្លួនចាប់អូសដៃ ឲ្យអង្គុយជជែកគ្នាបានបន្តិច ក៏នាំគ្នារួមរក្សបានសម្រេចម្តង។ បន្ទាប់មកខ្លួនបានប្រាប់ ឲ្យនាងត្រូវយកកូនចេញ តែនាងនៅតែប្រកែកដដែល ធ្វើឲ្យខ្លួនខឹងក៏ច្របាច់និងមួលកសម្លាប់ចោល ៕ ដោយ ៖ បញ្ញាស័ក្តិ