កណ្តាល ៖ នគរបាលស្រុកស្អាង បានឲ្យដឹងថា ករណីគ្រោះថ្នាក់ចរាចររដ៏រន្ធត់រវាងរថយន្តហាយឡែនឌ័រ បុកជាមួយម៉ូតូC125 បណ្តាលឲ្យស្លាប់ម្នាក់ ។ កើតហេតុនៅថ្ងៃព្រហស្បតិ៍ ថ្ងៃទី៣ ខែឧសភា ឆ្នាំ២០១៨ វេលាម៉ោង១៩ នៅចំណុចផ្លូវលេខ២១A ស្ថិតក្នុងភូមិលេខ២ ឃុំស្វាយរលំ ស្រុកស្អាង ខេត្តកណ្ដាល ។
ជនរងគ្រោះ មានឈ្មោះ នី រតនៈ ហៅទែក ភេទប្រុស អាយុ២២ឆ្នាំ មិនពាក់មួកការពារ មុខរបរកម្មករនៅដេប៉ូខ្សាច់ ស្នាក់នៅភូមិលេខ២ ឃុំស្វាយរលំ ស្រុកស្អាង ខេត្តកណ្ដាល និងមានទីលំនៅភូមិទួល ឃុំធាយ ស្រុកបាធាយ ខេត្តកំពង់ចាម បានបើកម៉ូតូម៉ាកហុងដា សេ១២៥ ពណ៌ខ្មៅ ពាក់ផ្លាកលេខ ភ្នំពេញ 1AW-6049 ធ្វើដំណើរក្នុងទិសដៅ ពីលិច មកកើត លុះពេលមកដល់ចំណុចកើតហេតុអ្នកបើកម៉ូតូខាងលើ បានបត់ឆ្វេងឆ្លងថ្នល់ ពីត្បូងមកជើង កាត់ពីមុខរថយន្តម៉ាក ហាយឡែនឌ័រ ពណ៌ទឹកប្រាក់ ពាក់ផ្លាកលេខភ្នំពេញ2Q-6222 ដែលកំពុងបើកបរបញ្ច្រាស់ទិសគ្នាពីកើតមកលិច គេចមិនទាន់ ក៏បុកបណ្ដាលអោយដួលបោកក្បាលស្លាប់ភ្លាមៗនៅនឹងកន្លែងកើតហេតុតែម្ដង ។ អ្នកបើកបររថយន្តមិនស្គាល់អត្តសញ្ញាណ រត់គេចខ្លួនបាត់។
ក្រោយពេលកើតហេតុ សមត្ថកិច្ចចរាចរណ៍ បានធ្វើការវាស់វែង និងដកហូតវត្ថុតាង ទាំងពីរ យកមករក្សាទុកនៅអធិការដ្ឋាននគរបាលស្រុកស្អាង ដើម្បីកសាងសំណុំរឿទៅតាមនីតិវិធីនៃច្បាប់ ចំណែកសាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។
នគរបាលមូលដ្ឋានបានសន្និដ្ឋានថ ករណីនេះ បង្កឡើងដោយអ្នកបើកបរម៉ូតូ បើកធ្វេសប្រហែស បត់ឆ្វេងឆ្លងផ្លូវ ដោយខ្វះការប្រុងប្រយ័ត្ន រីឯអ្នកបើកបររថយន្តបើកក្នុងល្បឿនលឿន ខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់ចរាចររហូតបង្កឲ្យមនុស្សស្លាប់ ៕ ដោយ ៖ បញ្ញាស័ក្តិ