មនុស្សយ៉ាងហោចណាស់ចំនួន ១០៩នាក់បានស្លាប់បាត់បង់ជីវិត និងជាច្រើននាក់ទៀតរងរបួស បន្ទាប់ពីព្យុះធូលីបានវាយប្រហារ រដ្ឋ Uttar Pradesh និងរដ្ឋ Rajasthan ភាគខាងជើងប្រទេស ឥណ្ឌា។ នេះបើតាមការចេញផ្សាយរបស់ BBC នៅថ្ងៃសុក្រនេះ។
ក្រៅពីផ្តាច់ជីវិតមនុស្សដ៏ច្រើន ព្យុះកំណាចនៅថ្ងៃពុធនោះ ក៏បានធ្វើឲ្យដាច់អគ្គសនី បំផ្លាញដើមឈើផ្ទះសម្បែង និងសត្វគោក្របីជាច្រើនផងដែរ។
ជនរងគ្រោះដែលស្លាប់ភាគច្រើន គឺកំពុងលង់លក់ក្នុងដំណេក នៅពេលផ្ទះរបស់ពួកគេបាករលំ ដោយសារអំណាចនៃព្យុះធូលី ដែលអមមកជាមួយរន្ទះបាញ់។
ក្នុងចំណោមអ្នកស្លាប់ទាំងអស់ មានចំនួន ៧៣នាក់ បានស្លាប់នៅក្នុងរដ្ឋ Uttar Pradesh ដែលពាក់កណ្តាលនៃជនរងគ្រោះស្លាប់នៅក្នុងស្រុក Agra ដែលជាកន្លែងរបស់វិមាន Taj Mahal។
សូមបញ្ជាក់ថា ព្យុះធូលីតែងតែកើតមានជាញឹកញាប់នៅភាគខាងជើងប្រទេសឥណ្ឌា ក្នុងកំឡុងរដូវក្តៅ ប៉ុន្តែការបាត់បង់ជីវិតមនុស្សចំនួនដ៏ច្រើនបែបនេះពិតជារឿងដ៏មិនធម្មតា៕ សុភ័ក្ត្រ