កណ្តាល ៖ អាជ្ញាធរស្រុកកណ្ដាលស្ទឹង បានកោះហៅតំណាងប្រជាពលរដ្ឋ ៧រូប ឲ្យចូលខ្លួនទៅសាលាស្រុក ធ្វើការស្វែងរក ដំណោះស្រាយ បញ្ហាដីធ្លី របស់ពួកគេ ដែលកំពុងកើតមានបញ្ហា ជាមួយក្រុមហ៊ុនឯកជន។ តំណាងពលរដ្ឋ ឲ្យដឹងថា ដីដែលមានបញ្ហានោះ គឺក្រុមហ៊ុនទិញ ដើម្បីយកទៅអភិវឌ្ឍន៍ធ្វើព្រលានយន្តហោះ ប៉ុន្តែមិនដឹងថា នឹងដំណើរនៅពេលណានោះទេ។
នេះបើតាមលោក ថេង សាវឿន ប្រធានសម្ពន្ធសហគមន៍កសិករកម្ពុជា បានថ្លែងក្នុងផេកហ្វេសប៊ុកថា នៅព្រឹកថ្ងៃទី៤ ខែឧសភា ឆ្នាំ២០១៨ តាមសេចក្ដីរាយករណ៍ថា មានប្រជាពលរដ្ឋសរុបប្រមាណ ជាង ៥០០ នាក់នៅឃុំអំពៅព្រៃ ស្រុកកណ្ដាលស្ទឹង ខេត្ត កណ្ដាល បាននាំគ្នាឡើងទៅសាលាស្រុកកណ្ដាលស្ទឹងជាថ្មី ដើម្បីស្វែងរក ដំណោះស្រាយបញ្ហាដីធ្លីរបស់ពួកគេដែលកំពុងកើតមាន ជាមួយក្រុមហ៊ុនឯកជន និងគាំទ្រដល់តំណាងប្រជាពលរដ្ឋ ៧រូបដែលត្រូវបានសាលាស្រុកធ្វើការកោះអញ្ជើញ ពិភាក្សាការទាមទារដីធ្លីរបស់ប្រជាពលរដ្ឋនៅឃុំអំពៅព្រៃនេះផងដែរ។
តំណាងពលរដ្ឋនៅឃុំអំពៅព្រៃ លោក ភោគ ផាន់នី បានឲ្យដឹងថា ករណីទំនាស់ដីធ្លីនៅខេត្តកណ្ដាល នាពេលកន្លងមក ពលរដ្ឋធ្លាប់នាំគ្នាតវ៉ានៅមុខសាលាស្រុកកណ្ដាលស្ទឹង ទាមទារឲ្យអាជ្ញាធរដោះស្រាយករណីក្រុមហ៊ុនបោះបង្គោលលើដីសហគមន៍របស់ពួកគាត់។ ពលរដ្ឋចោទប្រកាន់អាជ្ញាធរមូលដ្ឋានថា ឃុបឃិតគ្នាជាមួយជនខិលខូចលក់ដីសាធារណៈរបស់សហគមន៍ដើម្បីបំពេញប្រយោជន៍ផ្ទាល់ខ្លួន។ សហគមន៍ដីធ្លីនៅស្រុកកណ្ដាលស្ទឹង លើកឡើងថា ផ្ទៃដីដែលមានទំនាស់ប្រមាណ៤០០ហិកតា នៅឃុំអំពៅព្រៃ គឺជាដីសាធារណៈសម្រាប់ប្រើប្រាស់រួមគ្នារបស់ពលរដ្ឋជាង ២ពាន់គ្រួសារនៅឃុំមួយនេះ ហើយអាជ្ញាធរបានយកដីនេះទៅលក់ដោយស្ងៀមស្ងាត់។
លោកបន្ថែមទៀតថា មានក្រុមហ៊ុនចំនួន៥ ពាក់ព័ន្ធនឹងករណីទំនាស់ដីធ្លីនេះ ប៉ុន្តែមិនស្គាល់ឈ្មោះទាំងអស់ទេ គឺមានក្រុមហ៊ុនមួយឈ្មោះ ប៊ូ ស្រី ហើយបានបោះបង្គោលវាទីលើដីរួមរបស់ពលរដ្ឋនៅឃុំអំពៅព្រៃ ដោយពុំបានប្រាប់ពួកគាត់ឲ្យបានដឹងនោះទេ៕ ដោយ ៖ បញ្ញាស័ក្តិ