ភ្នំពេញ៖ ក្នុងទិវាសេរីភាពសារព័ត៌មានសាកលលោក លោករដ្ឋមន្ត្រីក្រសួងព័ត៌មាន បានបញ្ជាក់ថា សព្វថ្ងៃនេះមានអ្នកកាសែតស្រុកខ្មែរក្នុងចំណោម ១.០០០នាក់ ហើយមានតែអ្នកកាសែតមិនដល់ ១០០នាក់ផង ដែលអាចធ្វើជាអ្នកកាសែតមែនទែន និងសរសេរអត្ថបទជារៀងរាល់ថ្ងៃ។
លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា នៅភ្នំពេញមានអ្នកកាសែតច្រើន ប៉ុន្តែនៅខេត្តរតនគិរីដែលជាខេត្តតូចមួយសោះ មានអ្នកកាសែតរហូតដល់ជាង ៣០០អង្គភាព ហើយគិតមើល ក្នុងមួយថ្ងៃសរសេរអត្ថបទបានប៉ុន្មាន។ លោកបញ្ជាក់ថា “ខេត្តតូចមួយមានអ្នកកាសែតរហូតដល់ជាង ៣០០អង្គភាព តែអត់ដែលចេញអត្ថបទមួយទេ”។
លោក ខៀវ កាញារីទ្ធ មានប្រសាសន៍ថា អគ្គនាយ ឬចាងហ្វាងកាសែតមួយចំនួន ក្នុងស្រុកខ្មែរ មានអ្នកខ្លះ មិនចេះសរសេរអក្សខ្មែរ អត់ត្រូវផង ហើយយើង មិនអាចយកអ្នកកាសែតកម្ពុជា ទៅប្រៀបធៀប ជាមួយអ្នកកាសែតនៅអឺរ៉ុប និងតំបន់ណាមួយទៀតបានទេ ព្រោះប្រទេសនីមួយៗ វាខុសគ្នា ទាំងការជ្រើសរើស អ្នកកាសែត របៀបរបបធ្វើការ និងច្បាប់។
លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានលើកឡើងថា កាលពីឆ្នាំ២០ឆ្នាំមុខយើងធ្លាប់បាននិយាយពីលក្ខន្តិកៈ ដើម្បីជ្រើសរើសអគ្គនាយក ឬចាងហ្វាង គឺអ្នកនោះ ត្រូវជាប់វិទ្យាល័យ មហាវិទ្យាល័យ ឬសរសេរអក្សខ្មែរ ច្បាស់លាស់ តែពេលនោះ មានអ្នកជំទាស់។ “ពេលនោះ ចាងហ្វាងកាសែត មិនចាំបាច់មានសញ្ញាបត្រ ឬឆ្លងកាត់សាលាទេ និងមិនបាច់មានអ្វីទាំងអស់ ហើយសព្វថ្ងៃនេះ សកម្មភាពរបស់ចាងហ្វាងកាសែត នៅស្រុកខ្មែរ មានអ្នកខ្លះមិនសរសេរអក្សខ្មែរមិនត្រូវផង ” លោករដ្ឋមន្ត្រីបញ្ជាក់យ៉ាងដូច្នេះ។
លោករដ្ឋមន្ត្រីក្រសួងព័ត៌មាន បានលើកឡើងថា អ្នកកាសែតដែលមានរឿងរ៉ាវ មិនដែលមានអ្នកកាសែតធំ ដែលចេញផ្សាយរាលថ្ងៃទេ។ តិចតួចណាស់ ហើយអ្នកកាសែត ដែលជួបបញ្ហា សួរថា ពួកគាត់ធ្លាប់សរសេរអត្ថបទទេ ប៉ុន្តែពេលមានរឿង យើងនាំគ្នាកាន់ជើងភ្លាម។
ក្លឹបអ្នកកាសែតកម្ពុជា បានប្រកាសថា ដោយមានកិច្ចសហការពីអង្គការ យូណេស្កូប្រចាំកម្ពុជា អង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា ស្ថានទូតប្រទេសស៊ុយអែតប្រចាំកម្ពុជា និងដៃគូសារព័ត៌មានដទៃទៀត ក្លឹបអ្នកកាសែតកម្ពុជា នៅថ្ងៃ៣ ខែឧសភា បានរៀបចំទិវាសេរីភាពសារព័ត៌មានពិភពលោក ឆ្នាំ២០១៨ ក្រោមប្រធានបទ សេរីភាពសារព័ត៌មាន សិទ្ធិទទួលព័ត៌មាន និងការបោះឆ្នោត ដែលមានការចូលរួមពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោកស្រី Anne Lemaistre តំណាងអង្គការ UNESCO ប្រចាំកម្ពុជា លោកស្រី Maria Sargren ឯកអគ្គរដ្ឋទូតស៊ុយអែត ប្រចាំកម្ពុជា និងលោក ប៉ែន បូណា ប្រធានក្លឹបអ្នកកាសែតកម្ពុជា និងអ្នកសារព័ត៌ មន្ត្រីសារព័ត៌ និងអង្គការសង្គមស៊ីវិលប្រមាណជាង១០០នាក់៕ ដោយ៖បញ្ញាស័ក្តិ
