ខណៈដែលតារាចម្រៀង នី រតនា បានភ្ជាប់ពាក្យជាមួយគូដណ្ដឹងដ៏ស្រស់ស្អាត កាលពីពេលថ្មីៗនេះ បានធ្វើឱ្យអ្នកគាំទ្រជាច្រើនចាប់អារម្មណ៍ និងភ្ញាក់ផ្អើលយ៉ាងខ្លាំង ព្រោះតែ ម្ចាស់បទ «មហាឈឺ» រូបនេះ ទើបតែប្រឡូកក្នុងវិស័យសិល្បៈចម្រៀងមិនទាន់បានយូរនៅឡើយ បើធៀបជាមួយរៀបច្បងដទៃគឺ នី រតនា នៅមានវ៏យក្មេងខ្ចីបំផុត ។
ទន្ទឹមគ្នានេះដែរ នី រតនា ក៏ធ្លាប់បានបកស្រាយផងដែរ អំពីរយៈពេលនៃទំនាក់ទំនងស្នេហ៍របស់ខ្លួន និងគូដណ្ដឹងដែលគេស្គាល់ឈ្មោះថា កញ្ញា ហេង សុវណ្ណភក្ដិណា ពោលគឺមានរយៈប្រមាណ ៣ឆ្នាំមកហើយ ពោលគឺតាំងពីក្នុងកំលុងពេល នី រតនា នៅជាបេក្ខជនប្រឡងកម្មវិធី Cambodian Idol នៅឡើយ ។
ជាថ្មីម្ដងទៀត អ្វីដែលធ្វើឱ្យមហាជន ក៏ដូចជាអ្នកគាំទ្រភ្ញាក់ផ្អើលខ្លាំងនោះ គឺបន្ទាប់ពីបានព័ត៌មានពីប្រភពស្និទ្ធស្នាលរបស់ នី រតនា មកថា តាមពិតគូណ្ដឹងរបស់ នី រតនា ជាកូនស្រីអ្នកជំនួញធំម្នាក់ក្នុងប្រទេសឈ្មោះលោក ហេង សុវណ្ណ ម្ចាស់ក្រុមហ៊ុន មង្គលសុវណ្ណត្រឌីង និងជាអគ្គនាយកស្ថាននីយវិទ្យុ មង្គលសវណ្ណ ដែលជាប្រពន្ធផ្សព្វផ្សាយដ៏ធំ គ្របដណ្ដប់ទូទាំងប្រទេស មិនត្រឹមតែប៉ុណ្ណោះលោក ក៏ជាអ្នកជំនួញនាំចូលផលិតផលថែរក្សាសុខភាព រក្សាសម្រស់ និងជីសរីរាង្គអាក្រូសូល ផងដែរ ។
ដោយសារតែមានឪពុកជាជំនួញធំ ដូចនេះ គេសង្កេតឃើញថា កញ្ញា ហេង សុវណ្ណភក្ដិណា មានភាពឆ្លាតវៃក្នុងការជួញដូរ ជាក់ស្ដែងកញ្ញា បានពង្រីកការនាំចូលនៃផលិតផលសម្ផស្សម៉ាក WOMEA ពីប្រទេសជប៉ុន ដោយមានលោក នី រតនា ជាអ្នកជួយចូលរួមផ្សព្វផ្សាយផងដែរ ។
គួរបញ្ជាក់ដែរថា នី រតនា បានចូលរោងភ្ជាប់ពាក្យជាមួយកញ្ញា ហេង សុវណ្ណភក្ដិណា កាលព្រឹកថ្ងៃទី ២៨ ខែមេសា ឆ្នាំ ២០១៨ កន្លងទៅនេះ បន្ទាប់ស្គាល់ចិត្តថ្លើមគ្នា អស់រយៈពេល ៣ឆ្នាំ ៕ សាវុធ
