ភ្នំពេញ ៖ នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប នៅថ្ងៃទី៤ខែឧសភានេះ បានឲ្យដឹងថា ដោយមានការយកចិត្តដាក់ខ្ពស់ ពីសំណាក់ លោកអគ្គស្នងការនគរបាលជាតិ ប្រធាននាយកដ្ឋាននគរបាលព្រហ្មទណ្ឌ រួមទាំង ប្រធាននាយកដ្ឋានប្រឆាំងបទល្មើសបច្ចកវិទ្យា នឹងដោយមានការដឹកនាំបញ្ជារផ្ទាល់ ពីសំណាក់ លោកឧត្តមសេនីយ៍ត្រី ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប ករណីឃាតកម្ម កាលពីចន្លោះម៉ោង២០:៣០នាទីទៅម៉ោង២១:៣០នាទី ថ្ងៃទី២៣ខែមេសាឆ្នាំ២០១៨កន្លងទៅ លើជនរងគ្រោះ ឈ្មោះ ពិត បារាំង ភេទប្រុស អាយុ៤៩ឆ្នាំ មុខរបរ លក់គ្រឿងបន្លាស់រថយន្ត មានទីលំនៅខាងក្រោយ សណ្ឋាគារគោកធ្លក ក្នុងភូមិគ្រួស សង្កាត់ស្វាយដង្គំ រហូតមកដល់ថ្ងៃទី០៣ខែឧសភាឆ្នាំ២០១៨ នេះ នគរបាលខេត្តសៀមរាប បានបើកការស៊ើបអង្កេត ស្រាវជ្រាវបំបែកសំណុំរឿងដ៏ ស្មុគស្មាញ នេះបានហើយ ដោយបានធ្វើការ ឃាត់ខ្លួនជនសង្ស័យ និងអ្នកជាប់ពាក់ពន្ធ័ បានចំនួន៣នាក់(ស្រី១នាក់) ដកហូតវត្ថុតាងបានមួយចំនួន ផងដែរ។
កិច្ចសហប្រត្តិបត្តការណ៍នេះ ធ្វើឡើងដោយមានកម្លាំងនគរបាលនៃអធិការដ្ឋាននគរបាលក្រុងសៀមរាប ចូលរួម សហការណ៍ជាមួយ កម្លាំងនគរបាលផែនសន្តិសុខ និងកម្លាំងនគរបាលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប ។
អធិការដ្ឋាននគរបាលក្រុងសៀមរាបបានបញ្ជាក់អំពីដំណើររឿងក្នុងពិធីបង្ហាញមុខឃាតករកាលពីព្រឹកថ្ងៃទី៤ខែឧសភាឆ្នាំ២០១៨ មានដូចតទៅ ៖ ដោយធ្លាប់មានការទំនាក់ទំនងគ្នាពីមុន ឈ្មោះ សយ ឡុន ហៅជ្រូក បានមករក ឈ្មោះ អ៊ុន ប៉ូឡូញ ហៅ រតនា អោយជួយរកការងារអោយខ្លួនធ្វើ ក្រោយមកនៅថ្ងៃទី២២ខែមេសាឆ្នាំ២០១៨ វេលាម៉ោង៧ព្រឹក ឈ្មោះ អ៊ុន ប៉ូឡូញ បាននាំ ឈ្មោះ សយ ឡុន មករកសុំការងារធ្វើនៅផ្ទះជនរងគ្រោះ បន្ទាប់មក ឈ្មោះ សយ ឡុន និងឈ្មោះ អ៊ុន ប៉ូឡូញ បាននាំគ្នាទៅផឹកស៊ីក្នុងហាងមួយ នៅខាងក្រោយស្តាតចាស់ ក្នុងសង្កាត់ស្វាយដង្គុំ រហូតដល់ម៉ោង២២យប់ ជនសង្ស័យទាំងពីរបាននាំគ្នាចេញពីកន្លែងផឹកស៊ី ហើយ ធ្វើដំណើរទៅ បន្ទប់ជួលរបស់ ឈ្មោះ សយ ឡុន ហៅជ្រូក ដែលមានទីតាំងក្នុងភូមិសាលាកន្សែង សង្កាត់ស្វាយដង្គុំ អំឡុងពេលនៅក្នុងបន្ទប់ជួល អ្នកទាំងពីរបានពិភាក្សាគ្នា អំពីគម្រោង សម្លាប់ដើម្បីយកទ្រព្យសម្បត្តិ ពីជនរងគ្រោះ ព្រោះដោយសារជនរងគ្រោះនៅផ្ទះម្នាក់ឯងហើយមានទ្រព្យសម្បត្តិច្រើន ដោយកិច្ចពិភាក្សានេះជនសង្ស័យទាំងពីរបានពិភាក្សារហូតដល់ម៉ោង ៤ព្រឹកទៀបភ្លឺ ឆ្លងចូលថ្ងៃទី២៣ខែមេសាឆ្នាំ២០១៨ បន្ទាប់ពីរៀបចំគម្រោងច្បាស់លាស់ រួចហើយ ឈ្មោះ អ៊ុន ប៉ូឡូញ ហៅ រតនា ក៏បានឡើងជិះម៉ូតូរបស់ខ្លួនចេញទៅបាត់ទៅ ។ លុះដល់វេលាម៉ោង២០យប់ ឈ្មោះ សយ ឡុន ហៅជ្រូក បានអនុវត្តន៍តាមគម្រោង ដោយចេញមករកម៉ូតូឌុបជិះ នៅចំណុចខាងមុខសាលាអន្តរជាតិ ស្ថិតក្នុងភូមិសាលាកន្សែង ហើយបានខ្ចីទូរស័ព្ទ
របស់ អ្នករត់ម៉ូតូឌុប ដើម្បីខលទៅជនរងគ្រោះ ដោយប្រាប់ថាគេកំពុងជិះម៉ូតូឌុប ទៅជួបជនរងគ្រោះហើយ ពេលទៅដល់មុខផ្ទះជនរងគ្រោះ ជនសង្ស័យ ឈ្មោះ សយ ឡុន បានយកទូរស័ព្ទអ្នករត់ម៉ូតូឌុប ខលទៅ ជនរងគ្រោះម្តងទៀត ដោយប្រាប់ថារូបគេមកដល់ហើយ ដើម្បីឲ្យជនរងគ្រោះបើកទ្វារឲ្យរូបគេ ក្រោយនិយាយទូរស័ព្ទរួច អ្នករត់ម៉ូតូឌុបក៏បើម៉ូតូចេញទៅបាត់ ។ ពេលជនរងគ្រោះបើកទ្វារ ជនសង្ស័យ ឈ្មោះ សយ ឡុន ក៏បានចូលទៅក្នុងផ្ទះ និយាយគ្នាជាមួយជនរងគ្រោះ បានបន្តិចជនរងគ្រោះក៏ដើរឡើងទៅលើឡៅតឿ ឆ្លៀតពេលនោះជនសង្ស័យក៏បានដើរទៅចង្ក្រានបាយផ្នែកខាងក្រោយផ្ទះហើយយកកាំបិតចុងស្រួច កាន់ក្នុងដៃលាក់នៅខាងក្រោយខ្នង ឈរនៅក្បែរជណ្តើរ ពេលជនរងគ្រោះដើរចុះមកវិញ ហើយដើរសំដៅមកនិយាយជាមួយខ្លួន ជនសង្ស័យក៏យកកាំបិតដែលខ្លួនលាក់ទុកក្នុងដៃ ចាក់សំដៅ ទៅបំពង់ករជនរងគ្រោះ បណ្តាលឲ្យជនរងគ្រោះដួលប្រកាច់ស្លាប់ភ្លាមៗ ។ ហើយជនសង្ស័យក៏ដើរឡើងតាមកាំជណ្តើរទៅខាងល់ឡៅតឿ ចូលក្នុងបន្ទប់ដេក របស់ជនរងគ្រោះ ដើម្បីប្រមូល យកទ្រព្យសម្បត្តិ របស់ជនរងគ្រោះ រួមមាន: ខ្សែកមាសមានបណ្តោងយុត្តការ ទម្ងន់បីតម្លឹងពីរជី ចិញ្ចៀនពេជ្រមួយវង់ ទូរស័ព្ទដៃចំនួន២គ្រឿង (ម៉ាកIPhone 7Plus ពណ៌ខ្មៅ+ម៉ាកSamsung Note8 ពណ៌ខ្មៅ ) IPad ចំនួន១គ្រឿង ប្រអប់ផ្ទុកទិន្ន័យកាមេរ៉ាសុវត្ថិភាព១គ្រឿង។
លុះដល់វេលាម៉ោង២៣យប់ ជនសង្ស័យឈ្មោះ ឈ្មោះ សយ ឡុន បានចាកចេញពីកន្លែងកើតហេតុ ដោយមានឈ្មោះ អ៊ុន ប៉ូឡូញ ហៅ រតនា រង់ចាំទទួលហើយដឹកចេញទៅ តាមផ្លូវទៅទិសខាងត្បូង នៃផ្ទះជនរងគ្រោះ ហើយបត់ចូលតាមផ្លូវបាខែង ទៅទិសខាងកើត ទៅដល់ចំណុចលូទឹកស្អុយ ឈ្មោះ សយ ឡុន ហៅជ្រូក និង ឈ្មោះ អ៊ុន ប៉ូឡូញ បានចែកទ្រព្យសម្បត្តិដែលប្រមូលបាន ដោយ ឈ្មោះ សយ ឡុន ហៅជ្រូក ទទួលបាន ខ្សែកមួយខ្សែ ទូរស័ព្ទចំនួន២គ្រឿង រួមនឹងប្រអប់ផ្ទុកទិន្ន័យកាមរ៉ាសុវត្ថិភាពផងដែរ ចំណែក ឈ្មោះ អ៊ុន ប៉ូឡូញ ហៅ រតនា ទទួលបានចិញ្ជៀន១វង់ ក្រោយមកអ្នកទាំងពីរក៏បានបែកផ្លូវគ្នា ដោយឈ្មោះ សយ ឡុន ហៅជ្រូក បានទំលាក់ ប្រអប់ផ្ទុកទិន្ន័យ កាមរ៉ាសុវត្ថិភាព ចូលទៅក្នុងលូទឹកស្អុយ ។
នៅព្រឹកថ្ងៃទី២៤ខែមេសាឆ្នាំ២០១៨ បន្ទាប់ពីមានការភ្ញាក់ផ្អើល ដោយសារប្រទះឃើញសាកសពជនរងគ្រោះ កម្លាំងនគរបាលក្រុងសៀមរាបដឹកនាំដោយលោកវរសេនីយ៍ឯក ទេព ចាន់ណា អធិការនគរបាលក្រុងសៀមរាប បានទៅដល់កន្លែងកើតហេតុ ដើម្បីធ្វើការសហការណ៍ជាមួយអង្គភាពពាក់ព័ន្ធបើកការស្រាវជ្រាវ នៅបរិវេណកន្លែងកើតហេតុ ។ រហូតដល់ថ្ងៃទី២៨ខែមេសាឆ្នាំ២០១៨ កម្លាំងផ្នែកព្រហ្មទណ្ឌក្រុងសៀមរាប ដឹកនាំដោយលោក វរសេនីយ៍ត្រី នួន ស័ក្តិចំរើនរិទ្ធ អធិការងក្រុងសៀមរាប បានរកប្រអប់ផ្ទុកទិន្ន័យ កាមរ៉ាសុវត្ថិភាពឃើញ។
ក្រោយរកឃើញ ប្រអប់ផ្ទុកទិន្ន័យ កាមរ៉ាសុវត្ថិភាព នឹងរកឃើញតម្រុយផ្សេងៗទៀត ពាក់ព័ន្ធ ទៅនឹង ជនសង្ស័យ និងជនពាក់ព័ន្ធ នៅថ្ងៃទី២ខែឧសភាឆ្នាំ២០១៨ កម្លាំងនគរបាលផែនសន្តិសុខដឹកនាំដោយលោកឧត្តមសេនីយ៍ត្រី ហួត សុធី និងកម្លាំងនគរបាលផែនព្រហ្មទណ្ឌ ដឹកនាំដោយលោកឧត្តមសេនីយ៍ត្រី ភឹង ចិន្តារ៉េត ព្រមទាំង កម្លាំងនគរបាលនៃអធិការដ្ឋាននគរបាលក្រុងសៀមរាប នៅវេលាម៉ោង២៣យប់ យើងបានធ្វើការឃាត់ខ្លួនជនសង្ស័យ ឈ្មោះ ធឿន ធីតា ហៅ ស៊ុក ភេទស្រី អាយុ២០ឆ្នាំ មុខរបរ បុគ្គលិកខារ៉ាអូខេ មានទីកន្លែងកំណើត នៅភូមិ ត្របែក ឃុំដំដែក ស្រុកសូទ្រនិគមន៍។
នៅវេលាម៉ោង១:៣០នាទីរំលងអធ្រាត្រឈានចូលថ្ងៃទី៣ខែឧសភាឆ្នាំ២០១៨ យើងបានធ្វើការឃាត់ខ្លួនជនសង្ស័យម្នាក់ទៀត ឈ្មោះ សយ ឡុន ហៅ ជ្រូក អាយុ ២៤ ឆ្នាំ(ជាចារី) រស់នៅភូមិថ្នល់ដាច់ ឃុំដានរុន ស្រុកសូទ្រនិគម ខេត្តសៀមរាប ចាប់ខ្លួននៅភូមិថ្នល់ដាច់ ឃុំដានរុន ស្រុកសូទ្រនិគម ខេត្តសៀមរាប ខណះជនរូបនេះ នៅកន្លែងពិធីបុណ្យមួយ នៅភូមិខាងលើ។
នៅវេលាម៉ោង១២ថ្ងៃត្រង់ ឈ្មោះ អ៊ុន ប៉ូឡូញ អាយុ ៣២ឆ្នាំ រស់នៅ ភូមិដំដែក ស្រុកសូទ្រនិគម(ជាអ្នកសមគំនិត និងជាមេខ្លោង)។
វត្ថុតាងដកហូតបាន៖ ទូរសព្ទ័ម៉ាកIPhone 7Plus ពណ៌ខ្មៅមួយគ្រឿង ទូរស័ព្ទម៉ាក Samsung Note8 មួយគ្រឿង។
យោងតាមចម្លើយសារភាពរបស់ជនសង្ស័យ និងពាក្យបណ្តឹងរបស់សមាជិកគ្រួសារជនរងគ្រោះ ជនសង្ស័យនិងវត្ថុតាង ត្រូវបាននគរបាលខេត្តសៀមរាប កសាងសំណុំរឿង បញ្ជូនទៅតុលាការ ចាត់ការតាមនិតិតវិធីច្បាប់ ៕ ដោយ ៖ បញ្ញាស័ក្តិ